ماء ٻولی تے خرچ کروں

سرائیکی دی ترقی سانگے اساں اشاعتی ادارہ قائم کیتے، اللہ سئیں جو دھیلہ ٹکا ݙتے سرائیکی ماء ٻولی تے خرچ کیتے، کرائے دے بتھے پراݨے مکان ءِ چ حیاتی گزار ݙتی اے، پر سرائیکی ماء ٻولی دے شیش محل کھڑے کر ݙتن۔میکوں میݙے ٻال آہدن جو سارے لوک گھر بݨویندن تساں صوبہ بݨویندے ودو ،میں اکھینداں جو ہک بندے یا ہک کنبے دے گھر دی بجائے  کروڑیں انسانیں دا صوبہ بݨ ونڄے تاں ٻیا کیا چہیدے؟ صوبہ بݨسے تاں سارے در گھر آلے سݙیسو، صوبہ نہ بݨیا تاں سرائیکی قوم ملیا میٹ تھی ڳئی تاں ول بھانویں محلیں دے مالک ہووں  اوندا فائدہ کائنی ، اساکوں گھر نی صوبہ چہیدے، اساکوں ڳہݨے نی کتاب دی ضرورت اے۔ اے ٹھیک اے سرائیکی اشاعتی ادارے سینکڑاں تے ہزاراں سرائیکی کتاباں چھاپ تے سرائیکی ماء ٻولی دی خدمت کیتی اے پر میں اکھینداں جیویں مخدوم طالب المولی سندھی دا کم کر ڳے ہک ایجھا وݙا سرائیکی اشاعتی ادارہ ہووے جیندے وچ سرائیکی لوک کم کریندے ہوون، لکھاریں کوں تحقیق تے ریسرچ دے پراجیکٹ ݙتے ونڄن، انہائیں کوں کم دا معاوضہ ملے، عالمی ادب دا سرائیکی وچ  ترجمہ تھیوے تے سرائیکی کوں اتنی ترقی یافتہ زبان بݨا ݙتا ونڄے جو سائنس پڑھݨ سانگے وی اساکوں انگریزی مُتھاجی نہ رہے۔

حوالہ

کتاب: میݙی دھرتی، میݙے لوک ، مصنف: ظہور احمد دھریجہ ، ناشر: جھوک پبلشرز ، ملتان 2018ء