لَکھ

لکھ پڑھݨ ویندے ہاسے ،اُستاد نال ہوندے ہن،ہک ہزار ڳکڑیں  دی گتھلی سِر تے رکھیندے ہاسے ،ویہہ تریہہ تے تریہہ تریہہ چھوکرے، اُستاد اڳوں  تے اساں  پُچھوں ، سو ختم کرݨا ہونداہا، اُستاد سوٹی چاتی ٻیٹھا ہوندا ہا ،اُستاد ٻے پاسے اَکھ ولاوے ہا اساں  ہک ڳکڑ دی جھاہ مُٹھ بھر تے رکھ ݙیندے ہاسے،وستی ء ِچ ختم پڑھویندے ہن تے نال ہمسائے جمالی وی لَکھ پڑھویندے ہن ،کݙاہیں  کݙاہیں  چوہدری رحمت علی تے چوہدری اسماعیل آلے وی ختم پڑھویندے ہن۔اساݙے جمالی بھرا اکثرا ݙالے دا بھت پکیندے ہن ،اُستاد اَکھیندے ہن زور دا پڑھو، اللہ شافی محمد کافی ، اساں  دل ء ِ چ پڑھدے ہاسے ،لاس مانی لاس مانی،لاس مانی توں  مراد بھاڄی روٹی دی دُعا ہوندی ہئی ،جو کہ اکثر نہ مِلدی ہئی ،لَکھ پڑھݨ دے بعدلکھ پڑھاوݨ آلے اُستاد کوں  پیسے ݙیندے ہن ، کہیں  پنج کہیں  ݙاہ کہیں ویہہ،اُستاد بھانج کرا تے آنا آنا ݙو ݙو آنے ساریں  کوں  ݙیندے ہن آنے دے چݨے ،لاچی داݨے ،تلونگڑیاں  یا ٹانگر جو کجھ گھنو ہا ڈھیر سارا مِل پمدا ہا،چݨے گھنوں  ہا تاں  ٻک جھلیندے ہاسے ،ہٹی آلا آکھدا ہا ٻک ء ِچ وِٹیج پمسن جھولی جھلو ،نِکے لا ہک چولے ء ِچ راہندے ہاسے ،جھولی جھلیندیں  شرم اَمدی ہئی تُساں  پُچھو جو آنے دے کتنے چݨے ہوندے ہن ؟ایویں  اندازہ لائو جو آنے دا اتنا مِلدا ہا جتنا اَڄ پنجاہ روپے دا۔

حوالہ

کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان