محرم

9محرم کوں  وستی دے سارے لوک غستان ویندن ، قبریں لپیندن ، قبریں  کوں  بݨا جوڑ تے نواں  کریندن ، قبریں  تے پھل ، خجی ، بھوترے تے کچی دال سٹیندن ، فاتحہ پڑھدن ، قرآن خوانی تھیندی ، ݙاݙی تے اماں  اللہ وسائی9محرم کوں   نذر اللہ نیاز حسین سُجی پکیندے ہن ، سُجی سانگے ابا سئیں  ڳری ، کشمش ، بادام تے پستہ وغیرہ گھن اَمدے ہن ۔ ہر کوئی اپݨی اپݨی پسند دیاں  شہیں  پکوا اَمداہا ، حلوہ ، سیویاں  ، جیوڑے ، مِٹھے چاول ، چارھے چاول ، مٹھائی ، پھل فروٹ ، شئیں  دے ڈھگ لڳ ویندے ہن ، قبریں  لنب تے سارے وݙی ڄال تلے آ ویندے ہن ۔ مولوی صاحبان اَدھ ءِچ ٻہندے ہن ، ہر کوئی طعام اڳوں  سور ݙیندا ہا ، قندوریاں  لہا تے مولوی صاحب جھات مریندا ہا ، چنگی شئے اپݨے سامھے ، ختم شروع تھی ویندا ہا ۔ دُعا منگ ، طعام کھاوݨ دی بسم اللہ ، شئے مٹھائی ، پھل فروٹ ٻالیں  ءِچ ویلہا ݙتا ویندا ہا۔نانویں  تے ݙاہویں  دیاں  مجلساں  پڑھیندیاں  ہن ،مٹھے پاݨی دیاں  سبیلاں  عام ہوندین۔

حوالہ

کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان