لوبھی ٹھیکیدار
ہاں بھئی ݙیہاڑی کماوݨی ہے؟… ٹھیکیداراظہر مزدوریں دے اَݙے تے موٹر سائیکل کوں بریک لا کے پُچھیا۔
جیا سئیں!
جے تائیں سارے مزدور اوندے چارے پاسوں کٹھے تھی کے پُچھݨ لڳے کم کیا ہے؟
کوٹھی دے ایرے بھرݨے ہِن۔ ٹھیکیدار اظہر جواب ݙتا
عوامی کم ہے یا ٹھیکیداری؟ مزدوریں پُچھیا
ٹھیکیداری!
ݙیہاڑی کیا ݙیندے پئے وے؟
سو روپے
سئیں ݙیہاڑی تاں ٻہوں تھوڑی ہے‘ مزدوریں دی ݙیہاڑی تاں ہک سو ویہہ روپے عام چلدی پئی ہے ۔ مزدوریں آکھیا:
بھائی ایہ مستقل ٹھیکیداری کم ہے تہاݙی مرضی مہینہ کمائو ݙو مہینے یا سال پر تہاݙی ݙیہاڑی لڳی رہسی تے کم نہ مُکسی ۔ ٹھیکیدار آکھیا:
چلو سئیں تساں ہک سو ݙاہ روپے ݙیواہے‘ جتنے مزدور لوڑ ہوون ڄلدے ہیں ۔ ہک اڳواݨ مزدور آکھیا:
میکوں 5مزدور لوڑ ہن ۔ سو روپے نال جنہاں ڄلݨاں ہووے اوہ میݙے نال ڄل سڳدن پر شرطِ جو اوہ مزدور ڄلسن جنہاندے سائیکل اپݨے ہوون۔ ٹھیکیدار آکھیا
اوہ آہدن تاں ’’جئیں رات نہ کھادی اوں اَگھ نہ پُچھیا‘‘۔ پنج مزدور اپݨے اپݨے سائیکل تے اوندے نال ٹُر پئے۔
اُستاد اسلم! ایہ گھن مزدور ‘ ہُݨ توں ڄاݨ تے تیݙ ا کم ‘ میں شیخ دی کوٹھی تے ویندا پیاں۔ اظہر ٹھیکیدار آکھیا
سئیں شیخ آلی کوٹھی تے وی مزدور تھوڑے ہن ‘ ہُݨے اُستاد قاسم تہاݙا پُچھ کے وَل ڳئے تے آہدا ہا ݙو مزدور نہیں آئے ۔ مستری اسلم آکھیا
چلو اَڄ وَل تُساں 4مزدوریں نال گزارہ کرو تے ایہ پنجواں مزدور میں نال گھدی وینداں۔ ٹھیکیدار آکھیا تے چلا ڳیا
اِنوں اُستاد اسلم تے اُستاد سعید چوںمزدوریں نال کم شروع کر ݙتا ‘ ولدے ݙینہ جُٹ مستریں دا مزدوریںسمیت ٻیا وی ٹھیکیدار لا ݙتا ‘ لیبر کم کوں چھکیا تے ہفتے دے اندر ایرے بھریج ڳئے ‘ جمعرات کوں ڈی پی سی پا کے 5وڄے لیبر فارغ تھی ڳئی ۔ 6وڄے ٹھیکیدار آیاتاں مستری مزدور انتظار اِچ اُٻاسیاں ٻیٹھے ݙیندے ہَن ۔ اوہ موٹر سائیکل توں لتھا تاں ساری لیبر نیڑے تھی ڳئی ۔ سئیں پہلے میکوں پیسے ݙیوو کیوں جو میں دور اپݨے گھر علی پور ونڄݨے ۔ ہک مزدور اُٻاہل نال آکھیا:
تیݙیاں کتنیاں حاضریاں ہن؟
سئیں پورا ہفتہ!
ایہ گھن 2سو روپے تے باقی 4سو روپے تیکوںاَڳلے ہفتے مل ویسن ۔ ٹھیکیدار ذرا اڳوں تے ودھدیں ہوئیں آکھیا:
سئیں ایہ کیا؟
مہربانی کرومیکوں پیسے پورے ݙیوو! ایہ ݙو سو تاں میݙا آوݨ ونڄݨ دا کرایہ لڳ ویسی ‘ گھر آلیں کوں میں کیا ونڄ ݙیساں؟۔ اوہ مزدور جتنا رڑدا پٹیندا ریہا ٹھیکیدار اوندی ہک نہ سُݨی تے اوہ ایویں ݙوجھے مزدوریں کوں وی ݙو ݙو سو تے مستریں کوں پنج پنج سو روپے ݙیوݨ لڳا لیکن ساری لیبر پوری پیمنٹ گھنݨ دا مطالبہ کیتا ۔ کہیں آکھیا میں اپݨی ٻڈھڑی ماء دی دوائی گھنݨی ہے ‘ کہیں آکھیا میݙے ٻالیں دے کپڑے کائنی تے کہیں آکھیا میݙے گھر اَٹّا دال مُک ڳئے ہن پر ٹھیکیدار ہکو گُر مُکایا جو میکوں مالکیں کنوں پیسے ملئے اِی کائنی ۔ نویں ہفتے تساں سارے شیخ آلی کوٹھی تے آ ونڄاہے تے پیسے تہاکوں آوݨ نال مِل ویسن ۔ آخر مستری تے مزدور بیچارے بے وس تے مجبور تھی کے اپݨے اپݨے گھر دو ٹُر ڳئے۔
اصغر مزدور اپݨے گھر آیاتاں اڳوں اوندی ماء دی حالت پہلے کنوں زیادہ خراب ہئی کیوں جو اَڄ دوائی دا ناغہ تھی ڳیاہا۔ تہوں اوکوں دورے پووݨ لڳ پئے ۔
امّاں دی دوائی آندی ہئی؟اوندی ذال عظمت پُچھیا ۔
ٹھیکیدار صرف2سو روپے ݙتے ہِن تے اوہ وی ہک سو مزدور دا ݙیوݨاں ہم جو اوں گھن گھدے تے باقی ہک سو دے نقد سودے گھن آیا ہاں کیوں جو پچھلا کھاتہ ادا کیتے بغیر دکاندار ٻئی اُدھار ݙیوݨ توں انکار کر ݙتے۔ اصغر ہک ٹھڈا ساہ بھر کے ذال کوں ݙسایا۔ ہائے اللہ تے ہُݨ کیا بݨسی؟ کہیں کنوں اُدھار سُدھار چا کے امّاں دا علاج کروا ‘ اینکوں ہسپتال گھن ڄل ۔ عظمت ݙاڈھی پریشانی نال آکھیا
اصغر نال دے ہمسائے ملک یارو دا کُنڈا ونڄ کھڑکایا۔
کون؟ اندروں (تریمت دی) آواز اَئی۔
بی بی میں تہاݙا ہمسایااصغر ہاں
کیاآہدیں ؟
ملک صاحب کوں مِلݨے!
اوہ تاں سُتے پئین ۔
اَڄ اَٹھ وڄے نال سُم ڳئین خیر تاں ہے؟
ہاہا خیر ہے پر توں ݙس کیا اَہدیں؟
بی بی جیویں جو تہاکوں پتہ ہے میݙی امّاں سخت بیمار ہے تے میں ہُݨ اوکوں ہسپتال داخل کراوݨ چاہنداں‘ تہوں میکوں کجھ پیسے لوڑ ہن۔
بھائی اوہ نندر پئین توں کل سویرے اُنہاں کوں مِل گھنیں۔ تریمت ایہ آکھ تے دروازے توں واپس ہٹ ڳئی۔
اصغر واپس ولیا آندا ہا جو ہک کار ملک یارو دے دَر تے آ کے ہارݨ ݙتا ‘ تھوڑی دیر بعد ملک یارو دروازے دے ٻاہروں سرکڈھ کے ݙٹھا تے وَل ٻیٹھک دا دروازہ کھول کے آکھݨ لڳا آئو سئیں قریشی صاحب آئو! تے وَل ݙو بندے کار اِچوں نکل کے ٻیٹھک اِچ چلے ڳئے ۔ اِنوں اصغر اپݨے ٻوہے دے اڳوں کھڑ کے امیری تے غریبی دا ایہ فرق ݙہدا ریہاتے وَل ہک دولت مند ہمسائے دی بے پرواہی ݙیکھ کے مایوسی دے عالم وچ اصغر واپس اپݨے گھر آڳیا۔
ݙینہہ تھیا تاں مسیت اِچ اعلان تھی ڳیا جو اصغر دی ما بقضائے الٰہی فوت تھی ڳئی ہے جیندی نماز جنازہ دا اعلان بعد اِچ کیتا ویسی۔
