محمد شریف نسیم بھٹی دی کتاب ڳاہݨے ڳٹھڑے

نِکی جہی ڳالھ

افسانہ لکھݨ دی لوڑ ایں سانگوں پئی جو اَڄکل سرائیکی زبان وچ اُردو تے انگریزی گُھسڑ آئے ہن تے سرائیکی اَملک ناں دی رہڳئی ۔ اَڄ پڑھولے ٻال اپݨی، پیئو ، ݙاݙے دی ٻولی وِسار تے غیر زباناں ٻولݨ فخر سمجھدن ، میں جیڑھے وَس وسیب وچ ڄمیا ، پلیا ہاں جیڑھی اساں ٻولی ٻولیندے ہاسے اوکوں ریاستی یا ملتانی آکھیا ویندا ہا ۔ اَڄکل سرائیکی سݙیا ویندے ۔ اپݨی ماء ڄائی زبان جیڑھی جو میݙے کول آوݨ والیاں نسلاں کیتے آم شام ہے ۔ افسانیاں دے سانگے نال سانبھ رکھیئے تے اپݨی نویں نسل کوں سوگھی کریندا ہاں ۔ میݙے افسانے ایں واسطے لمبے ہِن تاں جو پڑھݨ آلا افسانے دی ، ناول دی ، داستان دی تے ڈرامے دی چَس گِھن سڳے ۔ ہرافسانے دے آخر وچ فرہنگ اوکھے اَکھر تے انہاں دا مطلب لکھ ݙتے تاں جو سمجھݨ وچ آسانی تھیوے ۔ اپݨے ٻالاں کوں ضرور پڑھوائو تے ٻلوائو جو اساݙی ٻولی دی ڄاݨ سُنڄاݨ سرائیکی جیندی رہ ونڄے۔

محمد شریف نسیمؔ

سرائیکستان مردم خیز خطہ ہے ، وݙے وݙے لوک اِتھاں پیدا تھئے ، انہاں وِچ ہک ناں محمد شریف نسیم بھٹی دا ہے ، نسیم بھٹی ساری حیاتی فن دی آبیاری کریندا رہڳے ، بھانویں جو آپ غم سہندا رہڳے پر لوکیں کوں کِھلویندا رہڳے ۔ نسیم بھٹی پیدائشی فنکار ءِ ،فنی صلاحیتاں بچپن توں موجود ہَن ، بہاول پور دے تاریخی علاقے لال سونہارا وچ پیدائش تھئی ،وستی دی مسیت ءِ چ حافظ غلام نبی توں قرآن مجید دی تعلیم حاصل کیتی  سکول ءِ چ تعلیم دے نال نال غیر نصابی سرگرمیاں وچ وی حصہ گھداتے سکول دے تھیوݨ آلے پروگراماں وچ حصہ گھندے رہڳے ۔وݙے تھئے تاں باقاعدہ ڈرامیں وچ کم شروع کر ݙتا ۔ نسیم بھٹی ݙسیندن جو اپݨے وقت دے وݙے فنکار کریمݨ نقلی آف کہروڑ پکا ، جندو لودھرا ،طالب نقلی ،دوست نقلی تے ٻئے فنکاراں نال کم کیتا ۔ اداکاری دے نال نال ڈرامے خود وی لکھیے ،نسیم بھٹی ݙسیندن جو میݙی ذات بھٹہ ہے پر عنایت حسین بھٹی توں متاثر تھی تے میں بھٹی لکھݨ شروع کیتا ۔سرکس وچ اُنہاں نال کم کیتا ،سرائیکی پروڈیوسر اسلم قریشی دے ڈرامیاں وچ وی اپݨے فن دے جوہر ݙکھائے ۔ فردوس جمال ،عمر شریف تے بابر علی نال وی کم کیتے،ٹیوب ایٹم انہاں دی خاص سُنڄاݨ بݨیا ، نسیم بھٹی ٻٹ کڑاک دے بادشاہ ہِن ،انہاں دا لطیفہ ’’ٹرڑ‘‘ اَڄ وی ہر جاہ تے مشہور ہے ۔نسیم بھٹی ݙسیندن جو میں ملک دے سارے صوبیں وچ کم کیتے پر اپݨے وسیب دے شاہراں میانوالی ، بھکر ، جھنگ ، ڈیرہ غازی خان ، مظفرگڑھ ، کوٹ مٹھݨ ، ملتان ، لودھراں ، وہاڑی ، بہاولنگر ، خانیوال ، دیرہ اسماعیل خان ،بہاول پور ،رحیم یار خان ، خان پور تے روہ روہی تھل دمان دے ٻئے علاقیاں وچ کم کرݨ دا جتنا مزہ اَئے ٻئی جاہ تے نی آیا ۔ پٹھاݨے خان ، اجمل ملک ، ملنگ حسین تے خلیل احمدخلیل میݙے خاص سنگتی ہِن۔نواب صادق خان دی محبت ءِ چ میݙے ڈرامے ’’خان اعظم‘‘ کوں ایوارڈ حاصل تھیا ۔ بریگیڈئیر نذیر علی شاہ ، سیٹھ عبیدالرحمن ،میاں عقیل الرحمن میݙے مہربان ہَن ۔ او ݙسیندن جو میاں بلیغ الرحمن میکو ںایوارڈ ݙتا ۔ خواجہ فرید سنگت ڈیرہ غازی خان ،فکر و ثقافت مظفرگڑھ ، جھوک سرائیکی دی طرفوں ایوارڈ تے اعزازات وی حاصل تھئے ۔ آپ دے بزرگیں دا پیشہ لوہار ہئی ،محکمہ فوڈ دے وچ ملازم رہڳن ،2005ء اِچ ریٹائرمنٹ گھدی ہے ۔24سال جانباز فورس ءِ چ رہڳن ۔ اولاد وچ چھی دھیاں تے ہک پُتر ہے ۔ نسیم بھٹی ٻہوں چنگے فنکار ہووݨ دے نال نال ٻہوں چنگے دوست وی ہِن ، اپݨی دھرتی ، اپݨی مٹی تے اپݨے وسیب نال محبت کریندن ۔آپ دی کتاب ’’ڳاہݨےڳٹھڑے‘‘ہک شاہکار کتاب ہے ،جینکوں اساں وسیب دے قصے آکھݨ دے نال نال سرائیکی لغت وی آکھ سڳدوں جو ایندے وچ سوہݨی سرائیکی زبان ورتی ڳئی اے، دُعا ہے جو اللہ سئیں نسیم بھٹی کوں سدا خوش آباد تے شاد رکھے ۔

ظہور دھریجہ

جھوک سرائیکی ملتان

حوالہ

کتاب: ڳاہݨے ڳٹھڑے، مصنف : محمد شریف نسیم بھٹی . ناشر جھوک پبلشرز ملتان