محمد منور سراج

ج:1972ء

محمد منور سراج دے اَبّا سئیں دا ناں منشی سراج احمد ہے ۔ آپ1972ء اِچ محلہ چاہ انجݨ والا دیرہ نواب صاحب اِچ پیدا تھئے ۔ منور سراج سفیر لشاری دے شاگرد ہِن۔

(1)

دشمن تاں ڈھیر ہِن پر کوئی وی یار کائنی

عمراں گزر ڳئی ہے روندیں کوئی غمگسار کائنی

اُلفت دی ٻوٹی سُک ڳئی آساں دے پُھل کُمّا ڳئے

دِل دے چمن اندر آئی بہار کائنی

میں کوں مار سَٹ تُوں تھی سُرخرو جہان وچ

ایں بے وفا زندگی دا جیویں کوئی اعتبار کائنی

مطلب پرست دنیا مطلب دے یار سارے

اُلفت دا کال پئے ڳئے سچا جو پیار کائنی

نفرت دی چھل منورؔ آ تے ویران کر ڳئی

رُلدے کوں سہارا ݙیوݨ تے کوئی تیار کائنی

(2)

دشمن بݨ ڳن اکثر لوک ، تھی ڳن دِل دے پتھر لوک

کوئی کہیں دی گاٖلھ نی سُݨدا ، ہِن شیشے دے پیکر لوک

ݙکھے ویلے نال نی کھڑدے ، لیندن ہاں وچ خنجر لوک

ہر ہر جا تے وَل وَل میکوں ، ݙیندن اُلٹے چکر لوک

وَل وَل میکوں طعنے ݙیندن ، سنگدل یار منورؔ لوک

حوالہ

کتاب احمد پور شرقیہ اِچ سرائیکی غزل دی ٹور، مصنف : عبدالباسط بھٹی ، ناشر : جھوک پبلشرز ، ملتان