لوک قصیاں وچ نائی

سرائیکی لوک کہاݨیاں وچ انہاں کم کرݨ آلے وسیبی کرداریں دیاں وی کہاݨیاں موجود ہِن یا وَل ایہ کردار قصے کہاݨیاں وچ ثانوی تے مددگار حیثیت نال وی نشابر تھیندن ۔ جینویں نائی ٻہوں ہشیار،ٻلیارتے ہر ڳالھ دی کؤ رکھݨ آلا تصور کیتا ویندے اے جیکراہیں بادشاہ کول ہووے تاں ہک جسوس تے مخبر دا کردار ادا کریندے تے شہر اَتے ملک دے حالات و واقعات بادشاہ کوں اوں ویلے سݨویندے جیڑھے ویلے او ایندے کنوں وال کٹویندا پیا ہووے ۔ ہک جڳ مشہور قصوصہ ہے۔

’’جو ہک بادشاہ دی ریاست دے حالات ٻہوں خراب ہن ۔ چوری چکاری ، بدعنوانی ، مہانگ ، نشہ پتہ عام ہئی ۔ وزیر بادشاہ دے گوش گزار کرن جو بادشاہ سلامت ملکی حالات ٻہوں خراب ہِن تے تساں ایندے تے توجہ ݙیوو پر بادشاہ کوئی پرواہ نہ کرے ۔ وزیر پریشان جو بھل ووے بادشاہ ملکی حالات پاروں پریشان کیوں نئیں تھیندا ۔ ہوے ناں تاں ایندا حال چاواں اوں بادشاہ دی نگرانی کروائی تاں پتہ ایہ لڳا جو جیڑھے ویلے نائی بادشاہ دے وال مُنیندے تے ݙاڑھی بݨیندے تاں او نائی کنوں ملکی حالات پُچھدے تاں او سبھ ٹھیک ہے دی رپورٹ ݙیندے تہوں تاں بادشاہ فکر نئیں کریندا ۔ نائی دے گھر تاں سَتے خیراں ہن تے لوک اونکوں بادشاہ دا نائی ہووݨ کاݨ رو رعایت وی کریندے ہَن تہوں اوندی جُتی کوں وی پرواہ کائنی ۔ وزیر ایں کیتا جو بندے گھل تے نائی دے گھروں چوری کروا گھدی ۔ چوری جو تھئی تاں ٻئی ݙینہوار بادشاہ دی ݙاڑھی بݨیندے ہوئے اوں پُچھیا میاں پیر بخش آ ملکی حالات کیویں ہِن تاں جوان دی دھاڑ نکل ڳئی تے آکھݨ لڳا جو سئیاں ۔ ملک اِچ تاں ظلم تے قہر تپیا کھڑے، کہیں دی جان مال محفوظ کائنی ۔ روز چوریاں چکاریاں ہِن ۔ لوک لُٹیندے پِن ۔ چور ݙاکو گھر جو وڑدِن تاں بوکھر پھیر ویندن ۔ کوتوالی دا نظام ایݙا خراب ہے مجال ہے جو کوئی چور کݙیہیں پکڑیجا ہووے تے کوتوال دے ݙر توں چوریاں رُکیاں ہوون ۔ بادشاہ ایہ جو سُݨیا تاں او فوراً سبھے وزیراں مشیراں کوں سݙیا تے ملکی حالات درست کرݨ دے احکامات تے اختیارات ݙے ݙتونِس بس وَل کیا مارکہ تھولے ݙینہاں بعد ملک دے سبھے حالات ٹھیک تھی ڳئے ۔‘‘ ایہ تاں ہئی نائی دا کردار جیڑھا اپݨیاں ڳالھیں نال ملکی حالات درست کروا سڳدے۔‘‘

حوالہ

سرائیکی لوک قصیاں دے کردار، مصنف : شہزاد اسد خان لغاری ، ناشر: جھوک پرنٹرز ، ملتان