ماڑی انڈس ریلوے ٹیشݨ

ماڑی انڈس ٹیشݨ، ضلع میانوالی، پاکستان اچ کوٹری-اٹک ریلوے لائن تے واقع ہے۔

تاریخ

ماڑی انڈس ٹیشݨ اپݨی خوبصورت تے قدیم طرز تعمیر تے تاریخی حیثیت دی بدولت پورے ضلع میانوالی اچ ہک منفرد مقام رکھیندا ہے۔ اگر ایہ آکھیا ونڄے کہ ایں شہر دی رونق وی ایں ٹیشݨ توں ہے تاں ایہ غلط کائناہوسی۔ قدیم چٹی عمارت، خوبصورت پراݨے طرز دے شیشے آلے دروازے تے کھڑکیاں، کاٹھی دیاں پراݨیاں بنچاں، سادہ پلیٹ فارم، کاٹھی دی اوچی پاݨی دی ٹینکی تے ریلوے دا پراݨا سامان، ایویں لڳدے کہ بندہ اسی یا نوے دی ݙہاکےاچ موجود کوئی دور دراز ریلوے ٹیشݨ ݙیکھدا پئے۔ ایندے ݙو اطراف اچ پہاڑیاں تے تھوڑے ہی فاصلے تے دریائے سندھ وہندا پئے۔ اتھاں جاہ جاہ مختلف پٹریاں وکھریاں ہوئیاں ہن۔ 1891ء اچ بݨائی ڳئی ایں دی عمارت ہݨ وی کجھ مرمت دے بعد ایویں ہی دلکش تے جاذبِ نظر ہے۔ ٹیشݨ دے ٻہوں سارے حصے ہن استعمال اچ کائنی تے انہاں کوں بند کر ݙتا ڳئے۔ کئی جاہیں تے ریل دے پہیے تے ٻیا سامان ضائع تھیوݨ دے کیتے چھوڑ ݙتا گئے۔ پہلے ایں تے صرف ہک ڳاݙیاٹک پسنجر آندی ہئی پر ہݨ دݙو نویاںٹریناں چلاوݨ دے بعد ایند ی رونق اچ کجھ اضافہ تھی ڳئے۔ ایں ٹیشݨ دی ہک ٻئی خاص ڳالھ ایہ ہے کہ ایں تے چوڑی تے تنگ پٹریاں دا ملاپ تھیندے۔ ایندے ہک پاسے چوڑی پٹری ہے جو ایں کوں لاہور نال ملیندی ہے جݙاں کہ ݙوجھے پاسے تنگ پٹری ہے جو ماڑی کوں کالاباغ، کمر مشانی، عیسیٰ خیل، لکی مروت تے اڳوں بنوں تے ٹانک نال ملیندی ہے جیہڑی ہݨ بند کر ݙتی ڳئی ہے۔ تاجِ برطانیہ نے ماڑی انڈس دے مکان تے اپݨی فوج دے کیتے ہک اسلحہ ڈپو قائم کیتا ہئی۔ ایہ ڈپو انہاں افواج کوں اسلحہ فراہم کریندا ہئی جیہڑے دریائے سندھ دے پار مغربی علاقیاں دی سرحد دی حفاظت دے کیتے تعینات ہن۔ ایہ ڈپو ہݨ وی ٹیشݨ دے نال قائم ہے۔ ماڑی انڈس تائیں اسلحہ مرکزی چوڑی پٹری دے ذریعے ڳھنایا ویندا ہئی پر ایندے پار مغرب اچ ایں قسم دا نظام بݨاوݨ آسان کائنا ہئی، ایں واسطے ایں تے 2 فٹ 6 انچ دی تنگ پٹری وچھائی ڳئی ہئی جو ماڑی توں بنوں تائیں ویندی ہئی۔ اڳوں بنوں کوں ٹانک توں برانچ لائن دے ذریعے جوڑا ڳیا۔ ایویں ریلوے دا ہک سستا تے چھوٹا نظام وجود اچ آ ڳیا جیہڑا برطانوی فوجاں دی سرحد تائیں نقل و حمل کوں آسان بݨاوݨ اچ مددگار ثابت تھیا۔

ایں توں ہک پاسے تہاݙے میانوالی، نمل جھیل تے چشمہ بیراج ویندا ہے جݙاں کہ ݙوجھے پاسے عیسیٰ خیل تے لکی مروت وی ویندا ہے۔

ریلوے ٹیشݨ کوڈ

پاکستان ریلویز دی سرکاری ویب گاہ دے مطابق ماڑی انڈس ٹیشݨ دا کوڈ MAT ہے۔

موجودہ حالت

ایں وقت ایہ ٹیشݨ پاکستان ریلویز دے استعمال اچ ہے۔

محل وقوع

ماڑی انڈس ٹیشݨ ماڑی انڈس اچ واقع ہے۔