محمد عمران لاڑ

تاریخ پیدائش: 15مارچ1983ء

محمد عمران لاڑ دے اَبا سئیں دا ناں عبدالرحمن لاڑ ہے ۔عمران لاڑ دیرہ نواب صاحب اِچ 15مارچ 1983ء اِچ پیدا تھئے ۔ ٻہوں چنگا علمی ادبی ذوق رکھیندے تے سرائیکی شاعری وی کریندے۔ شعری سفر جاری ہے اُمید ہے چنگا پندھ کریسی۔

مونجھے دھݨ تے چھانگاں روہی دیاں ٹوبھے جھوپڑ چھپڑیاں

لڳدے ساکوں ساوݨ بُھل ڳئے سوچ سُچیندے پکھی

غزل

میݙے دیس دی قسمت سمھ ڳئی اے، ہتھ واڳ لڳی زرداراں دے

اُتھ راول ، بھورل رُل ویندن ، جتھ ٻال ہوون سرداراں دے

میݙے شہر دی حالت ابتر ہے ، کیا حال ݙیواں ، کیا ݙکھ پھولاں

ساݙے رہبر ، رہزن بݨ ڳئے ہِن ، ایہ حال ہینیں غداراں دے

جے جڳ تے جیوݨ چاہندا ہئیں، کجھ راز لُکا ، ہمراز توں بچ

نانگیں دے ݙنگیے بچ ویندن ، نی بچدے ݙنگیے یاراں دے

توں ٻول تے سوچݨ چھوڑ کراہیں ، کجھ سوچ سمجھ تے ٻولیا کر

منہ منہ دے پَھٹ نئیں مِٹ سڳدے ، مٹ ویندن پھٹ تلواراں دے

اوندی اَکھ دے سِیپ دے موتی توں میݙی اَکھ دے کاسے خیر گھدی

میݙی مونجھ ملوک دے ساہ سُک ڳئے ، اُݙ ہوش ڳئے مئے خواراں دے

(2)

کھمبوں کُھتے ماء دھرتی تے پَر پھڑکیندے پکھی

بے وَس شودے پے کُرلاندے نِیر وہیندے پکھی

مونجھے دھݨ تے چھانگاں روہی دیاں ٹوبھے جھوپڑ چھپڑیاں

لڳدے ساکوں ساوݨ بُھل ڳئے سوچ سُچیندے پکھی

دھی شودی دا سر ہے ننگا تے پُتر ہِن ڳلوں راݨے

چنج وچ چنج پا مَردے ویندن ٻال رہیندے پکھی

بھاویں تَسِن پر نئیں منگدے ظالم کولوں پاݨی

چوݙاں صدیاں گزریاں گاٖلھیں پئے دوہریندے پکھی

گُنگیاں آساں بے وَس جذبے میݙے ہاں کوں کھا ڳن

سُدھ سوجھل توں رو رو پئے ہن شام سُہیندے پکھی

سوچاں ، وِپریاں دے وچ میݙا ذہن کھڑا ہے رُدھا

گزریے ویلے ، وِسریاں گاٖلھیں یاد کریندے پکھی

حوالہ

کتاب احمد پور شرقیہ اِچ سرائیکی غزل دی ٹور، مصنف : عبدالباسط بھٹی ، ناشر : جھوک پبلشرز ، ملتان