ماہیئے

سرائیکی علاقے وچ ماہیے زیادہ تر کبیر والا تے تلنبہ دے علاقے وچ ڳائے ویندن ۔ ماہیے دا پہلا مصرعہ اکثر مہمل ہوندے ۔ ݙوجھے مصرعاں وچ پوری ڳالھ سرے لاتی ویندی ہے۔ اے صنف وی اپݨے وسیب دیاں رسماں ریتاں ۔ ݙکھ سُکھ ‘ رنج رسماں تے انسانی رشتیاں دے ورتاوئیاں دے بیان وچ ٻہوں اڳوں ہے۔ ٻہوں قدیم صنف ہے ۔ ہِیں کیتے بعض ماہیے ایجھے وی ملدن جناں وچ اڳلے وقتاں دے تاریخی معاشرتی سماجی حوالے لبھیے ونڄ سڳدن:

کوٹھے تے کھیس پیا

ہک دم سڄݨاں دا

او وی لݙ پردیس ڳیا

باغاں وچ گھا کوئی نی

جیڑھے پاسے ماہی ٹُریا

اُوں پاسے دا راہ کوئی نیں

ڄنگھ بھنی اے ݙوڈر دی

اوہا کندھی ڈھے پووے

ساݙے سڄݨاں دے اوڈھر دی

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان