محمد سلیم خان نیازی . ڄاݨ سُنڄاݨ
ج: 01-09-1961ء
محمد سلیم خان نیازی شوکت آباد کالونی اچ راہندن ۔ اُنہاں دے اَبا سئیں دا ناں محمد عالم خان نیازی ہے۔ اِنھاں دے وَݙ وݙیرے روزی رزق دے حیلے میانوالی توں احمد پور آباد آ تھئے ۔ سلیم نیازی دے ݙاݙا سئیں خان بیگ خان عرف بھائی خان نواب آف بہاولپور دے باڈی گارڈ دستے اچ ملازم ہن۔ محمد سلیم خان صادق عباس ڈگری کالج اچ پڑھدے رہ گن ۔اَڄکل اپݨا کاروبار کریندن۔ شاعری اچ سفیر لشاری تے رفیق احمد پوری کوں اُستاد منیندن ۔ ہݨ تئیں انہاں دیاںترائے کتاباں چھپ چُکین ۔ ݙو نثر اچ تے ہک شاعری اچ۔
؎ شعور بدھل سوال بدھل
اَساݙے سارے خیال بدھل
٭ بمطابق شناختی کارڈ ملاقات شاعر، محلہ شوکت آباد، احمد پور شرقیہ۔یکم مارچ2012ء
کلام ٭
(1)
شعور ٻدھل ‘ سوال ٻدھل
اَساݙے سارے خیال ٻدھل
گزار ٻیٹھوں حیاتی ساری
کرا تے اپݨے کمال ٻدھل
ہے درداں ماری ایہ دلڑی ساݙی
تے حیلے ٻدھل ، حوال ٻدھل
ہے عشق کوڑا ‘ وفا تماشا
ملاپ ٻدھل وصال ٻدھل
ایہ کون لیندا پے مُل اساݙا
منڈی ٻدھل دلال ٻدھل
کہانی ساݙی پراݨی یارو
او ہے گزری ٻدھل ایہ حال ٻدھل
رفیق ٻدھل ، سلیم ٻدھل
ݙیوایا ٻدھل تے لعل ٻدھل
(2)
نیر وہیندن اَکھیں
درد ݙسیندن اَکھیں
جگراتے دیاں ماریاں
خون وہیندن اَکھیں
تیݙی چُپ تے روندیاں
مہݨیں ݙیندن اَکھیں
سوچیں کلہا ٻہہ تے
کیوں جگویندن اکھیں
منزل لیلے ٻاک اے
سچ فرمیندن اکھیں
(3)
سُرخرو کیویں تھیواں مئیں ٻالاں کنوں
سوچاں کھا د ہی ودِن میکوں سالاں کنوں
کہیں دے ݙکھ دے نہیں کہیں دے سکھ دے نہیں
لوک زِچ ایں تھئے ہِن اٻالھاں کنوں
خاب ترکہ میݙا خاب ورثہ میݙا
لوک حیران میݙیاں سنبھالاں کنوں
ٻال جھنڈے بغاوت دے چاتی ودن
ٻال ہݨ نی رہیندے مثالاں کنوں
اپݨے ٻالاں دا مجرم جو ہاں میں سلیم
مویا ویندا ہاں ٻالاں سوالاں کنوں
٭ کلام شاعر بمطابق بیاض شاعر
حوالہ
[لکھو | ماخذ وچ تبدیلی کرو]کتاب احمد پور شرقیہ اِچ سرائیکی غزل دی ٹور، مصنف : عبدالباسط بھٹی ، ناشر : جھوک پبلشرز ، ملتان