مارکو پولو
مارکو پولو (1254ء-1324ء) وینس، اٹلی دا ہک تاجر تے مہم جو ہئی۔ اُوں نے دُنیا دے کئی مُلکاں دا سفر کیتا تیں اپݨے مُشاہدات کوں ہک کتاب وِچ قلم بند کیتا۔
مارکو پولو تُوں پہلے اُوندے پیو تے چاچا چین تئیں سفر کر چُکے ہَن۔ مارکو پولو اُنہیں دے نال ول ول چین تئیں گیا۔ اُوں ویلے چین تے چنگیز خان دے پوترے قبلائی خان دی حکومت ہئی۔ قبلائی خان منگول ہئی تے اُونکوں چینیاں تے اعتبار نہ ہئی، اِیں واسطے اوں نے مارکو پولو کوں اپݨی ملازمت وِچ رکھ گِھدا۔ مارکو 17 سال تئیں چین وِچ رہیاں تے ول اپݨے وطن واپس آ گیا۔
مارکو پولو نے اپݨے سفر دے دوران مشرق وسطیٰ تے وسطی ایشیاء دے مُلکاں دا سفر وی کیتا۔ چین دے سفر وِچ او شاہراہ ریشم تُوں گُذرا۔ اِیندے علاوہ اوں نے سمندری سفر وی کیتے۔
واپس آ کے مارکو پولو نے اپݨے سفراں دے بارے وِچ ہک کتاب لکھی جیڑھی "The Travels of Marco Polo" دے ناں نال مشہور تھئی۔ اِیں کتاب نے یورپیاں کوں ایشیاء دے بارے وِچ ٻہوں معلومات ݙتیاں۔