محمد اعظم بلوچ

ج:4-3-1980

محمد اعظم بلوچ S/Oمحمد امین خان رکن الدین کالونی بہاول پور واہ موڑ

شعر سخن زر مال اساݙا قلم ہے ترکہ ساݙا

حُسن شریف تے غزلاں پڑھݨ کم ہے ترکہ ساݙا

رَت اساݙی پیوو بھانویں ماس اساݙا کھاوو

ہݙ ایہے ہِن تݙ اساݙی چم ہے ترکہ ساݙا

ہے تاں یار تہاݙی مرضی ٻوڑو بھانویں تارو

رے سینکی فریاد ہے ، اَکھ پُرنم ہے ترکہ ساݙا

طعنے مہݨے غیر دے بھانویں ساہ ساہ دھکے دھوڑے

اپݨے لوکیں دا وی لہجہ سم ہے ترکہ ساݙا

تانگھ طلب دی سُولی بھانویں جگرے ساڑ پھلوہے

ہجر فراق ہِن گاہݨے ساݙے غم ہے ترکہ ساݙا

بیشک سینے نہ او لاوے قدمیں ہیٹھ وِچھاوے

اپݨا نوکر سمجھے اعظمؔ ، ہے ایہ ترکہ ساݙا

(2)

ساہ ساہ سِک سکراتیں سڑسن سوچیں ہا

پیار دے وچ اَزمائیشاں آسِن سوچیں ہا

سیجھ پُھلیں دی کائنی پینڈا عشق دا ہے

پیریں دے وچ چھالے پوسن سوچیں ہا

جیڑھے پیر ڳولیندن ساݙا پاݨی وچ

دِل دے کائناں جانی بݨسن سوچیں ہا

پکھئیں تے پردیس دا عتبار کیہاں

کہیں ویلے وی اُݙرئے ویسن سوچیں ہا

کئی نی سہندا گھاٹے اعظمؔ یاری دے

بدنامی دے ڈھول تاں وڄسِن سوچیں ہا

حوالہ

کتاب احمد پور شرقیہ اِچ سرائیکی غزل دی ٹور، مصنف : عبدالباسط بھٹی ، ناشر : جھوک پبلشرز ، ملتان