ماں ٻولی، ہک امانت (شبیر لغاری)

وڈکیں کولو ملیاں ہویاں وسیب دیاں ریتاں، ستراں اتے ما بولی کہیں وی وسیب، علاقے یا ملک دے واسیں کیتے ہک امانت ہوندی ہے جیرھیاں ہر نسل حیاتی دے گزرنڑ دے نال نال پوری ایمانداری ورتیندیں ہوئیں پہلے کولو چنگاں کر کیں ننڈھی امیں دے حوالے کرڑیاں ہوندین۔ اساڈے بزرگیں الیکٹرانک، پرنٹ میڈیا اتے تعلیم دی کمی دے باوجود اے امانت پوری ایمانداری نال اساں تئیں پچائی ہے۔ سرائیکی شاعریں تے دانشوریں ما بولی کیتے اتے وسیب دے محرومیں کوں دور کرنڑ سانگے بلاشبہ بے پناہ محنت کیتی ہے تے قربانیاں ڈتن۔۔۔

لیکن کجھ نام نہاد دانشوریں چند ٹکیں دی خاطر """ ککڑ باز ""چرسی ڈھولے "' رنگے کرداریں کوں پروموٹ کیتے جنہیں ساڈے وسیب ریتیں آتے ما بولی دا ہک وگڑیا چہرہ پیش کیتے۔۔ جیندی جتنی مذمت کیتی ونجے گھٹ ہے۔۔ انہیں ڈرامیں تے ٹیلی فلمیں اچ پیش کیتیاں ہویاں ریتاں اتے کردار ودیشی یا ول کہیں گوانڈھی وسیب دے تاں تھی سگدن ساڈے سرائیکی وسیب دے نئیں۔۔ ساڈے بزرگیں وسیب اچ حیا ، رکھ رکھاؤ ، رشتیں دا لحاظ تے مروت سکھائی ہے۔۔۔ تے اے لوک ننڈھی امیں کوں کیا پئے ڈیندن۔۔ افسوس دی گالھ اے ہے جو اے زہر وسیب دے پاڑھیں دو ہولیں ہولیں رسدا پئے۔۔

ایہو حال فن موسیقی دا ہے۔عجیب گالھ اے ہے جو موسیقی ہنڑ سنڑنڑ دی بجائے ڈٹھی ویندی ہے۔۔۔ کوئی اود پٹانگ مغربی سریں دے امتزاج اچ موسیقی اتے نیم عریاں لباس اچ کہیں خاتون تے فلمائی ہوئی سرائیکی موسیقی دی پھٹی شکل دی سی۔ ڈی مارکیٹ اچ پیش کیتی ویندی ہے۔۔ جیرھا سرائیکی زبان و ادب تیں موسیقی دی خدمت دی بجائے ایندے نال مذاق ہے۔۔ میڈی سرائیکی وسیب دے دانشوریں تے مہاندرے دوستیں کیں گذارش ہے جو اپڑیں کاروباری مقاصد دی خاطر اگر کوئی آلودہ ذہن ساڈے وسیب ریتیں اتے ما بولی کوں وگاڑ کیں نویں نسل کوں پیش کرنڑ دی کوشش کرے تاں او اوندی ہر جاہ تے حوصلہ شکنی کر کیں ایں خچ دے آگو بن بدھن ۔۔ اساں بزرگیں کیں ملی ہوئی امانت اچ اگر کوئی چنگاں ودھارا کر کیں ننڈھی امیں کوں نسے ڈے سگدے تاں ایکوں وگاڑ اتے آلودہ کر کیں وی نہ پیش کروں۔۔