ماکھی لہاوݨ
نِکے لاء جنگل اِچوں ماکھیاں لہیندے ہاسے ،ماکھی لہاوݨ دا ورائو قصائی ݙاڈھا ماہر ہا ، اُوندا ناں اللہ ورایا ہے تے ذات پنوار ، اُوں ویلے دی زبان ٻولیندا ٻیٹھاں ،کیوں جو اساں ایویں سݙیندے ہاسے ،اُونویں تاں اساݙا بزرگ ء ِ ، جیوے ہووے ہُݨ وی حال حیات ء ِ ،اساں ماماں سݙیندوں ، اُوندی اماں میݙے ابے دی بھیݨ بݨی ہوئی ہئی،ہک واری ورائو قصائی آکھیا جو ݙاݙے چھلو دے سڑک آلے کِکر اِچ وݙی ماکھی ٻیٹھی ءِ، ٻے کہیں کوں ڳال نہ کر آپاں چوری چور ی لہا اَمدوں ،اساں ٹُر پیوسے ، ورائو قصائی سوٹی کوں تھِگڑیاں ٻدھیاں ،کِکر تے چڑھ ڳیا ، تلوں کھڑ تے میں ݙٹھا ، وݙی ماکھی ہئی ،ایویں لڳدا ہا جو سارے گھوݨیں اتھائیں ٻیٹھن، ماماں ورائو مُونڈاسا ماری کھڑا ہا تے کپڑے نال ہتھ وِی لُکائی کھڑا ہا،نال ونڄ تے ماکھی کوں دُھواں ݙتُس پر گھوݨیں اُونکوں پئے ڳے،میکوں آکھیُس میں لڑی کپیندا پیاں ، تِکھے تِکھے چا گھنیں ،اُوں لڑی کپ تے تلے سٹی میں بھڄ تے چاوݨ پیُم ،اُوں کُہاڑی وی نال سٹ ݙتی،جہڑی سِدھی میݙے سِر ء چ لڳی،اُوݙوں اُونکوں گھوݨیں ݙنگی ویندے ہن ،تلوں میں لہو لُہان تھیا پیا ہم۔مامے ورائو سگریٹ آلی ݙبی ساڑ تے پھٹ آلی جھاہ تے کیری لاتی ،کپڑے نال رَت صاف کیتی ،ماکھی گھر چاڳیوسے ، وݙا مانہا ہا آر کپ تے شکلو کݙھیوسے ،مال نال کٹورہ بھریڄ ڳیا،ماکھی نپیڑ تے بچدا مانہا ورائو چا ڳیا جو میݨ بݨیساں ۔اَدھ کنوں زائد ماکھی اسیکوں ݙے ڳیا ۔میکوں تاں سِر اِچ کُہاڑی لڳی ہئی ،پھٹ والیں اِچ لُکیا ودا ہا، ٻے ڄہاڑے مامے ورائو کوں ݙٹھوسے سُڄا پُڄا ودا ہا۔اے ہا چوری دا انجام۔
حوالہ
[لکھو | ماخذ وچ تبدیلی کرو]کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان