مایوس رویے

میݙے خیال اِچ سبھ توں مایوس کن لمحات اَتے رویے قل خوانی اُتے ݙٹھے ونڄ سڳدن، ڈھٹھے دِل نال ہر کوئی کم کریندا پیا ہوندے کیونجو دِل کوں پتا ہوندے جو ونڄݨ آلا ولا نی وَلݨاں ، ناہی تھیوݨ آلا گھاٹا پورا تھیوݨے ، وَت وی لوکیں دے ݙکھالے کیتے سبھے کم کریندن ۔ ایہ او رویے ہِن جتھاں سبھ مُک ویندے ، سرائیکی اِچ مثال ݙتی ویندی اے فلاݨے دے قُل کرتے آئے ٻیٹھوں ، یعنی سبھ کجھ مُکا تے آئے ٻیٹھوں ۔ مایوسی آلے روئیں دی مثال ایں چا ݙیووں جو ہک مزدور ہے جیکوں شام دے ویلھے تئیں مزوری نی ملی او خالی ہتھ ،خالی کھیسے ، خالی دماغ ، خالی سوچیں دے نال نا اُمید اَتے ٻوجھل مݨ مَݨ دے پیر محسوس کریندے ۔ خالی سفر کر تے گھر آلے پاسے ، لہندے سِجھ آلی کار ہولے ہولے ٹُردا پیا ہوندے ۔ اوندے خالی اَتے مایوس دماغ اِچ کوئی شے آندی وی ہے تاں او گھر اِچ نچدی بُکھ اے۔ ذال دیاں کھا ونڄݨ کوں تیار اَکھیں اَتے ٻالیں دے سوالیہ منہ اِنھیں ساریں سوالیں دا جواب اُوں کنوں کائنی او بس ایہ چاہندے جو زمین وات پٹے تاں میں وڑ ونڄاں ، مایوس بندے دی ایہ کیفیت ہوندی اے جو اپݨے آپ اَتے ٻنہاں کنوں او فرار چاہندے ، ایہو جہیں حالات اِچ کجھ لوک بھٹک ویندن ، رستے توں ، اَتے غلط رستے اُتے ٹُر پوندن ۔ کجھ اللہ سئیں کنوں مَدد منگدن ، کجھ حالات کنوں مایوس تھی تے عجیب حرکتاں کریندن ، اساݙے ہک ہمسائے کوں ہک چور ہمسائے چوری خود کر تے اُوں شریف بندے کوں پکڑوا چھوڑیا جو ایں چوری کیتی اے ، پولیس آئی تاں اوں غریب بندے کوں پکڑ ڳئی ۔ او شریف بندہ شودہ حیران پریشان ہووے جو ایہ کیا تھی ڳئے میں تاں چوری نی کیتی ، پولیس پُچھیا ! ہاں بھئی چوری تم نے کی ہے؟ (ہا بھئی چوری تیں کیتی اے؟) اُوں شودے اَݨ پڑھ کوں اُردو تاں نہ آندی ہئی آکھݨ لڳا ۔ جناب کے حضور کے مہاجر کے شہتیر کے کہیں ٻئے چا گھدا ہے گا ۔ ناں میݙا گھدا ہے گا۔(جنابِ والا ! حضورِ والا ! مہاجر دا شہتیر کہیں ٻئے چا گھدے اَتے ناں میݙا گھندا پئے) ۔ امی ہوریں دے ماما جی چیئرمین ، ذیلدار ہَن اُنھاں ونڄ تے اوں غریب دی گواہی تھاݨے اِچ ݙتی جو ایہ شریف بندہ میݙا غریب ہمسایہ ہے میݙی ضمانت اُتے ایکوں چھوڑ ݙیوو۔پولیس آکھیا میاں صاحب گھن ونڄو ، انھاں اصل چور پکڑ تے ایکوں چھوڑ ݙتا ۔ نہ تاں مایوس تھی تے شودا ناحق دی سزا پاوے ہا ، پچھلے مہینے ساݙی ہک مس کوں حادثہ پیش آیا او رکشے توں ڈھہ پئی، ٻال اُنھاں دے نال ہَن ۔ سکول کنوں واپس ولیئے ویندے ہَن ، رکشے کوں ٹرک دی ٹکر لڳی اَتے ساریاں سواریاں رکشے اِچوں اُچھل تے سڑک تے آ ڈَھٹھیاں، مِس ایں حال اِچ آہدے پئے ہَن میݙے ٻالیں کوں تاں کجھ نی تھیا؟ اِنہاں کوں تاں بچا گھنو ، خیر اللہ سئیں ٻالاں کوں اپݨی حفظ و امان اِچ رکھیا ، پر مس شدید زخمی ہَن ، ڈاکٹریں آکھیا انھاں دے بچݨ دی 70فیصد اُمید کائنی ۔ خیر کجھ ݙینھ ہسپتال رکھ تے اُنھاں کوں گھر گھن آئے ، زیادہ تکلیف تھیوے ہا تاں نشے دا ٹیکہ لا ݙیندے ہَن ۔ ڈاکٹریں آکھیا ہݙیاں ایں طراحویں تُرٹین جو آپریشن ممکن کائنی ، میں وی اَتے ہر کہیں آکھیا مایوسی تاں گناہ اے ، مسلمان رب دی رحمت کنوں مایوس نی تھیندا ، تساں جو کرو دُعائیں کرو ، رب کنوں مَدت منگو مایوس نہ تھیوو، ہر کہیں خوب دُعائیں کیتیاں ، نتیجہ ایہ تھیا جو مایوسی اُمید اِچ بدل ڳئی ، اَج او ہولے ہولے ٹُر گھندن ، رب اُنھاں دے ٻالاں دی سُݨی اَتے معجزہ تھیا ۔انھاں کوں صحت یاب تھیوݨ دا ۔ ایویں ساݙی ہک ہمسائی ٻال نہ تھیوݨ اُتے مایوس ہئی ، امریکہ تئیں اوندیاں رپورٹاں دا جواب ایہو آیا جو ایہ ماء نی بݨ سڳدی ، رب تعالیٰ راضی تھیا اُنھاں دی مایوسی اُمید اِچ بدل ڳئی اُنھاں کوں اَج تئیں ترائے ٻال عطا کیتے ہِن، رَب سئیں اوں ذات پاک دی ’’کُن‘‘ آکھݨ دی دیر اے ہر مایوسی اُمید اِچ بدل ویندی اے او ذات شہ رگ توں نیڑے اے ، خودفرمیندن اِݨ نحنُ اقربُ مِن حبل الورید(ترجمہ: بے شک اساں شہ رگ کنوں وی نیڑے ہیں)ایہ اساݙا ترجمہ اے کئی واری اساں ٻہوں مایوس اَتے مجبور ہوندوں وَت ایں لڳدے دنیا مُک ڳئی اے ساݙے کیتے ، اساکوں اپݨے مسائل دا کوئی حل نی نظردا ، دنیا اُتے اندھارا نظردے ، پر جئیں اساکوں پیدا کیتے اوں اساکوں تسلی ݙے تے بھیڄئے جو مَیں آپ تہاکوں ستر ماواں توں ودھ پیار کرینداں، کوئی نی جیرھا اوندی رحمت دا مقابلہ کر سڳے۔ اچانک اندھارے اَتے مایوسی دی حالت اِچ رب سئیں آپ اِی اُمید دی کرن پیدا فرمیندے اَتے انسان دی آزمائش مُک ویندی اے ، اونکوں ساریں ہی مایوسیاں اندھارے بھل ویندن ، کیو ںجو ہک نویں سویر ، بہار اَتے زندگی اونکوں خوش آمدید آکھݨ دی منتظر ہوندی اے ، اَتے ہر رستہ ہر منزل اونکوں اپݨے نال کِھلدی نظردی اے۔

حوالہ

کتاب: رَلے پندھ کریسوں ، مصنّف: زاہدہ اجمل ہاشمی، چھاپہ خانہ : جھوک پرنٹرز‘ ملتان