ماساتوشی کوشیبا

ماساتوشی کوشیبا

ماساتوشی کوشیبا (19 ستمبر 1926 – 12 نومبر 2020) ہک جاپانی طبیعات دان ہن تے نیوٹرینو فلکیات دے بانیاں وچوں ہک ہن ۔ انھاں دا نیوٹرینو ڈیٹیکٹرز Kamiokande تے Super-Kamiokande نال کم شمسی نیوٹرینوز دا پتہ لاوݨ وچ اہم ہا ، جیڑھا جو شمسی نیوٹرینو مسئلے کیتے تجرباتی ثبوت ݙیندا ہا ۔

کوشیبا 2002 وچ طبیعات دا نوبل انعام جتیا ، ریمنڈ ڈیوس جونیئر دے نال رل تے ، "فلکی طبیعات وچ شاندار ݙات کیتے ، خاص طور تے کائناتی نیوٹرینوز دا پتہ لاوݨ کیتے" ۔

او انٹرنیشنل سینٹر فار ایلیمنٹری پارٹیکل فزکس (ICEPP) وچ ہک سینئر کونسلر تے یونیورسٹی آف ٹوکیو وچ پروفیسر ہن ۔

ابتدائی زندگی

کوشیبا 19 ستمبر 1926 کوں مرکزی جاپان دے تویوہاشی وچ توشیو تے ہایاکو کوشیبا دے گھر ڄمے ہن ۔ انھاں دے پیو ہک فوجی افسر ہن ۔ انھاں دی ماء تݙاہاں فوت تھی ڳئی جݙݨ او ترائے سال دے ہن ، جیندی وجہ توں انھاں دے پیو اپݨی ذال دی وݙی بھیݨ نال شادی کر گھدی ۔ او یوکوسوکا وچ وݙے تھئے ، تے ٹوکیو وچ ہائی سکول مکمل کیتا ۔ ایں ڳالھ دا ذکر اہم ہے جو انھاں دی ابتدائی دلچسپی جرمن ادب پڑھݨ وچ ہئی ، لیکن استاد دیاں ہتک آمیز ڳالھیں دی وجہ توں فزکس پڑھݨ لڳے ۔

انھاں 1951 وچ یونیورسٹی آف ٹوکیو توں گریجویشن کیتی تے 1955 وچ نیو یارک دی یونیورسٹی آف روشیسٹر توں فزکس وچ پی ایچ ڈی حاصل کیتی ۔

کیریئر تے تحقیق

کوشیبا اپݨے کیریئر دی شروعات جولائی 1955 توں فروری 1958 تئیں ڈیپارٹمنٹ آف فزکس ، یونیورسٹی آف شکاگو وچ بطور ریسرچ ایسوسی ایٹ کیتی ، تے مارچ 1958 توں اکتوبر 1963 تئیں انسٹیٹیوٹ آف نیوکلیئر سٹڈی ، یونیورسٹی آف ٹوکیو وچ ایسوسی ایٹ پروفیسر ریہے ۔ نومبر 1959 توں اگست 1962 تئیں چھٹی تے رہݨ دے دوران انھاں یونیورسٹی آف شکاگو دے ڈیپارٹمنٹ آف فزکس وچ لیبارٹری آف ہائی انرجی فزکس اینڈ کاسمک ریڈی ایشن دے قائم مقام ڈائریکٹر دے طور تے خدمات انجام ݙتیاں ۔

یونیورسٹی آف ٹوکیو وچ او مارچ 1963 وچ ایسوسی ایٹ پروفیسر تے ول مارچ 1970 وچ ڈیپارٹمنٹ آف فزکس ، فیکلٹی آف سائنس وچ پروفیسر بݨے ، تے 1987 وچ اتھاں ایمریٹس پروفیسر ریہے ۔ 1987 توں 1997 تئیں ، کوشیبا توکائی یونیورسٹی وچ پڑھایا ۔

2002 وچ ، انھاں "فلکی طبیعات وچ شاندار ݙات کیتے ، خاص طور تے کائناتی نیوٹرینوز دا پتہ لاوݨ کیتے" طبیعات دا نوبل انعام مشترکہ طور تے جتیا ۔ (اوں سال دے انعام دے ٻئے حصے امریکہ دے ریمنڈ ڈیوس جونیئر تے ریکارڈو گیاکونی کوں ݙتے ڳئے ہن ۔)

کوشیبا دی ابتدائی تحقیق کائناتی شعاعواں وچ ہئی ۔ 1969 وچ ، او الیکٹران-پوزیٹران کولائیڈر فزکس وچ تبدیل تھی ڳئے ، تے جرمنی وچ JADE ڈیٹیکٹر نال جڑے ہوئے ہن ، جیڑھا جو سٹینڈرڈ ماڈل دی تصدیق کرݨ وچ مددگار ثابت تھیا ۔ ماسایوکی ناکاہاتا تے اتسوتو سوزوکی دے نال ، کوشیبا پروٹان ڈیکے دا پتہ لاوݨ کیتے Kamiokande تجربہ ڈیزائن کیتا ، جیڑھا جو عظیم متحد نظریات دی ہک پیش گوئی ہے ۔ کوئی پروٹان ڈیکے نئیں ݙٹھا ڳیا ، لیکن کوشیبا محسوس کیتا جو ڈیٹیکٹر کوں نیوٹرینوز دا پتہ لاوݨ کیتے بݨایا ونڄ سڳدا ہے ، تے ڈیوس دے امریکہ دے شاندار کم کوں ݙیکھدے ہوئے ، منصوبے کوں ایندے مطابق ڈھال ڳیا ۔

