متاں اسے ڳݙی تے
ایہ سرائیکی دا مشہور لوک گیت ہے.
خط لکھاں تے لکھ کے میں پاڑ ݙیندی ہاں
کنڈی کھولاں تے کھول کے میں چاڑھ ݙیندی ہاں
متاں اسے ڳݙی تے آ جاویں
پاواں سرما تے کدی سک ملدی پھیراں
وے میں چوݙویں دے چن وانگو ٻلدی پھیراں
متاں اسے ڳݙی تے آ جاویں
وے میں بانگیں ککڑ پکا رکھ ساں
نالے دیسی گھیو روٹیاں تے لا رکھ ساں
متاں اسے ڳݙی تے آ جاویں
بتی ٻالاں تے ٻال کے میں ٻجھا ݙیندی ہاں
تارے ڳݨ ڳݨ رات میں لنگھا ݙیندی ہاں
متاں اسے ڳݙی تے آ جاویں
مہندی لاواں تے لاء کے میں دھو لیندی ہاں
کدی ہساں تے کدی میں رو لیندی ہاں
متاں اسے ڳݙی تے آ جاویں
پاݨی بھرنا وی اڄ مینوں بھل ڳیا اے
سارا بھید میرا سیاں اڳے کھل ڳیا اے
متاں اسے ڳݙی تے آ جاویں
چولا دھو کے تے تار اتے پاندی پھیراں
نالے گیت تیرے آوݨ دے ڳاندی پھیراں
متاں اسے ڳݙی تے آ جاویں
بتی ٻالاں تے ٻال کے میں ٻجھا ݙیندی ہاں
تارے ڳݨ ڳݨ رات میں لنگھا ݙیندی ہاں
ٻس اسے ڳݙی تے آ جا توں
ٻس اسے ڳݙی تے آ جا توں