محمد عظیم خان عظیم

محمد عظیم خان عظیم وستی جتاں والی ڈیرہ اسماعیل خان دے رہݨ والے ہن۔ آپ پٹھاݨ قوم نال تعلق رکھدے ہن۔ آپ فارسی دی ٻہوں ساری تعلیم حاصل کیتی۔ انھاں حضرت خواجہ اللہ بخش تونسوی دے ہتھ تے بیعت کیتی۔ انھاں دا سلسلہ بیعت چشتیہ ہئی۔ عظیم ٻہوں نیک تے صوفی منش بزرگ ہن۔ صوم و صلوٰۃ دے پابند تے ہر وقت عشقِ رسول صلی اللہ علیہ وسلم وچ مست۔ محمد عظیم سرائیکی دے علاوہ اردو زبان وچ وی شاعری کیتی اے۔ آپ دی شاعری تے فارسی زبان دا کافی اثر ݙسدے۔ انھاں عارفانہ انداز دیاں کافیاں دے علاوہ حمد ‘ نعتاں ‘ ݙوہڑے ‘ غزلاں تے مرثیے وی ٻہوں زیادہ لکھین۔ ایں توں علاوہ بحر تے بند وی تخلیق کیتن۔ عظیم دا ہک مجموعہ کلام ’’گلزار عظیم‘‘ دے ناں نال ادھ صدی پہلے شائع تھی چکے۔ ایں توں علاوہ انھاں سوہݨی مہنیوال دا قصہ وی منظو م کیتا۔ جیڑھا اَڄاں تئیں شائع نیں تھی سڳیا۔

دیرے دا اے سہرہ شاعر 1920ء وچ اللہ سئیں کوں پیارا تھیا۔

کافی

کریں چا گر قتل میکوں

میں حاضر یار بسم اللہ

اے سر قربان تیݙے سر توں

مزا تلوار بسم اللہ

تیݙے دربار شاہی وچ

میݙا دعویٰ غلامی ہے

اگر ویچو غلام اپݨا

سر بازار بسم اللہ

انھاں مشتاق اکھیاں تے

فراقاں درد ݙکھیاں تے

بجائے فرش اگر خواہش

کرو رفتار بسم اللہ

خوشی فردوس جنت دی

عظیماں گرچہ سب حوراں

ہوون حاصل نہ گر میکوں

عوض دیدار بسم اللہ

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان