لکھت ویورا

’’لکھت ویورا‘‘ سرائیکی محقق ، نقاد تے شاعر سئیں حمید اُلفت ملغاݨی دے مضمونیں دا مجموعہ ہے ۔ ایہ سرائیکی ادبی بورڈ دی 137ویں پیشکش ہے ۔ ڈاکٹر حمید اُلفت ملغاݨی دا ناں تے تخلیقی کم سرائیکی زبان و ادب دے حلقیاں وچ مہاندرے محقق تے لکھاری دے طور تے ڄاݨیا تے منیا ویندے ۔ ایں کتاب وچ سرائیکی لکھتاں تے لکھاریاں دا تحقیقی ، تنقیدی تے فنی مطالعہ کیتا ڳئے ۔ سئیں حمید اُلفت ملغاݨی کتاب وچ 47مضمون شامل کیتن ، جیڑھے علمی ادبی حوالے نال اہمیت تے انفرادیت رکھدن ۔ کتاب دی ونڈ موضوع دے لحاظ نال کیتی ڳئی ہے ۔ زبان تے زبان دانی ، فریدیات، نثری ڳانڈھا ، شعری سُرت تے تریمت ادب دا بہترین منظر نامہ ایں کتاب وچ موجود ہے تے کتاب دی اہمیت تے افادیت وچ وادھا کریندے۔

سئیں حمید اُلفت ملغاݨی انہیں مضمونیں وچ پورے سرائیکی وسیب دے لکھاریں تے اُنہیں دے تخلیقی نظریاتی تے تحریراں دا بھر پور جائزہ گھدے ۔ تحقیق تے تنقید دے اوکھے کم کوں انہاں اپݨی محنت تے ریاضت نال سوکھا کیتے ۔ کتاب تنقیدی تے تحقیقی خوبیاں دا مجموعہ ہے۔ میکوں یقین ہے جو ’’لکھت ویورا‘‘ سرائیکی ادب دے تحقیقی تے تنقیدی سرمائے وچ وادھا کریسی تے سرائیکی زبان و ادب دے طالب علمیں کوں سرائیکی ادب تے ایندے لکھاریں بارے سارا مواد ہک کتاب اِچ مل ویسی ۔ سئیں حمید اُلفت ملغاݨی مبارکباد دے مستحق ہِن ۔ سرائیکی ادبی بورڈ ہمیش سرائیکی زبان و ادب دیاں کتاباں چھاپ کے خدمات دا فرض نبھیندا رہسی۔

عامر حفیظ ملک

سیکرٹری جنرل(اعزازی)

سرائیکی ادبی بورڈ

ملک ہائوس گلی نمبر17نیو شالیمار کالونی ، ملتان

حوالہ

لکھّت ویورا، ڈاکٹرحمیداُلفت ملغاݨی ،چھاپہ خانہ: جھوک پرنٹرز ملتان