ولدے ݙینہہ اِنوں شیخ آلی کوٹھی تے پہلے کنوں لگی ہوئی لیبر اِچوں صرف ݙو مستری تے ݙو مزدور آ ڳئے تے باقی لیبر نہ آئی ۔ وعدے دے مطابق استاد اسلم تے اُستاد سعیدوی پُڄ ڳئے لیکن انہاں دے رلے کم کرݨ آلے مزدوراں اِچوں ہک وی نہ آیا ۔ جے تائیں اِنوں ٹھیکیدار وی موٹر سائیکل تے ٹھک آن تھیا۔ اُستاد اکبر! کیا ارادہ ہے کم نہیں کرݨاں کیا؟ ٹھیکیدار آکھیا
سئیں کم کرݨ دا ارادہ ہاتاں آئے ٻیٹھے ہَیں ۔ اُستاد اکبر جواب ݙتا
تے وَل کیا دیر ہے‘ کیوں ٻیٹھے وے9وڄدے پئین کم شروع کرو ! ٹھیکیدار آکھیا
سئیں تسا ںآہدے ہاوے جو نویں ہفتے ڈبل سٹوری دی چھت تے ٹسّو لاوݨے لیکن ݙو مزدوراں نال ڈبل سٹوری تے تاں کم نہیں چل سڳدا ۔ اُستاد اکبر آکھیا
کیوں بھائی تہاݙے مزدور کیوں نہیں آئے؟ ٹھیکیدار اُستاد اسلم کوں مخاطب کرکے پُچھیا:
سئیں ساکوں کیا پتہ کیوں نہیںآئے‘ اوہ کوئی ساݙے ٻدھل (پابند) تھوڑے ہن ۔ اُستاد اسلم جواب ݙتا۔
چلو اَڄ اُستاد سعید تے توں چھٹی کر گھنو ‘ کل وَل آواہے۔ٹھیکیدار آکھیا:
چلو سئیں اساں اَڄ چھٹی کر گھندے ہیں لیکن تُساں ساݙی پچھلے ہفتے دی پیمنٹ ݙیو و‘ تہاݙا اَڄ پیمنٹ ݙیوݨ دا وعدہ ہا ۔ اُستاد اسلم آکھیا ۔
اوئے یار میں ٻہوں کوشش کیتی ہے لیکن پیسے میݙے ہتھ پلے کہیں پاسوں نہیں آئے‘ خیر ہے پیسے تہاکوں مل ویسن لیکن تساں کل کم تے ضرور آئو ! ٹھیکیدار آکھیا
سئیں اساں کل کم تے نہیں آندے تساں ساکوں روز ایویں ٹالی نہ رکھو پیسے ݙیوݨ دی ڳالھ کرو ! اسلم دے نال کھڑے ہوئے اُستاد سعید آکھیا۔
استاد اکبر تساں اپݨا کم شروع کرو ہک مزدور اُستاد قاسم رکھ گھنے تے ہک توں ‘ الماریاں پلستر کر گھنو ۔ ٹھیکیدار اُستاد سعید دی ڳالھ داجواب ݙیوݨ دے بجائے اُستاد اکبر دو متوجہ تھی کے آکھیا۔
حاضر سئیں ! جے تائیں اُستاد اکبر تے اُستاد قاسم اپݨے کم تے چلے ڳئے۔
ٹھیکیدار صاحب ! ذرا ساݙے حال تے وی رحم کرو ‘ مستری سعید دوبارہ آکھیا
ٹھیک ہے تساں خمیس آ ونڄاہے تہاݙا حساب کلیئر کر ݙیساں ‘ ٹھیکیدار آکھیا
کائنا سئیں ساکوں خمیس دی پیشی نہ ݙیوو۔ اُستاد سعید آکھیا
جے تائیں اِنوں شیخ امجد آ ڳیا ۔ اظہر صاحب ! کیوں مستریں کوں چھٹی ݙتی ٻیٹھے وے؟
سئیں تہاݙا کم تھیندا پئے ‘ اِنہاں کوں ٻئے کم تے لاوݨاں ہا لیکن مزدور نہیں پئے ملدے ۔ ٹھیکیدار اظہر آکھیا:
سئیں تہاݙے نال ساݙی ڄاݨ سُنڄاݨ تاں کائنی ‘ لڳدے جو تُساں ایں کوٹھی دے مالک ہو ‘ ساݙی تہاݙے اڳوں ہک اَرداس ہے جو ٹھیکیدار صاحب ساکوں پچھلے ہفتے دی پیمنٹ وی ݙیوݨی ہے تے اَڄ وی ساکوں تہاݙی کوٹھی تے کم واسطے سݙ کے چھٹی ݙتی ٻیٹھے ۔ ساݙی اَڄ دی ݙیہاڑی تاں تُرٹ ڳئی لیکن ایکوں آکھو ساکوں روز دے تُھݙے نہ ݙیوے تے ساݙے پچھلے پیسے برائے مہربانی ݙیوے۔ مستری اسلم تے سعید آکھیا :
کیوں بھائی اظہر کیا ڳالھ ہے؟ شیخ امجد پُچھیا:
سئیں پیسے انہاں کوں آکھیم خمیس کوں آ کے گھن ونڄاہے‘ جتھوں تک اِنہاندی ݙیہاڑی تُرٹݨ دا تعلق ہے تاں انہاندے مزدور نہیں اَئے ورنہ میݙے کول تاں کم دی چال ہے ۔ ٹھیکیدار آکھیا:
