مجو ملنگ

مجو ملنگ ساڈے وسبے دا ہیک کیریکٹر ھے جیرھا ٹک ٹاک تے سوشل میڈیا تیں اجکل کافی پاپولر ھے۔ اے کیریکٹر اپݨے آپ اچ ایں وسوں دا ڈی این اے ھے۔ مجو بکریاں چریندے، ساوی پیندے تے نال گاوݨ شاوݨ وی ڳا گھندے۔ ہیک کُہاڑی تے نال ہیک پاݨی دی بوتل جیندے اچ پاݨی گھٹ تے نماݨی ٻوٹی دا اتت زیادہ ہوندے۔ پُراݨی چپلی پیریں اچ پا چولے دے بٹݨ کھول کے اپݨی وسوں اچ بکریاں چریندا رہ ویندے۔ اوندا تعلق ہیٹھلی ذات برادی نال ھے جیرھی زیادہ تر امن پسند دی اپݨے کم کار اچ رُدھی رہ ویندی ھے۔ ساݙی وسوں اچ ذات پات دا پُراݨا اݙاݨ اج وی کہیں نہ کہیں شکل اچ موجود ھے۔ ایں ذات پات آلے ایشو کوں چھوڑ اساں مجو ملنگ دے کرتَو کوں ڈسکس کریندے ہیں۔

مجو راول دے کٹھے رل کم کریندے تے راول اوندیاں ویڈیو سوشل میڈیا تیں چڑھیندے اساں اُنہاں ویڈیو کوں ڈیکھ کے مجو دے سونہیں تھائے ہیں۔ مجو جیویں جیویں مشہور تھیندا ویندے اوندی فین فالونگ وی ودھدی ویندی ھے۔ سوشل میڈیا دی دُنیا دے اپݨے رنگ ہن ، اپݨے سُکھ تے اپݨے ڈُکھ وی ہن۔ انہاں ویڈیوز کوں ڈیکھ کے میں تاں ایں وسوں دی پُراݨی روح کولوں سونہا تھیاں او روح جیرھی کئی صدیں کولوں کالونیلزم تے اوپرے لوکاں دے قبضے پاروں ہیک اینجھی دفاعی پوزیشن اچ ھے جیکوں سرائیکی اچ آہدن " چھاؤ مار ڳئی ھے".

مجا پولیس کولوں ݙردے، لِفٹ کولوں باہوݨ کولوں کتراندے، ٻس اچ چڑھݨ کولوں پچی پوندے، وݙے شہر اچ ݙو ݙیہنہ کولوں زیادہ رہ نئیں سڳدا، ٹوٹیں آلے واش روم اچ اوکوں وݙا چھوٹا پیشاب اویں نئیں آندا جیویں کُھلے اچ آندے۔ میں اوندی ہیک ویڈیو ڈیہدا پیا ہامیں جیندے اچ راول اوکوں اسلام آباد گھن ڳئے تے اُتھاں او ہیک مساج سینٹر اچ ڳئے ودے ہن تے اُتھاں ملنگ کوں ہیک اینجھی چئیر تیں بِلھا ڈتا ہنیں جیرھی مساج کریندی ھے۔ مجا اوتھاں ٻیٹھے تے او چلݨ لڳی ھے تے مجا ݙر ڳئے، اوں جونہی ڄلول شروع کیتے مجا ٹپ مار کے لہہ کھڑے، پروں ہیک شہری بندہ سکون نال اوں چئیر تیں مساج کروائی پیا ہا او مجو دی اے حرکت ݙیکھ کے کِھل پائے تے مجا شودا ݙرا وی کھڑا ہووے تے کِھلدا وی کھڑا ہووے۔ مجے دی ایں حرکت یا ایں سٹریٹجی کوں پرلے شئیت پسماندگی سمجھا ہووے۔ تے اوندے زہن اچ ایہو ہی آیا ہوسی جو اے بے وقوف پتہ نئیں کتھوں آ ویندن۔

اے ہیک مائینڈ سیٹ ھے " بے وقوف پتہ نئیں کتھوں آ ویندن". اے مائینڈ سیٹ دراصل تل وطنی چیزاں، وزڈم تے اُتھوں دے راہوݨ ساہوݨ دے انداز کوں نکارݨ دا تے اپݨے آپ کوں سُپرئیر سمجھݨ دا او طریقہ ھے جیرھا تل وطنی لوکیں کوں ہیک سسٹمیٹک لُٹ تے چوری کوں جواز ڈیوݨ دے ہاروں پسماندگی دی تُہمت لا اُنھاں کوں بے دخل کر چھوڑیندے۔ اصل اچ جݙاں وی ٻاہر دا قبضہ گیر ہا کالونیلسٹ کہیں وسوں اچ ویندے تاں او اپݨے کلچر، آوزار، تے لُٹ دی سوچ وی گھن کے ویندے۔ کاراں، سڑکاں، بساں، چمکدے دمکدے تلکݨے واش روم، شیشے دے تھاں، چمچے کانٹے، بتیاں ، اے سی ، کھاوݨ پیوݨ آلیاں بدیسی ڈِشاں سب کُجھ او اپݨیں سہولت تے نفعے سانگے ورتیندے۔ تے تل وطنی ہر چیز کوں گھٹیا تے ناکارہ سمجھنیدے ۔ اُتھوں دی ٻولی، ثقافت، وزڈم سب چیز بے کار تے ناکارہ۔۔! اوں ٻاہر دے بندے کوں اے اندازہ ہی نئیں ہوندا نہ اوندی ایں قسم دی تربیت ہوندی ھے جو " مجو ملنگ دی روح" کوں کیا چاہیدی او کیویں خوش رہ سگدی ھے۔ اوکوں اے نئیں پتہ ہوندا جو مجو دیاں بکریاں خوش ہن تے مجو خوش ھے، بکریں دا چرا چنگا ھے، اوندے بکریں چرݨ واسطے زمین ھے ، گھا ھے، وݨ پودے ہن تاں مجو مست ھے، بلکہ اونہاں کوں او زمین وی اپݨے نفع واسطے چاہیدی ھے جِتھاں مجو دیاں بکریاں چردن، اُنہاں کوں او وݨ وی نفع وی واسطے چاہیدن نیندی چھاں ہیٹھ مجو تے اوندیاں بکریاں بہہ کے سکون محسوں کریندن اُڳل ولیندن تے مجو وݨ دی چھاں تیں سُم کے او نندر کریندے جیرھی کہیں ای سی آلے کوٹھے اچ آ ہی نئیں سڳدی۔۔! اُنہاں کوں ایں گالھ نال ہی کوئی غرض نئیں جو مجو ساڳ تے کھیر نال روٹی سُرک کے کتنا صحت مند تے خوش تھیندے، بلکہ او کھیر وی مُل گھن کے شہر اچ کیمیکل رلا ، پاݨی گھت ویچ کے نفع کماسن، اُنہاں واسطے اے زیادہ مہذب پن تے قابل فخر گالھ ھے جو او کھیر دا ہیک وݙا کاروبار کھڑا کر گھنن۔ اونہاں کوں اے پتہ ہی کائینی جو ساڈی وسوں اچ اج کولوں پندرہ ویہہ سال پہلے کھیر ویچݨ گُناہ سمجھا ویندا ہا، وݨ مارݨ پاپ ہوندا ہا تے چھاں ویچݨ دا کیا مطبل ہوندا ہا۔۔او بس ایں گالھ کوں ڈیکھ کے ساڈے بارے رائے پسماندہ ہووݨ دی رائے قائم کریسن جو اساں کہیں لِفٹ تیں چڑھدیں ہوئیں ڈردے ہیں ، کہیں ڈش کوں کھاوݨ واسطے کانٹیں چمچیں دا استععمال نسے کریندے ، یا ساکوں کہیں مساج آلی کُرسی تیں باہندیں ݙر لگدے۔ اوپرپ تے کالنئیلزم ہمیشہ اپݨے سیٹ کیتے سٹینڈرڈ تیں تل وطنیں کوں پرکھیندے تے ول اُنہاں دے بارے رائے قائم کریندے۔ تے آہستہ آہستہ اپݨے مائینڈ سیٹ تے چیزاں دے استعمال کوں سسٹمائز کر کے تل وطنیاں کوں اپݨی وسوں اچوں بے دخل کریندے۔ ایندی ہیک شاند ساکوں مارکیز گارشیا دے ناول " تنہائی دے سو سال " اچ ملدی ھے جݙاں ماکونڈو قصبے اچ جپسی آندن تے او اپݨے نال اینجھیاں چیزاں گھن کے آندن جیرھیاں اوں قصبے دے لوکاں کائینا ڈٹھیاں ہن، او خوشحال قصبہ اہستہ اہستہ باہر دے لوکاں دی آماجگاہ بݨ ویندے تے اوںدے اچ ، چرچ ، مونسپل کمیٹیاں تے ڈوجھے سرکاری ادارے وی آ ویندن تے او لوکاں کوں ہیک سرکاری سسٹم تے اپروچ مطابق پابند کریندن جیندی وجہ کولوں پورا قصبہ بربات تھی ویندے، خوشی، امن تے دِھرتا ویندی تھیندی ھے تے اوندی جاہ جنگ، قتل و غارت تے شدید قسم دی تنہائی اوں قصبے دا مُقدر بݨ ویندی ھے۔

