لوکیں دی ونڈ

دھرتی صرف کرّی زمین دا ناں اے ، رب تعالیٰ صرف ہک ’’کُن‘‘ نال کائنات پیدا کیتی ۔ جیندے ہزاراں رنگ ہِن ، وݙے تیں نظر آوݨ آلے حصّے زمین ، پہاڑ ، اَسمان تیں سمندر ہن ۔ انہیں ساریں دے وچ اِتلا کجھ اے جو صدیاں گزرݨ دے باوجود انہیں دے رازیں دا گُھنڈ نہیں ہٹ سڳیا ۔ انسان کوئی کروڑاں مخلوقاں وچوں اعلیٰ بݨائس ۔ ہوش ، فیز ، تمیز ، سوچ تیںہتھ پیر ہلا تیں محنت تیں کم کار کرݨ دے طریقے سکھائے نِس ۔ اللہ تعالیٰ پوری کائنات اِچ اِی مخلوق پیدا کیتی اے جو ڳݨتری اِچ نہیں آ سڳدی ، پر ساریں دا سُرخیل تیں وَݙکا بندہ ای اے باقی اوندی خدمت تیں اوندی سہولت واسطے ہن ، کوئی وی بیکار نہیں مخلوق دے چھوٹے چھوٹے کیڑے دا وی کوئی نہ کوئی فائدہ ضرور ہے ، حیف ہے انسان تیں جو او اَپݨے مقام کوں آپ نہیں سُنڄاݨ سڳیا ۔ سمجھ دے باجوود بے سمجھی کریندا ودے ، اعلیٰ تیں اُچا ہووݨ دے باوجود کم تر ، جِھکا تیں چھوٹا رہ ڳئے ۔ او اَپݨاں دشمن خود اے ۔ اونکوں اے سُنڄاݨ وی نہیں اَئی جو ربّ سئیں اونکوں کیوں پیدا کیتے او جزا تیں سزا ، نیکی تیں بدی ، گناہ تیں ثواب سب سمجھدے ، وَل وی او اینجھے کم کریندے جو اونکو ںانسان آہدیں  شرم آندی اے۔

اے پکی ڳال اے جو جیڑھے ویلھے ٻال ماء دے پیٹ وچوں ٻاہر آندے او فرشتہ اِی ہوندے ، ہر گناہ ، بُرائی ، آلودگی کنوں پاک۔ دینِ خدا وندی تیں ہوندے ۔ ٻاہر آ کے ساہ گھندے تیں ݙوجھے دے وَس پئے ویندے ۔ جو خود بے وَس اے ، ہُݨ او پیئو ماء ، ماحول ، معاشرے دے ہتھ اِچ اے ۔ او جیویں چاہوون تربیت ݙیون ۔ ٻولی سِکھاوِن ، ہنر ݙیون ، پڑھاوݨ ، نہ پڑھاوݨ ۔ خود جو کریسن او وی اوندی نقل کریسی ۔ جو سِکھیسن اونویں سکھسی۔ بندے دی زندگی داایہ سب توں وݙا موڑ اے۔ اوندے انسان بݨاوݨ دا ویلھا اے ۔ آہدن جو ہک تِل توں تُرٹی تیں سو چوٹاں کھاوے ،بندہ تُھڑکیا نئیں تیں ڳلیا نئیں۔ ایہو موڑ اہم اے ، بندیں کوں سہولتاں تیں قیمتاں دی سُنڄاݨ دا ویلھا وی ایہو ہے تیں محرومیاں دے نال ݙو چار تھیوݨ دا وقت وی ایہو اے ، انسان دے آوݨ آلی حیاتی دا دارومدار ایں ویلھے دی وَٹ تیں کھڑے۔

اڳلی حیاتی دو سفر کریندیں بندے دا ذہن تیار تھیندے ، اوندے دماغ اِچ ہک اُٻال اُٹھدے ٻیا لہندے ۔اوندی سوچ اُتے تلے تھیندی راہندی اے ، اوندا جسم ماحول کھاد خوراک تیں میل جول نال تبدیلی دے عمل وچوں گزردے ۔ اوندی اُٹھان چاہے تاں معاشرے دے ہک چنڳے بندے دی طرح تھی سڳدی اے ، جے پٹڑی توں لہہ ڳیا تاں وت دھرتی دا ٻوجھ بݨ ویسی ۔ اُتھائیں اوندی سنگت ساتھ دی ڳول اوندے آنوݨ والے زمانے تیں وݙا اثر سٹیندی اے یا او سدھار آلے پاسے لڳا ویسی یا وَت تھڑک پوسی۔

اوندے پیئو ماء سارے رشتہ دار ، اوندے ہم جولی تیں سنگتی ساتھی ، سارے اوندے کردار دے بݨݨ وچ وݙا کردار ادا کریندن ، جے کر اونکوں پیار مِل ڳیا ، سدھا رستہ مل ڳیا ۔ اوندی پٹڑی صاف ستھری بݨا ݙتی ڳئی تاں او معاشرے دا چنڳاں فرد بݨ ویسی ، پیئو ماء ملک تیں قوم واسطے فائدے مند تصور تھیسی۔ جے اوندی جھولی اِچ جھنڑکاں ، دَڑکے ، مار کٹائی، الزام ، نفرت ، اہمیت نہ مِلݨ تیں اینجھیاں محرومیاں پا ݙتیاں ڳیاں تاں اوں کنوں چنڳائی دی توقع کیویں کیتی ونڄ سڳدی اے ۔ بندہ تاں بندہ ہوندے بندہ لفظ اِی اینجھا اے جیندے نال صرف چنگائی لڳی ہوئی ہووے ،جے بندے کوں اساں بندہ نہ رہݨ ݙتا تاں ذمہ داری کیندی اے ۔ خدا دے بندیں کوں بندہ بݨاوݨ دا بندوبست رب سئیں کر ݙتے جے او اوندے بھیڄے ہوئے نظام تیں عمل کریسی تاں او بندہ اِی رہسی نہ تاں او جانوریں دا پِچھلا پاند آکھیا ویسی۔

بندیں کوں پٹڑی تیں رکھݨ سانگے حکومت وقت اوندے ادارے قانون لاڳو کرݨ آلے محکمے ہر وقت قانون تروڑݨ والے کوں گرفت اِچ گھنݨ واسطے تیار رہندن ۔ مسئلہ اے ہے جو جیکوں خدا دا ݙر نئیں او قنون توں کیویں ݙردے۔اوندے آپݨے علاوہ باقی لوکیں دے حقوق وی ہِن ہک بندہ صرف آپݨے فائدے دی خاطر ݙوجھیں دے حقوق دا خیال نئیں رکھدا انہیں تیں ݙاکہ سٹݨ واسطے تیار رہندے ، خود غرضی وچ مبتلا تھی تیں خدا دے قانون دی پرواہ نہیں کریندا تاں اوندے واسطے الڳ جزا تیں سزا دی ترکڑی تیار ہے اے حساب وی ٻہوں سخت اے ، تیں ایندے وچ رعایت سفارش کہیں دے وݙے یا چھوٹے غریب یا امیر دی کوئی تمیز کائنی۔

دھرتی تیں ٻہوں سارے پیشے ہِن ، نیکی پھیلاوݨ آلے لوک ، مدرسے ، خانگاہیں ، درس وݙی تعداد اِچ موجود ہِن اَڄکل اخباری میڈیا ، ریڈیو ، ٹی وی ، انٹرنیٹ ، ٹِیلمٹ پتہ نہیں کیا کیا ایجادات تھین ۔ پَر بندیں دے قبلے دا سِدھا تھیوݨ ناکام اِی ریہے ۔ اے ضروری نہیں جو تنگدست اِی جرم کریندے یا بدمعاش بݨدے ݙٹھا ڳئے جو پڑھیئے لکھیئے لوک امیر تیں کبیر معاشرے وچ مقام تیں اثر رسوخ رکھݨ والے خانداناں دے نوجوا ن کئی قسم دے جرائم وچ غرق پاتے ڳئین ۔ کئی لوک پیشہ ور مجرم ݙاکو تیں قاتل ہوندن جو اے قابل نفرت حرکتاں اوصرف روپے پیسے دے لالچ اِچ کریندن ۔ کئی لوک اَپݨے آپ کوں اڳوں رکھݨ کیتے جرم کریندن ، بندیں وچ او وݙائی سمجھیندن ، ٻہوں گھٹ اینجھے ہوندن جیڑھے ارادے توں بغیر جرم کرݨ تیں مجبور تھی ویندن ۔ ایندے وچ اکثر غیرت عزت یا زر ، زن ، زمین دے مسئلے ہوندن ۔ اے سارا کجھ ہک معاشرے دے گندا کرݨ یا گندا ڳولݨ دی کوشش جیڑھی انسان کوں رب تعالیٰ دا بندہ نہیں رکھدی او دنیا ، زر ، لالچ تیں جرم و گناہ وچ لتھڑیا ہوا انسان ہوندے جیندی نجات سوائے توبہ تیں زاری تیں رب کولوں معافی منگݨ دے ٻیا رستہ بند تھی ویندے۔

چنڳائی ، بُرائی ، نیکی تیں بدی ، کُوڑ تیں سچ ، کھوٹا تیں کھرا، رب دا بندہ تیں شیطان دا چیلڑا ، دنیا دا پوجݨ والا تیں نجات دا ڳولݨ ہک دریا دے ݙو کنارے ہن ۔ جنہیں دا ہک ٻے نال رشتہ تاں قریبی اے پَر او ہک ٻے نال کݙاہیں مِل نہیں سڳدے ، اُنہیں دا رستہ اَنج اَنج اے ۔ انہاں دی پہچاݨ سانگے اساں ݙوہائیں لڑیں دی اَنج اَنج ونڈ کریندے پئے ہیں تاکہ اصل ڳال ساریں کوں سمجھ آ ونڄے ۔ چنگے گندے لوکیں دا تیں چنگے گندے رستیں دا علم تھی ونڄے تاں جے آوݨ آلیاں نسلاں نیک راہ تیں لڳ سڳن۔

لوکیں دا کئی قسماں تیں کئی منہ ہِن او کئی رنگ بدلیندن ، کئی چہرے سجیندن ، ہک ہا تھی دی طرحاں ݙکھاوے دے ݙند ٻئے تیں کھاوݨ دے ٻئے ہوندن ، جرم تیں گناہ کرݨ والے دا دماغ جرم تیں گناہ کریندے ویلھے اپݨی جاہ تیں نہیں ہوندا ، اِت واسطے او جلد بازی تیں خوف دی چھاں ہیٹھ کوئی اینجھا سراغ چھوڑیندے جو آخر کار پکڑیا ویندے ۔ اینجھے لوک ساݙی نگاہ اِچ قابل نفرت تیں ملامت نہیں بلکہ او ساݙی ہمدردی تیں مدد دے مستحق ہِن ۔ ساکوں انہیں تیں توجہ ݙیوݨی چاہیدی ہے انہیں کوں سِدھے رستے وَل آوݨ دے رستے نپ تیں اُنہیں کوں ہوکا ݙے تیں ولاوݨ دی کوشش کرݨی چاہیدی اے ۔ شاید کوئی داء لڳ پووے ، او وی جہنم دی بھاہ توں بچ پوون تیں باقی لوکی وی انہیں دی بُرائی توں بچ ونڄن۔

پہلے حصے اِچ انہیں لوکاں دا ذکر کریندے ہائیں جہڑے بظاہر ہر پاسوں ٹھیک ٹھاک لڳدن پَر اندروں اندروں کجھ ٹھیک وی نئیں ہوندے آپݨے مطلب دی خاطر پینترے تے چہرے بدل بدل تیں آپݨا مقصد حاصل کریندن ۔ سب توں وݙا طبقہ اینجھا اے جیڑھا دعوے کرݨ دا بادشاہ ہوندے ہر ویلھے تہاݙا ہمدرد نظر آسی تہاݙے ہاں وچ ہاں ملیسی ، تہاݙی خوشی ، غمی وچ ویلھے نال شریک تھیسی ۔ تہاݙے نال تھاݨے ، تحصیل کچہری تک ویسی ۔ ایویں لڳسی جو اے تہاݙے وچوں اے ، جݙاں ووٹ پوسن تاں وَل تہاݙے دروازے تیں آسی ، ووٹ گھن تیں پورے پنج سالیں تک غائب تھی ویسی ، ݙسݨ دا بغلہ مچھیں دا ٹرکائو، ݙوجھا اینجھا طبقہ اے جئیں لوکیں دا اللہ واسطے دا ٹھیکہ گھدا ہوئے او آہدے میں لوکیں دے مسئلے حل کرݨ واسطے اپݨا سارا کجھ دان کیتا ہوئے مَیں کوئی قیمت ادا نہیں کریندا ۔ جتھاں کوئی ہَڑ دڑ پوسی او موجود ہوسی ۔ اڳوں ودھ تیں ڳالھیں کریسی ، رُعب ڄمیسی جو او صرف غریب تے عام لوکیں دا غلام اے ایکوں سماجی کارکن آہدن ۔ ہُݨ تاں ٻہوں سارے این جی اوز ڄم ڳئین ۔ آوازہ لوکیں دے فائدے دامطلب آقائیں دا حاصل کرݨ واسطے خرچ کرکے اپݨا بݨاوݨ دی کوشش اِچ ہن ، انہیں دے مطلوب بھیانک ہوندن ۔ اے خدائی خدمتگار ہِن ذرا ہوشیار تھیوݨا پوسی۔

ہک طبقہ مذہبی لوکیں دا اے دین دی خدمت کریندن ۔ لوکیں کوں نیکی دا رستہ ݙکھیندن۔ سدھے رستے تیں وَل آوݨ دا سبق ݙیندن ۔ اے صرف مسیتیں تیں درسیں تک رہ ڳئین ۔ دنیا دی ترقی تیں چمک نال انہیں دا زیادہ تعلق نہیں۔ پتہ لڳئے جو اندروں اندروں انہیں وچوں وی مگر مچھ موجود ہِن۔ سیاسی جماعتاں بڑیندن ۔ اسمبلیں دے ممبر بݨدن ۔ تنظیمیں نال تعلق رکھدن ۔ غیر ملکیں دے ایجنسی نال ڳنڈھیج ویندن ۔ ملخ ، قوم کوں فائدہتھیوے یا نہ انہیں کوں مطلب نہیں ۔ ایہ ضرور آکھسوں جو اینجھے مذہبی لوکیں دی تعداد ٻہوں گھٹ اے۔

صفتیں والے لوک وی ہن جہڑے کھاندے پیندے وی ہِن لوکیں دی خدمت وی کریندن ۔ انہیں دے خوشیں ، غمیں وچ شریک وی تھیندن ۔ عزت تیں نیک ناںوی رکھدن ۔ معاشرہ انہیںکوں چنگے لوکیں دی لسٹ اِچ رکھدے تیں انہیں دی عزت وی کریندے پر انسان تاں وَت انسان اے خطا دا پُتلا اے ۔ اوندے کول ڄاݨ ٻجھ تیں نیت ارادے کنوں بغیر وی کجھ نہ کجھ تھی ویندے جیڑھا اَٹے اِچ لوݨ دے برابر ہے ۔ انہیں دیاں جتھاں چنگائیاں ہن اُتھا ںکجھ کوتاہیاں وی ہِن جیڑھیاں قابل معافی ہوسن۔

اپݨی محنت نال بݨیئے ہوئے امیر ، جنہاں دا رہݨ سہݨ ٻہوں اُچی سوسائٹی اِچ نہ ڳݨیا ونڄے ، درمیانی تیں اَدھ آلا طبقہ ، جہڑا شرفا تیں چِٹے کپڑے پاوݨ والیاں دا ہے جہڑے اوکھے سوکھے تھی تیں اپݨا بھرم رکھدن ۔ معصوم لوک جہڑے کہیں نہ کہیں دے نقصان دا نہ سوچیندن نہ کریندن ۔ سخت جان تیں محنت مزدوری کرݨ والے جنہیں کوں سوائے روزی روٹی تیں آپݨے ٻالاں دی صحت ، تعلیم تیں روٹی دے ٻیا کجھ سُجھدا اِی نہیں ۔خود چھک تاݨ تے گزارا کریندن تیں لوکیں دی خاطر خون پسینہ ہک کر ݙیندن ۔ کجھ لوک مزاج ، اپݨے اندر رکھدن تیں زندگی دا کِھلݨ تے کھلاوݨ تیں رکھدین نہ آپ مایوس تھیندن نہ ݙوجھیں کوں تھیوݨ ݙیندن ۔ کجھ لوک عقلمند ہوندن اے لوک احسان مند وی ہوندن ، احسان دا بدلہ ضرور ݙیندن ، اے او عقلمند ہِن جہڑے انڳلیں تیں ڳݨیئے ونڄ سڳدن۔ سبحان اللہ ! کئی ٻہوں مِٹھے ، پیار کرݨ آلے ، مخیر ، ہمدرد ، نرم دِل رکھݨ والے ، پڑھیئے لکھیئے ، دیانتدار تیں حساب کتاب دے کھرے ہوندن ، رشتے داریں، ڳوانڈھیں تیں سنگتیں دا ہتھ ونڈاوݨ آلے ہوندن ۔ اے سچے تیں کھرے انسان ہِن اے چنگے پیئو ، پُتر ، گھر دے بھرا ، ہمسائے ، سڄݨ ٻیلی ، شہری تیں اَݨ مُل لوک ہوندن ، ایہو طبقہ خدا تیں یقین رکھݨ والا ، اونکوں منݨ والا تیں اوندے حکمیں تیں عمل کرݨ آلا ہوندے۔

ہک طبقہ معاشرے واسطے گند دا کیڑا ہوندے اوندا دھرتی تیں ہووݨ دھوکہ ، فریب تیں نقصان اِی نقصان ہوندے۔ جیندا جڳ تیں رہݨ دا کہیں کوں فائدہ نہ ہووے اوندا ایں دنیاں تیں آوݨ نہ آوݨ ، رہوݨ نہ رہوݨ برابر ہے ۔ اِنہائیں دے وچوں کجھ لوکیں تیں انہاں دے کرتوتاں دا ہر ہک کوں پتہ ہووے تاں جے او بچ ونڄݨ ۔ اے لوکی اکثر وڳڑییہوئے ہوندن انہیں دی اصلاح مشکل ہوندی اے ۔ قانون ، ہتھکڑیاں تیں جیلاں انہیں دا کجھ نہیں کر سڳدیاں ۔ اُلٹا انہیں کوں اے جرم تیں گناہ اِچ پکا کر ݙیندن ، او سمجھدے جو ساݙے گناہ تے جرم دی آخر حد ایہا ہے جیڑھی اساں بھڳتا اَئے ہیں ایں توں ودھ تیں ساݙا کوئی کیاکر گھنسی ۔ انہیں دے کئی رنگ تیں کئی بہروپ ہوندن ۔ اے چالباز تیں مداری ہوندن ۔ نہ صبر نہ شکر نہ حس نہ رحم دا جذبہ نہ انسانیت ، بندہ ہک واری سارے کپڑے لہا تیں بازاریں اِچ پھر ݙیکھے تاںاوندے شرم دے پردے تاں ہٹ ویندن ایہو حال اُنہاں لوکاں دا ہے انہیں کنوں دوری انہاں دے نال میل ملاپ اِچ احتیاط تیں سوچ سمجھ تیں انہیں نال متھا لاوݨ دی ضرورت ہے ۔ لکھݨ آلیں کوں انہیں دا ذکر کرتیں شرم آندی پئی اے ، پتہ نہیں انہیں کوں خود کیوں نہیں آندی۔

اَحٖ دنیا اِچ ساریں کنوں وݙی بیماری جہالت اے جاہل نہ کجھ سمجھدے نہ سمجھݨ چاہندے ، نہ عمل کر سڳدے ۔ اوکوں سمجھ اِی کائنی تاں وَل عمل کیویں کریسی ، اے تاریخ دا سچ ہے جو جݙاں دی جہالت کٹھی تھئی تیں معاشریں کوں گُھٹ گھدے ، تیں لوکی خدا کوں بھل تیں اوندے شریک بݨا ٻیٹھن ، اوڈھائیںاوڈھائیں رب سائیں انہیں کوں سدھا کرݨ واسطے اپݨا پیغام رسولیں دے ذریعے بھیڄے ، ثابت تھیا جو حق سچ کوں چھوڑݨ آلے گمراہ تھی ویندن ، گمراہی تباہی دا نہ ختم تھیوݨ آلا ہک غار اے جیندے اِچ اندھارا اِی اندھارا ہے۔

