محمد اعظم خان چانڈیہ
محمد اعظم خان چانڈیہ تحصیل صادق آباد دے وسوں وان ہن۔ آپ حضرت موسیٰ نواب دے خلیفے تے مرید ہن۔ محمد اعظم خان چانڈیہ آخری عمر وچ بیعت تھے ہن۔ اعظم دے حلیہ مبارک کوں وݙی شہرت نصیب تھئی اے ۔ ہُݨ تئیں ایندے بے شمار ایڈیشن شائع تھی چکن۔ میر حسان الحیدری دی تحقیق دے مطابق محمد اعظم دے حلیہ مبارک دا دور چھیویں صدی ہجری دا نصف آخر متعیّن کیتا ڳے تے اے حلیہ مبارک ‘ نورنامے دے قریبی دور دی کتاب اے ۔(55)۔ اعظم دے ایں حلیہ مبارک دے کل اشعار 192ہن۔ حلیہ مبارک دا آغاز حمدیہ اشعار توں تھیندے:
ہر دم حمد الٰہی آکھاں رب کوں خالق جاناں
جیں رب اپݨا دوست بݨایا سوہݨا ݙوہاں جہاناں
وچ جناب رسول معظم آکھے بندہ اعظم
لا تعذعَلیہ وَآلہ صَلٰی اللہ علیہ وٰسلم
ایندے بعد شاعر دے مدینے ونڄݨ تے روضہ رسول اللہ تے حاضری ݙیوݨ دی سک دا بیان اے۔ ول حضور کریم صلی اللہ علیہ وسلم دا حلیہ مبارک ‘ آپ دے حسن دی تعریف ٻہوں دل چھکویں انداز اِچ کیتی ڳئی اے۔
نوری عالم سارا آکھے ماہ کنعانی سوہݨا
پر چن عرب دا ٻہوں سلونا سوہݨا تے من موہݨا
لعل یاقوت لباں دی لعلی ݙیکھن دے سدھراݨے
رم جھم ݙنداں اُتوں موتی گھول گھماݨے
رنگ کݨک دا سرخی بھریا پھل گلابی پنڈا
رنگ بھرئیے کوں ݙیکھے تھیوے پھل تازہ شرمندہ
ݙیکھ جمال نبیؐ سرور دا سورج چن شرماون
حور ملائک صدقے جاون ‘ پریاں گھول گھماوݨ(56)
شاعر سرور کائنات نال اپݨی محبت دا بھرپور اظہار کیتے۔ حلیہ مبارک دے بیان دے بعد جنگ ‘آمد دا تذکرہ ‘ ول سیرت پاک دا بیان آپؐ دیاں پاک عادتاں ‘ لباس ‘ چال ڈھال ‘ خوراک ‘ آپ دی عمر مبارک ‘ دین دی تکمیل دا اعلان تے وصال تئیں ہر ہر مرحلے کوں بے پناہ عقیدت نال بیان کیتے۔ ایں حلیہ مبارک دے مطالعہ توں پتہ لڳدے جو محمد اعظم ہک وݙے عالم دین تے قادر الکلام شاعر ہن۔
حوالہ
[لکھو | ماخذ وچ تبدیلی کرو]کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان