محبت دا جادو

جیکر روز حشر ساری دنیا دے سامنڑے اے ڈسایا گیا جو توں میڈی محبت ہویں، تاں سارے لوک کھلسن، میکوں پرواہ کینی، صرف اتلی پرواہ ہے جو تیکوں پتہ لگنڑ دے بعد توں نراض نہ تھی ونجیں۔ میں تاں صرف تیکوں نراض تھیونڑ دے ڈر کولوں رج کے ڈیھدا وی نمہیں، لوک مختلف امکانات بارے سوچیدے ہوسن، سارے فلسفے، ساری شاعری، ساری موسیقی، آرٹس اتے تمام لائبریریاں تیں ریسرچ سنٹرز اچ کائنات دی گھاڑت ایندے سموتھ فلو، ایندے ممکنہ حادثات اتیں بحث کریندے ہوسن، لیکن میڈی کیفیت میکوں اتلا سوچنڑ دی اجازت ڈیندی ہے جو میڈی محبت دے اظہار کنوں پہلے تیکوں میڈے نال محبت تھی ونجے، اتے توں اوندا احساس میکوں ڈیواویں، میڈی سبھ توں وڈی خوشی شئیت ایہا ہوسی، میں تاں تیڈی تعریف وی نئیں کریندا، متاں تیکوں محسوس تھیوے جو ایں تعریف دیاں لہراں دے وچ کتھائیں محبت دی چمکدی پینگھ نشابر ہے، میں تاں تیڈے متھے کوں لگدی دھپ کوں آپ دو آندیں ڈیھداں، تیڈے بت نال لگ تے آونڑ آلی سوہنڑی ہوا اچ ہک اینجھی خشبو محسوس کرینداں جینکوں ڈسایا نئیں ونج سگینداں، تیڈے سوہنڑے ہونٹاں توں نکھتے لوظ کائنات اچ معلق تھیونڑ دی بجائے میڈے دماغ دے پروسیسر اچ اڑ ویندن، میڈا دماغ انھاں لوظاں کوں جوڑ جوڑ تے روز سمھدیں ویلھے ہک یونیورسٹی بنڑیندے، جیندے اچ کائنات دیاں گوڑھیاں بھنوالیاں کھاندین ودیاں، تیڈے اکھیں دی ویڈیو کائنات دے ذرات تیں ثبت تھیونڑ دی بجائے میڈیں اکھیں دی دھرتی اچ ضم تھی کراہیں ہک نویں وسوں دی سنجاپ کرویندی اے، تیڈیں پیپلیں دا جھمکنڑ میڈے واسطے ویلھے کوں درجات اچ تقسیم کر ڈیندے، پچھیں میکوں کہیں وقت دی سدھ نئیں رہ ویندی، اے سبھ میں پہلے ہک افسانے دے بارے سمجھدا ہم، جیندا وجود میڈی ذہن اچ نئیں رہیا، تیں اوندی جاہ سنبھمال گھدی ہے۔ اے میڈی مستی دی رمز دا اعلان ہے، جو تیڈے بارے کوئی بیا ایویں نہ سوچے۔ مظہر حسین