ماء ٻولی دی اہمیت

ماء ٻولی دی اہمیت زباناں تہذیب و ثقافت دا آئینہ ہوندیاں ہن. زباناں بݨدیں صدیاں لگدن تے ونڄیدیں دیر نئیں لڳدی. ساݙے سامݨے کتنیاں ذباناں ہن جیڑھیاں اپݨے آخری ساہ پیاں گھندن. تھی سڳدے جو انہاں زباناں دے مرݨ یا مارݨ وچ حکومتاں دا قصور ہووے پر جیڑھے مالک خود اپݨی مݙی موڑی ونڄاوݨ تے آ ونڄے تاں ول کہیں ٻیے دے سر وچ درد ہے جو او خوامخواہ اوندی رکھی کھڑا کرے. شئے ویچݨ دے بعد اوندی قدر دا پتہ لگدے پر آہدن ݙدھی تھنیں نی پوندی. پچھیں لکھ پٹوکا کھتچے کجھ ہتھیں نی آندا. اکوی21فروری ماء ٻولی دے عالمی ݙینھ دے حوالے نال میں حکومت دے وانج دروھ مترپ اتے ݙڈھپ دارووݨاں رووݨ دی بجائے اپݨے گروان وچ جھاتی پاتے ماء ٻولی دے حوالے نال اپݨے رویئے تے غور کریسو. تھی سڳدے جو کہیں کہیں جاء میݙا لہجہ کھورا تھی ونڄے پر ایہ میݙے اندر دا کوڑ ہے میڈے اپݨے آپ نال گلے الا نبھےہن آپݨے لوکاں نال کجھ سہݨ سہاپ ہن. ٹھڈے دل نال انہاں تے غور کریسو. جیکر تہاݙا دل منے تاں ول حکومتاں دی تانگھ رکھݨ دی بجائے اپݨی ماء ٻولی دی خدمت ہک نیکی سمڄھ تے گھروں شروع کریسو. اتے تہاکوں پتہ ہے جو نیک کم وچ دیر نئیں کرݨی چاہیدی. آہدن تعلیم تے خوشحالی بندے کوں شعور تے بصیرت دان کریندی اے. پر ساݙے وسیب وچ ایں نئیں تھیا. اساں چار جماعتاں پڑھدے ڳئے ہیں تے پہلا کم ایہ کیتے سے جو اپݨے گھروں اپݨی ماء ٻولی. ماء دھرتی اپݨیاں رسماں ریتاں اتے اپݨیاں قدراں بتھیاں پراݨیاں تے ڳئیاں گزریاں جپن لڳ ڳن. تھیونا تاں ایہ چاہیدا ہا جو تعلیم تے خوشحالی ساݙے اندر ساݙیاں قدراں زبان دھرتی اتے ساݙی ثقافت دی اہمیت کوں اجاگر کریندی. ساکوں انہاں دے نیڑے کریندی اتے انہاں کوں ڳل لا تے ان پڑھ طبقے کوں ݙے کے پروبھرے تھی ڳئے ہیں. سئیں ݙکھ تاں ایں ڳالھ دا ہے جو جہڑھی ماء آپݨی زبان اپݨی اولاد کوں ݙیوݨی ہئی اوہا ماء خود آپݨی زبان تے ثقافت دی دشمن بݨ ڳئی ہے. اساݙے اکثر سنگتی ایجھے وی ہن جیہڑے سارا ݙینہ ٻاہر سرائیکی سرائیکی کھیݙسن لوکاں دی سرائیکی دشمنی دا رووݨا روسن. سرائیکیاں کوں دنیا دا مظلوم ترین انسان ثابت کریسن آپݨی سرائیکی قوم تے آپݨے وسیب دا ݙکھ ݙسیندے ݙسیندے چپ نا کریسن لڳسی جو انہاں جیہاں قوم پرست اتے دھرتی نال پیار کرݨ آلا ٻیا کئی کائینی. پر جیویں گھر دی در سال پٹسن کتھ ڳئی قوم تے کتھ ڳئی قوم پرستی. آپݨی اولاد نال ماء ٻولی اچ گالھ کریندیں گھوٹوں آویسے. ساݙے ایہے روئیے ساݙی ترقی دی راہ وچ سب توں وݙی رکاوٹ ہن. 'ساکوں اندروں ٻاہروں ہک تھیوݨا پوسی. جیکر اساں سرائیکی کوں دنیا دی سب توں مٹھی پراݨی اتے فصڄ و بلیغ زبان سمجھدے ہاں تاں ول اپݨی اولاد کوں ݙیندے شرمندہ کیوں ہئیں کیا نہاں دا حق کائنی جو او وی ایں سوہݨی مٹھی اتے صدیاں پراݨیاں روایات دی امین زبان دے فیض توں مستفید تھیون.اساں آپݨی اولاد کوں آپݨا مزہب بڑے فخر نال ݙیندے ہئیں. انہاں کوں ݙسیندے ہئیں جو ساݙا مزہب دنیا دا سب توں بہترین ہے. ایہو ای سچا مزہب ہے. ول آپݨا مسلک وی ڈھیر ساریاں دلیلاں اتے ثبوتاں نال آپݨی اولاد کوں منتقل کریندے ہئیں. انہاں کوں سمجیندے ہیں. جو ساݙا مسلک ٻئے سارے مسالک توں بہتر ہے. اتے ایہو مسلک ای اللہ تے اللہ دے رسول دا من بھانوݨا ہے. اینکوں نئیں چھوڑنا. ہیندے اتے عمل کرنے اتے ساری حیاتی ہیندے اپر چار کرنے. ایں توں بعد آپݨا حسب نسب اتے آپݨی قوم تے وی آپݨی اولاد کوں فخر کرنا سکھیندے ہئیں. انہاں کوں ݙسیندے ہئیں جو ساݙی قوم ٻنھاں قوماں توں زیادہ معزز اتے ݙھیر گناں والی ہے. ایندے اتے فخر کراہے. پر ڄہڑے ماء ٻولی دا ویلہا آندے ساݙے روئیے یکسر بدل ویندن. ساݙیاں اکھیں وچ رتول آویندی ہے. ڳل شوکیج ویندن. کل کوں جیکر ساݙی اولاد ساڈا گروان جھل تے ساݙے کنوں ہچھسی جو سئیں آپݨا مزہب مسلک اتے حسب نسب تاں ساکوں بہوں فخر نال ݙسیندے ہاوے پر آپݨی زبان کیوں نہ ݙتی ہاوے. ساݙا کیا قصور ہا جو ساکوں تساں ݙ وݙ رکاں بݨا ݙتے تاں ول سوچوں ساݙے کول کیا جواب ہوسی. ساکوں کتھائیں خواجہ جاء ݙیسی.. اساں پٹھاݨاں اتے سکھاں کوں دنیاں دے بیوقوف انسان سمجھدے ہئیں. انہاں دے لطیفے بݨائی ودے ہئیں. سارا ݙینہہ انہاں دیاں ڳالھیں تے کھلدے ہئیں. اے دنیا دے کہیں وی کونے وچ چلیے ونڄن آپݨی ماء بولی اتے اپݨے کلچر کوں ایویں سانبھ سانبھ رکھدن جیویں انہاں دا سب توں وڈا سرمایا ایہو ہووے.. ول خود سوچو جو بیوقوف ایہ ہن یا اساں... او آپݨے گھراں وچ آپݨی ماء ٻولی ٻولیندن اتے اساں انہاں چیزاں کوں ڳال ونڄا چھوڑیے.. کیا کئی مہزب تے شعور رکھݨ والی قوم آپݨی ماء بولی نال ایجھا سلوک کریندی ہے. ماء ٻولی تاں ماء دی زبان ہوندی ہے. ای وی ماء آلی کار پیاری ھوندی ہے. کیا اساں آپݨی ماء نال پیار کریندے ہئیں.. جیکر کریندے تاں ول اوندی زبان دے دشمن کیوں بݨ ڳئیے ہاں.. ساکوں ماء تاں چنگی لگدی ہے پر اوندی زبان کیوں چنگی نئیں لڳدی..