محمد الادریسی
محمد الادریسی
[لکھو | ماخذ وچ تبدیلی کرو]محمد الادریسی ، ہک جغرافیہ دان ، نقشہ نگار اتےملخ پھرندڑہا ، جیڑھا 1100 عیسوی وچ مراکش وچ پیدا تھیا اتے 1166 عیسوی وچ صقلیہ (سسلی) وچ فوت تھیا ۔ اوں دا تعلق عرب دنیا نال ہئی پر اوں اپݨی زندگی دا وݙا حصہ سسلی دے بادشاہ راجر دوم دے دربار وچ گزاریا ۔
الادریسی اپݨی زندگی وچ ٻہوں سارے سفر کیتے اتے دنیا دے مختلف حصیاں دا مطالعہ کیتا ۔ اوں افریقہ ، یورپ اتے ایشیا دے کئی علاقیاں دا دورہ کیتا اتے اتھوں دے جغرافیائی حالات ، ثقافت اتے تاریخ بارے معلومات کٹھیاں کیتیاں ۔ اوندیاں معلومات دی بنیاد تے راجر دوم دی فرمائش تے ہک وݙا نقشہ تیار کیتا ڳیا ، جینکوں "تابولا روجیریانا" آکھیا ویندے ۔ ایہ نقشہ اوں ویلھے دا سب توں تفصیلی اتے درست نقشہ ہئی ۔
الادریسی دی سب توں مشہور کتاب "نزہۃ المشتاق فی اختراق الآفاق" (دنیا دے دورے دا شوق رکھݨ والے دی تفریح) ہئی ۔ ایں کتاب وچ دنیا دے مختلف علاقیاں دا تفصیلی ذکر موجود ہے ۔ ایں کتاب وچ دریاواں ، پہاڑاں ، شہراں اتے مختلف تہذیباں بارے معلومات موجود ہن ۔ اوں مختلف قوماں دے رسوم و رواج ، زباناں اتے معیشت بارے وی لکھیا ۔
الادریسی طب اتے نباتات دے علم وچ وی دلچسپی رکھی ۔ اوں مختلف پودیاں اتے گھاہ ٻوٹ دے طبی استعمال بارے وی معلومات کٹھیاں کیتیاں ۔ اوں سسلی دی آب و ہوا اتے نباتات بارے وی لکھیا ۔