محمد ساجد درانی
ج:2اکتوبر 1954ء
اصل ناں محمد ساجد درانی قادری ، تخلص ساجد درانی ، بابے سئیں دا ناں ، صوبیدار حق نواز خان درانی چشتی ، 2اکتوبر 1954ء اِچ محلہ قریش آباد احمد پور شرقیہ اِچ پیدا تھئے۔
(1)
رُخ توں ہٹایاں زُلفاں جو اُوں نے خمار وِچ
ݙیکھݨ دے ݙا دا حسن ہا مینہ دی پھنوار وِچ
میںاونکوں ݙیکھدا ریہاں ہر ڳل دے روپ وِچ
اُوں حسن دے خزانے لُٹائے بہار وچ
کینویں اے اَکھیں کھول تے بھالے تساݙی راہ
ہُݨ حوصلہ او کینی تساݙے بیمار وِچ
او شخص میݙی جان ہے او میݙی روح ہے
اوں ٻاجھ اصلوں دِل نہیں آندا قرار وِچ
حالت میݙی تے لوک ہُݨ طعنے مریندے ہن
وَل وی میں مست رہندا ہاں تیݙے خمار وِچ
ایں رُت نے اُلٹا سینے دے وچ بھا ہے لا ݙتی
ساجدؔ توں لنگھ تاں آنویں ہا فصلِ بہار وِچ
(2)
اَحٖ تیݙے ٹھاٹھ باٹھ ہِن وارث ہائیں تاج دا
سِجھ ہک ݙیہاڑے ڈھل ویسی تیݙے ایں راج دا
ݙیندا ریہاں میں اُوکوں محبت دے واسطے
رکھیا نہ اوں خیال محبت دی لاج دا
ایجھا بکھر ڳیا ہاں جو لبھدا نشان نئیں
کیا حال پُچھدیں دوستا ظالم سماج دا
متھے دے وَٹ دی پیار وچ تفسیر ڄاݨ تے
دِل چُور چُور تھی ڳیا نازک مزاج دا
چیڑی نے آلھݨے تے کھنڈائے چا اپݨے پَر
ہر پاسوں زور شور ہا بدلیں دی گاج دا
اُوں دِلرُبا دا چھیکڑی دیدار چا کرائو
ہُݨ کوئی فائدہ نہیں میݙے علاج دا
بیوہ دا گھر وی رات کوں چوراں نے لُٹ گِھدے
جوڑیا ہا پیسہ پیسہ اُوں نے دھی دے ݙاج دا
ساجدؔ میں ایں جہان کوں کینویں کراں قبول
ہر شخص میکوں قیدی نظردے رواج دا
(3)
کھیر وچ پاݨی وی ݙہدا ہاں جو رَلدا ویندے
وقت دے نال تیݙا رنگ بدلدا ویندے
وقت دیاں ݙئیݨیں میݙے ماس کوں کھادی ویندن
کھکھڑیاں کھکھڑیاں ہے میݙا بُت اَتے ݙلدا ویندے
ہُݨ کلہیپے وی میݙے بُت کوں ولھیٹݨ پئے ڳن
رنگ والاں دا وی ہر روز بدلدا ویندے
تُوں تاں عاجز ہانویں ساجدؔ ایں بھری دنیا وِچ
کہیں دی شفقت ہے تیݙا دِل جو وندلدا ویندے
حوالہ
[لکھو | ماخذ وچ تبدیلی کرو]کتاب احمد پور شرقیہ اِچ سرائیکی غزل دی ٹور، مصنف : عبدالباسط بھٹی ، ناشر : جھوک پبلشرز ، ملتان