محمد رمضان سفیر لاشاری

محمد رمضان سفیر لاشاری محراب والا ڈیرہ نواب صاحب احمد پور شرقیہ دے بلوچ خاندان دے فرد ہَن۔ آپ امیر آف بہاول پور دی فوج وچ پورے40سال نوکری کیتی ہئی۔ اوندیاں کافیاں وچ روایتی چس وی ملدی اے تے جدید شاعری دا سواد وی شامل اے۔ اوندیاں کافیاں پچھلی روایت دی عکاسی وی کریندن تے نویں شعری معیار تے وی پوری اُتردن۔ ایں توں علاوہ سفیر لاشاری اپݨے کلام وچ چولستان تے ݙوجھے تل وسیبی حوالے وݙی خوبصورتی نال ورتین۔ زبان و بیان دے لحاظ نال او ایں دور دے ہک اُبھرنویں شاعر ہن۔ کافی دے علاوہ انھاں غزلاں ‘ ݙوہڑے تے نظماں وی شاندار لکھین۔ آپ دا پہلا مجموعہ کلام ’’وپرے‘‘1980ء وچ شائع تھے۔نمونہ کلام :

کافی

آ ونڄ آ ونڄ آ ونڄ

غم دے حال ونڈا ونڄ

بدلاں لایاں گونجاں

وطناں ول ڳن کونجاں

میکوں مارِن مونجھاں

ہک دیدار کرا ونڄ

روہی لائن بہاراں

ٹوبھے تار متاراں

میں سرسول ہزاراں

کیتے قول نبھا ونڄ

لاݨے پھوگ پُھلارئیے

شنگریاں ڄنڈ سنگارئیے

ݙینہ ہن مینگھ ملھارئیے

چیتر بہار سہا ونڄ

ہر شے روگ ودھاوے

ساوݨ کھاوݨ آوے

ڈھول سفیرا آوے

اُڄڑی جھوک وسا ونڄ

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان