ما ٻولی دی عزت

ماء بولی دی عزت ۔

سن 1995 دی ہک شام میکوں استاد صاحب اپڑیں گھر سڈیا میں اوں وخت وکالت دی الف بے سکھدا ودا ہم میں جیڑھے ویلہے حاضر تھیم تاں استاد صاحب کیس فائل دے مطالعے وچ رجھیل ہن میکوں بہنڑ دا اشارہ کر تے اپڑیں بال کوں سڈ کیتو نے بال حاضر تھیس استاد صاحب اونکوں اڑدو وچ چانہہ پانڑیں دا آکھیا۔میں استاد صاحب کوں عرض کیتم سئیں گھر وچ ماء بولی کائینوے آلیندے استاد صاحب کوریج تے میں ڈوں ڈٹھا تے آکھیو نے توں بس کر اے اپڑیں سرائیکی سرائیکستان ۔سرائیکی آلاونڑ نال بالیں دا لہجہ خراب تھی ویسے آتے تعلیم وچ وی حرج تھیسے۔ توں فائلاں چاء تے روانہ تھی۔ وخت گزردا گیا سن 2009 دی گالھ ہے چیمبر دے اگوں لنگھدئیں میں استاد صاحب اس کیتا میں حاضر تھیم تاں چیمبر وچ اہو بال وکیل بنڑ تے بیٹھا ہا استاد صاحب میکوں الوا تے آکھیا منور توں ای۔دے نال سرائیکی آلایا کر میں گال دا انت نہ لدھم۔ استاد صاحب بال کوں چانہہ پٹھنڑ دا آکھ تے اتلے چیمبثڈوں ٹر پے میں انہاں دے پچھوں پوڑیاں چڑھ گیم ۔ استاد صاحب کرسی تے بہہ تے میڈے اگوں ہتھ چا بدھئیے اکھیں وچ پانڑیں آگیونے تے آکھیونے منور تو سچا۔ میں عرض کیتم سئیں گال نرخری کرو سمجھا نہم ۔آکھیو نے تیکوں یاد ہے تئیں ہک ڈینہہ میڈے بالیں کوں ماء بولی سکھاونڑ کہتے تئیں میکوں آکھیا ہا پر میں تیکوں دڑکا ڈے چپ کرا چھوڑیاہم۔میں آکھیا یاد ہے سئیں ایہو بال ہا تہاڈا۔پر ہنڑ کیا ہے۔ آکھیونے ہک ڈینہہ میں تے میڈی گھر آلی کہیں گال تے ہک بئے نال سرائیکی وچ جھگڑ پیوسے اچیتا کتھوں اے میڈا بال آگیا اینکوں ساڈی گال سمجھ نہ آئی تاں ایں آکھیا آپ کس بے ہودہ زبان میں بات کررہے ہیں اردو میں بات کریں تاکہ مجھے بھی سمجھ آئے ۔بس اوندا اے آکھنڑ ہا تے میکوں سارا جھیڑا وسر گیا تے میکوں تیڈی گال یاد آئی تے سوچیم جیکر میں بال کوں ماء بولی سکھاواں ہا تے اج اے میڈی ماء کوں مندا نہ آکھے ہا ۔میں منینداں جو میں غلط ہم ۔(منور ضیا، ٢١ فروری ١٩)