انہیں لوکیں وچ انتہائی غربت دے ماریے ، تِرسے ، بدخوہر ویلھے لوکیں تیں نظر ،تیں برا سوچݨ آلے ۔ کھلواڑے عاشق مزاج ذہن آلے ، ہر ویلے مسکین صورت بݨائی رکھݨ والے یعنی بگلہ بھگت ، شرارتی ، عقل دے اندھے ، شوخ شٹنگ خواہ مخواہ دے مچلے ، لِسے اِی لِسے ، غمگین صورت ، احسان کوں نہ منݨ آلے ۔ گُندرے (وݙے خطرناک) منافق (اندر وں کجھ تیں ٻاہروں کجھ)مِٹھے چالباز (بھیݙاں ورگے) کھوٹے ، چن دے ٹوٹے پر دِلاں دے کھوٹے ایویں ہک وݙی ساری قطار اے جیڑھی ایں تندیر اِچ شامل اے ، وݙے ݙاکو ، چور ، اُچکے ، حق مارݨ آلے ، گھٹ تولݨ آلے ، ناجائز منافع کرݨ آلے ، ٹارگٹ کِلر ، دہشت گرد ، بھتہ خور ، اغوا تیں اجتماعی آبروریزی کرݨ آلے زانی تیں کِھݙکار سارے شامل ہِن کِتلے تائیں سُݨسو کِتلے تائیں سُݨیسوں۔

اِتلا ڈھیر ساریاں ڳالھیں کرݨ دا مقصد اے نہیں جود ھرتی توں انصاف مٹ ڳئے یا نیکی مُک سُتی اے ، گناہیں دا چرچا ہے ۔ ہر بندہ گناہ گار تیں ظالم بݨ ڳئے ۔ بندیں دی اصلاح کیتے ربّ سائیں پچھلے وقتیں وقفے وقفے نال تیں ضرورت دے مطابق آپݨی مخلوق تیں خود ترس کھادے انہیں دی ہدایت واسطے ہک لکھ چوّی ہزار پیغمبر تیں رسول بھیڄے جنہیں اوندا پیغام اصل حالت اِچ مخلوق تک پُچائے تاں جے او بُھلیا ہویا سبق ولا یاد کرݨ تیں بُرائی دا رستہ چھوڑ تیں چنڳائی آلے رستے تے وَل آوِن ۔ ہر بندہ ذی عقل ہے لچک رکھدے ، نیکی بدی کوں سمجھیندے ۔ ایں سانگے ہر بندہ آپݨی آپݨی جاہ تیں جیڑھی حالت اِچ ہووے جیڑھا کم کریندا ہووئے نیکی کوں پھیلاوݨ دا کم کریندا ہووے ، ساݙے پیغمبر نبی سئیں حضرت محمد صلی اللہ علیہ وسلم دنیا تیں مکمل ہدایت گھن تیں آئے اونکوں کھول کھول تیں بیان کیتا۔ دنیا ، دھرتی ، کائنات دے چھوٹے توں چھوٹے تیں وݙے توں وݙے مسئلے دا حل ݙسا ݙتا ڳیا ۔ کوئی ڳال پوشیدہ نہ رکھی ڳئی ۔ ساݙے رسول سئیں دنیا تیں آوݨ والے چھیکڑی نبی ہَن ۔ انہیں دے بعد قیامت تائیں کوئی نبی وَل نئیں آوݨاں ۔ ربّ سچے نیکی دی دعوت ݙیوݨ تیں اوندی مخلوق کوں سِدھا رستہ ݙکھاوݨ دا فریضہ ہر مسلمان بندے تیں سٹ ݙتے تاں جو ہدایت دے ݙیوے سدا ٻلدے رہوِن۔ ایہ سب کجھ لِکھݨ دا وݙا مطلب ایہو اے چنگے معاشرے ، چنگے لڳݨ واسطے چنگائی دا رستہ اپناوݨ ضروری ہوندے ، اِت واسطے تہاݙی ساݙی ساریں دی اے ذمہ داری اے جو خدا دے بندیں کوں جہنم دی بھاہ توں بچاوݨ تیں جنت آلے پاسے گھن آوݨ دی مہورت جاری رکھوں ۔ خدا اُنہائیں دی مدد کریندے جیڑھے آپݨی مدد آپ کریندن ۔ اے ساݙا ایمان اے ، نیک بݨو ، نیکی پھیلائو ، نیکی دے کم کرو تاں جڳ دے سارے اندھارے سوجھلے وچ بدل ویسن ۔ ربّ تعالیٰ دے سچے کلام پاک تیں رسول سائیں دے ݙسائے ہوئے رستے تیں انہیں دے ساتھیں دے عمل آلے طریقے تیں چلݨ دی روشنی کوں پھیلائو۔

بندہ کرے کوَلِیاں میݙا رب کرے سَولِیاں

حوالہ

کتاب: پیریں دے ٻیر ، مصنف : پروفیسر(ر) ملک منظور احمد بھٹہ، چھپیندڑ: جھوک پبلشرز ملتان