مجو فقیر دیاں تُساں گالہیں سُݨو تے اندازہ تھیندے جو اساں متشدد سوچ، سسٹمیٹک لُٹ، سراب قسم دی ڈویلپمنٹ تے ریاستی بندوبست کتنے خوف زدہ تے آوکھے تھیندے ہیں۔ ساکوں پکی سڑک کولوں جنگل اچ مال دے پیریں نال بݨے کھاڑے زیادہ بھاندن، ساݙے مال ݙنگریں دے اجڑ نام نہاد اوپرے " مہذب " لوکاں دے اجڑ کولوں زیادہ قیمتی ہن، ساݙے کیتے کہیں نیسلے کمپنی دے پاݨی کولوں زیادہ چسولا ساݙے دریاویں تے بارش دے ٹوبھیں دا پاݨی ھے، شہر دے شور تے ٹریفک دی پی پاں کولوں ، ساݙے مال دے چݨکیں دی آواز ، ساݙے پکھیں دے گیت، ساݙے اجڑ دے ٹُرݨ دا شور زیادہ سکون ݙیوݨ آلا ھے، تُہاݙی پُراݨی تے مہانگی شراب کولوں ساݙی نماݨی ٻوٹی کئی گُنا زیادہ بہتر ھے، تہاݙے ماڑیں تے قیمتی فرنیچر کولوں کہیں بند دی لٹھ تیں کہیں ڈھورے دی ریت تیں کہیں وݨ دی چھاں تیں نِندر کرݨ دا آنند کئی گُنا زیادہ ھے۔ تُساں اوپرے کیا ڃاݨو ہیک تل وطنی اپݨی وسوں دا حصہ کیویں ہوندے، اوندی روح ، وسوں دی روح نال رل کیویں جُھمراں پائندی ھے، اپݨی وسوں دی ہوا، ݙوا، ساوݨ دے مہینہ، چیتر دی مستی تے پوہ دی بھاہ دا کیا مطلب ھے، رات کوں نیلے ہُنب اسمان تیں چمکدیں تاریں کوں اساں کیویں راہ رستے تے ٹائم ڈیہدے ہیں، چاندݨی رات اچ کہیں ٹٻے تیں بہہ گاوݨ دا کیا چس ھے، تُساں کیا ڄاݨو جو ساوے چݨے دی بھاجی، بھوئیں ݙٹے تے کُھمبی پکاوݨ دی لذت کیا ھے، جوار دے مٹھے ڳنے، آبھوں دے بھت، گُگھریاں، تے ٻیر تیں ٻیٹھی ماکھی دا سواد کیا ہوندے۔۔! تُساں تاں ہیکو کم کیتے جو انہاں ساریاں چیزاں کوں مُکا کے اپݨے بے کار وزڈم تے فلسفے نال مزید تباہی کریندے ویندے ہاؤ۔ ساݙا مجا ملنگ اج وی تہاݙے نام نہاد تے " مُہذب " ماھݨوں کولوں زیادہ خوش تے سیاݨا ھے، کیوں جو او پراکرتی دی عزت کریندے تے اوندے نال جیندے۔ مجے دی وجہ کولوں اجتک کہیں ہیک ماھݨوں یا پراکرتی کوں نقصان نئیں تھیا ، ایہہ ایں وسوں دی روح ھے جیکوں تہاݙے اوپرپ تے قبضے گیر نفسیات نے لہو لہاݨ کر سٹئے۔۔!

تحریر: ذلفی