1970 دے ݙہاکے دی موہر وچ ، کوشیبا سوویت یونین وچ پارٹیکل ایکسلریٹر الیکٹران کولنگ دے سرخیل گیرش بڈکر (1918–1977) دے نال تعاون کیتا ۔ ایہ تعاون نامعلوم وجوہات دی بنا تے مختصر کر ݙتا ڳیا لیکن بڈکر کجھ سال بعد دل دا دورہ پووݨ نال فوت تھی ڳئے ۔

ایں تجربے دے ذریعے ، او (تے امریکہ وچ ڈیوس) ایں پیش گوئی دی تصدیق کرݨ دے قابل ہن جو سجھ وچ نیوکلیئر فیوژن رد عمل دے دوران نیوٹرینوز پیدا تھیندے ہن ۔ تاہم ، انھاں تجربات وچ توقع توں گھٹ نیوٹرینوز دا پتہ لاتا ڳیا ۔ ایں کمی کوں شمسی نیوٹرینو مسئلہ آکھیا ڳیا ۔ ایں کمی دی وضاحت بالآخر "نیوٹرینو اوسلیشنز" نال تھیندی ، جنھاں دا وجود Kamiokande دے ہک وݙے ورژن نال ثابت تھیا ، جیڑھا جو کوشیبا دے شاگرد تاکاکی کاجیتا دی ہدایت وچ چلایا ویندا ہا ۔

1987 وچ ، Kamiokande تجرباتی ڈیٹیکٹر ملکی وے توں ٻاہر ، لارج میجیلینک کلاؤڈ وچ سپرنووا دھماکے (SN 1987A دے ناں نال ڄاݨیا ویندا ہے) توں نیوٹرینوز دا پتہ لاتا ۔ انھاں دی تحقیق نیوٹرینو فلکیات کوں بطور مطالعہ دے شعبے دے قیام وچ شاندار کردار ادا کیتا ۔

1996 وچ ، Kamiokande توں امید افزا نتائج دے نال ، ٹیم ہک وݙا تے ودھ حساس ڈیٹیکٹر چلایا جیندا ناں Super-Kamiokande ہا ۔ ایں ڈیٹیکٹر نال ، سائنسدان ایں ڳالھ دا مضبوط ثبوت ݙیوݨ دے قابل ہن جو نیوٹرینوز اݙاری دے دوران ہک ونکی توں ترائے ونکیاں وچوں ٻئی ونکی وچ تبدیل تھیندے ہن ۔ ایں مظاہرے شمسی نیوٹرینو مسئلے کوں ایں دلیل نال حل کیتا جو ابتدائی ڈیٹیکٹر ہک ونکی دے نیوٹرینو دا پتہ لڳا سڳدے ہن نہ کہ تریہاں ونکیاں دا ۔

کوشیبا بلیٹن آف دی اٹامک سائنٹسٹس دے بورڈ آف سپانسرز دے ممبر ہن ، تے بنگلہ دیش اکیڈمی آف سائنسز دے غیر ملکی فیلو وی ہن ۔ او ایڈوگاوا NICHE پرائز سٹیرنگ کمیٹی دے بانی رکن ہن ۔

ذاتی زندگی

کوشیبا 1950 دے ݙہاکے دے چھیکڑ وچ جاپان واپس آوݨ تے آرٹ میوزیم کیوریٹر کیوٹو کاٹو نال شادی کیتی ۔ ایں جوڑے دا ہک پتر تے ہک دھی ہئی ۔

او 12 نومبر 2020 کوں ٹوکیو دے ایڈوگاوا ہسپتال وچ 94 سال دی عمر وچ فوت تھی ڳئے ۔

ایوارڈز

·        1987 – آساہی انعام

·        1987 – نیشینا میموریل انعام

·        1989 – جاپان اکیڈمی انعام (تعلیم داناں کیتے)

·        1997 – ہمبولڈٹ انعام

·        2000 – وولف انعام برائے فزکس

·        2002 – نوبل انعام برائے فزکس

·        2002 – پینوفسکی انعام

·        2003 – بینجمن فرینکلن میڈل برائے فزکس

·        1985 – فیڈرل ریپبلک آف جرمنی دا آرڈر آف میرٹ

·        1997 – آرڈر آف کلچر

·        2002 – سوگینامی دی اعزازی شہریت

·        2002 – میجی یونیورسٹی دی اعزازی ڈاکٹر

·        2002 – امریکن فزیکل سوسائٹی دے فیلو چݨے ڳئے

·        2003 – آرڈر آف دی رائزنگ سن دا گرینڈ کارڈن

·        2003 – ماساتوشی کوشیبا ولوں نوبل انعام جتݨ دی یاد وچ ، کوشیبا ہال یونیورسٹی آف ٹوکیو دے سکول آف سائنس وچ قائم کیتا ڳیا ۔

·        2003 – ٹوکیو دی اعزازی شہریت

·        2003 – یونیورسٹی آف ٹوکیو دے ایمریٹس پروفیسر