لیاری ندی

لیاری ندی کراچی وچ وہوݨ آلی ہک نکی جئیں ندی ہے۔ کجھ زمانے پہلے ایندا پاݨی صاف ستھرا ہوندا ہا تے ایندے وچ مچھیاں وی ہوندیاں ہن۔ لیکن کراچی دی آبادی ودھݨ دے نال نال اینکوں گندے پاݨی دی نکاسی کیتے استعمال کیتا ویندا پیا ہے تے ہݨ ایہ صرف ہک نالے دا منظر پیش کریندی ہے۔

لیاری ایکسپریس وے - روٹ دا نقشہ

ہݨ کراچی شہر ندی دے ݙوہیں کناریاں تے تقریباً ندی دے شروع توں آخر تک موجود ہے۔ ندی دے نشیبی علاقے وچ، جتھاں سیلاب دے خطرے دے باعث قانونی طور تے تعمیر ممنوع ہے، اتھاں غریبیں دے کچے مکانات یا جھونپڑیاں نظر آندیاں ہن۔ ایہ علاقہ بارش دے فوراً بعد زیر آب آ ویندے۔

پیپلز پارٹی دے ݙوجھے دور حکومت وچ ماس ٹرانزٹ پروگرام شروع کیتا ڳیا ہا تے ایں پروگرام دے تحت لیاری ندی دے نال نال لیاری ایکسپریس وے بݨاوݨ دا منصوبہ تشکیل ݙتا ڳیا ہا۔ سالہا سال دے التوا دے بعد ہݨ ایہ منصوبہ تکمیل دے نیڑے ہے۔ ایں سڑک کوں بنیادی طور تے بندرگاہ توں اندرون ملک تے اندرون ملک توں بندرگاہ کوں ونڄݨ آلی ٹریفک استعمال کریسی تاکہ شہر دیاں ݙوجھیاں وݙیاں شاہراہاں توں ایہ بوڄھ ڳھٹایا ونڄ سڳدے۔