محمد الطاف عباسی

ج: 1955ء ۔ و:15مئی 2008ء

اصل ناں محمد الطاف عباسی ، تخلص الطاف پرواز ؔ ، اَبّے سئیں دا ناں صوفی عبدالستار عباسی ، 1955ء اِچ ڈیرہ نواب صاحب احمد پور شرقیہ اِچ پیدا تھئے ۔ انہاں دی وفات 15مئی 2008ء کوں تھئی ہے۔

آ جانی دھاندا ݙیکھ میکوں ایں ݙکھاں دی برسات دے وچ

ودھ تیر توں تکھیاں پھینگاں ہِن نمہیں اَدھ رہ ڳئی اَدھ رات دے وچ

اُڄڑی کوں کلہا ݙیکھ تے ہُݨ ، درداں دے جا جا دیرے ہِن

سُکھ چین سبھے کر پاسہ ڳن ݙکھ راہندن ہر دم گھات دے وچ

ربّ ڄاݨدے کائنا مر سڳساں جے تئیں نہ سامݨے تو آسیں

ایویں سڑساں ،چُڑھساں ، مرساں پئی لنگھ عمر ویسی سکرات دے وچ

ہک واری پھیراپا سوہݨاں ، روندی کوں آن رہا سوہݨاں

آ سانول رَبّ دے ناں تے آ ، ݙکھ دور چا کر ہک جھات دے وچ

تیݙے عشق دی سوہݨی ٻوٹی تے ہک کنڈا پھلاں نال سہی

پھس دِلڑی ڳئی تیݙے پیار دیوچ اَڑ جندڑی ڳئی تیݙی ذات دے وچ

پروازؔ نہ ہرگز روح تھیسی ، توݨے عزرائیل جے لکھ آسن

میں تیݙے کہیں کوں کیا ڄاݨاں جند ݙیساں تیݙی تات دے وچ

(2)

پھل دی لالی ہے جیڑھی خون جگر میݙا ہے

ہے نوا توݨے جو بلبل دی ، اثر میݙا ہے

جتھاں ٹُر ٹُر تے شودی سسی کوں پئے ڳئے چھالے

اوں تتی ریت تے جاری اے سفر میݙا ہے

بݨ تے آیا ہاں میں ایں جڳ تے مسافر یارو

صاف پُچھدو تاں وطن پریم نگر میݙا ہے

روپ مجنوں دا وَٹا تے وی سدا خوش رہنداں

بݨ تے لیلیٰ اے رِجھاوݨ وی ہُنر میݙا ہے

عشق دا نور میݙے سینے دے وچ ہے پروازؔ

جیڑھا محبوب دا رستہ ہے او گھر میݙا ہے

(3)

میں  تاں مر مر تے مُک مُک تے ݙہدا ریہاں

تیکوں تئیں کولوں لُک لُک تے ݙہدا ریہاں

تیݙا پندھ ہا جو جوں جوں اڳونہاں ریہا

میں تاں تھل اِچ وی مُک مُک تے ݙہدا ریہاں

پاݨی پیوݨ دا میکوں کتھاں ہوش ہا

تیکوں ہر ساہ تے ٻک ٻک تے ݙہدا ریہاں

کتھاں لُکیا رہیں ہُݨ توں چوݙی دا چن

میں تاں انڳلیں کوں ٹُک ٹُک تے ݙہدا ریہاں

وچ تیݙے پیار دے اپݨی پروازؔ کوں

دِل دے تیشے دی ٹھک ٹھک تے ݙہدا ریہاں

حوالہ

کتاب احمد پور شرقیہ اِچ سرائیکی غزل دی ٹور، مصنف : عبدالباسط بھٹی ، ناشر : جھوک پبلشرز ، ملتان