محاصل دی وَنڈ تے پاکستانی آئین

ہک اخباری اطلاع دے مطابق پاکستان دے صدر صوبیاں دے درمیان محاصل دی نویں سروں تقسیم دا اعلان کیتے ۔ اُنہاں ایں موقعے تے ریڈیو تے ٹی وی دے ہتھڑیکے قوم نال خطاب وی کیتے ۔ تقسیم دے اعلان دے نال آکھیا ڳے جو صدر کوں آئین اختیار ݙتے جو صوبیاں دے وچکار جیکر محاصل دی تقسیم تے وَنڈ وِلھا اُتّے جھگڑا جھیڑا ہووے تاں پاکستان دا محصولات تے ٹیکساں دی آمدݨ کوں اپݨی مرضی مطابق کئیں دا حق مارے مُتّوں تقسیم کر ݙیوے ۔ جے تئیں صوبے آپ وَل ہک ڳالھ تے ہک مُٹھ نہ تھیسن او تئیں محاصل دی ایہا ونڈ برقرار رہسی۔

پاکستان دے 1973ء دے آئین لوکاں دے مسئلیاں دے حل کیتے ہر مسئلے دا حل ݙسّے۔ آئین پاکستان دی مقدس کتاب تے دستاویز ہے ۔ایں آئین دی حفاظت وزیر اعظم ‘ صدر ‘ کمانڈر انچیف اَتے ٻنہاں سیاستداناں تے ذمہ دار لوکاں اُتّے فرض ہے ۔ میںسُچیندا پیاں ہم جیکر آئین اِچ صدر کوں ایہ اختیار نہ ݙتّا ڳیا ہوندا تاں وَل ٻہوں وݙا جھیڑا پیدا تھی کے چلدا رہندا۔ اخبار آہدے جو صدر ہک آئینی ضرورت کوں پورا کرتے آئین کوں اُچیرا تے سُچا کر کھڑائے ۔ اَڄ آئین وی سرخرو ہے اَتے پاکستان دا صدر وی ۔ اَڄ ایہا ڳالھ پڑھ کے میں ٻیٹھا ہم جو میکوںگِھل آ ڳئی ۔ میں سُݨیا جو میݙی کنڈ پچھوں رووݨ دی آواز آندی پئی ہے ۔ میں ݙٹھا جو ہک 33/32سال دا جُؤان دُھولے نال لڳا روندا ٻیٹھے ۔اوہ نوجوان پَھٹو ݙک ہا ۔اوندے جسم اُتّے کپڑیاں دی جاء لیراں لٹکدیاں پیاں ہَن ۔

میں پُچھیا تُوں تاں سیاݨاں تے ڳبھرو جؤان ہِیں۔ روندا کیوں پئیں؟ تیکوں کئیں زلل ݙتے ؟۔ ݙس جو میں تیݙی مدد کراں یا ہومن رائٹس آلیاں کوں فون کراں۔

آکھݨ لڳا جو میں پاکستان دا آئین ہاں جیکوں 12اکتوبر 1999ء کنوں پیراں ہیٹھ لتاڑیاں ویندا پے ۔ میݙی جان تے جُسّہ پَھٹو پَھٹ ‘ کپڑے لیراں کتیراں ‘ روح ݙکھی ‘ ہاں اوکھا  ‘ دِل مُٹھ اِچ ‘ جنگھاں لُولھیاں ‘ ٻانہیں تُرٹّیاں ہوئیاں ہِن وَل وی اعلان ایہو کیتا ویندا پئے جو اَساں آئین دی حفاظت کریندے پئے ہیں اَتے محاصل دی تقسیم آئین دی رو نال کریندے پئے ہیں۔

ڳبھرو جؤان دی حالت ݙیکھ کے میں ٻہوں ارمانی تھیئُم ۔ اَکھ کُھلی تاں کارپٹ تے ڈٹھا پیا ہَم اَتے نہ پَھٹّل جُؤان ہا نہ اوندی کُئی اَواز ہئی۔ میں سوچیا جو میںایں جُؤان کیتے کیاکر سڳدا ہَم۔ چنگا تھیا اوہ ہک خواب ہا ۔ پر ذہن اِچ اخباری خبر تے ٹی وی دی تقریر دا خیال آیا ۔ پر اَواز آئی :

واہ ری مئی لالو ‘ آپ وی ڳلیئوں اَتے ٻنہاں کوں وی ڳالئیو۔

(ݙینہ وار جھوک ملتان وچ 18۔جنوری 2006ء کوں چھپیا)

حوالہ

کتاب: گِروان ہووے تاں. دھرتی واس : رانجھݨ ملتانی. چھپیندڑ: جھوک پبلشرز ‘ ملتان