سئیں مزدورساݙے چاچے مامے دے پُتر نہ ہن تے نہ اِی ساݙے ٻدھل ہن ‘ ایہ خود اَݙے توں پکڑ کے گھن آیا ہا تے وَل جنہاں کوں ہفتہ کماوݨ توں بعد اڳوں پیمنٹ اِی نہ ملے تاں وَل اُنہاں کیویں آوݨاں ہا۔ مستری اسلم تے سعید آکھیا:
یار اظہر تیݙے کولوں لیبر کیوں نہیں ٹِکدی‘نِت نویں اَناڑی مستری تے مزدور لائی رکھدیں‘ کاریگر تاں کوئی تیݙے کول ٹِکدا اِی نہیں‘ انہاں بچاریاں کوں نہ رول جے ݙیوݨ دی نیت ہئی تاں انہاں کوں پیسے ݙے ۔ شیخ امجد آکھیا:
مجال ہے سئیں خمیس اِ نہاں کوں پیسے مِل ویسن ‘ ٻیا حکم؟ اظہر ٹھیکیدار آکھیا:
جے توڑیں مستری اسلم تے سعید چلے ڳئے ۔ ہُݨ شیخ امجد تے اظہر ٹھیکیدار ٹُر پھر کے کوٹھی دے کم دا جائزہ گھندے ودّے ہن ۔ اظہر صاحب !ذرا ایہ برآمدے دا پِلر ݙیکھو ناں! شیخ امجد ذرا اجھک کے آکھیا:
اوئے سئیں ایہ پلستر اِچ سدھا تھی ویسی ۔ ٹھیکیدار آکھیا:
پلستر اِچ تاں سِدھا تھی ویسی پر اُساری اِچ ݙنگا کیوں ہے؟ شیخ امجد آکھیا
کوئی وݙی چھوٹی سِلھ آ ویندی ہے ایویں تھی ویندا رہندے ۔ ٹھیکیدار آکھیا
اظہر صاحب میکوں بے وقوف نہ بݨائو ! ایہ کاری گر تے اَناڑی دا فرق صاف نظر آندا کھڑے ‘ اوں پلّر کوں وی ݙیکھو کتھائیں کوئی جھول ہے؟ ایہ ہک کاریگر دا بݨیا کھڑے‘ اُستاد نذر ہک پختہ کاری گر ہا اوہ جیڑھا کم وی کر ڳئے خوب کر ڳئے ۔ میکوں سمجھ نہیں آندی جو کوئی اچھا کاری گر توں کیوں نہیں رہوݨ ݙیندا۔ حالانکہ اُستاد نذر دے بارے میں تیکوں بار بار آکھیا وی ہا جو ایکوں قابو رکھیں ۔ شیخ امجد ناراضگی دا اظہار کریندیں ہوئیں آکھیا:
اوئے سئیں میں تہاݙی آکھ تے اوندی ہر ڳالھ منّی ہے ‘ میݙے کول اوہ ہزار روپے ایڈوانس گھن ڳیا ہا ‘ اوہ وی اڄاں اوندے کول کھڑے ہن ‘ میکوں تاں اوں رول ݙتے نہ پیسے واپس کریندے تے نہ کم تے آندے ۔ اظہر آکھیا:
اظہر صاحب کم توں اُستاد نذر کنوں کرواتے بھانویں کہیں ٻئے کنوں میݙا تیݙی لیبر نال کوئی تعلق نہیں‘ میکوں تاں صاف ستھرا کم چاہیدے ۔ شیخ امجد آکھیا تے کار اِچ ٻہہ کے چلا ڳیا ‘ سڑک نال ویندا پیا ہا جو اتفاق نال اڳوں ہک مکان تے اُستاد نذر کم کریندا نظر آڳیا ۔ شیخ امجد کار کوں بریک لا کے اَواز ݙتی ۔ اُستاد نذر!
جی سئیں ! اُستاد نذر جے تائیں گو توں تلے لہہ کے کار دے کول آ ڳیا‘ اِنوں شیخ صاحب وی کار توں ٻاہر نکل آیا۔ اُستاد نذر ! توں میݙی کوٹھی دا کم چھوڑ کے چنگاں نہیں کیتا ‘ اِتھوں تیکوں زیادہ ݙیہاڑی پئی ملدی ہے کیا؟ شیخ امجد مصافحہ کریندیں ہوئیں آکھیا:
شیخ صاحب ایویں شرمندہ پئے کریندے وے ݙیہاڑی تاں میں اِتھاں وی اوہا پیا گھنداں پر اِتھاں ہفتے بعد پیمنٹ پوری مل ویندی ہے لیکن تہاݙے ٹھیکیدار صاحب کنوں میں ہُݨ تائیں وی اپݨی کمت 1500روپے اُڳڑیندا وداں۔ اُستاد نذر آکھیا:
کیا 1500تیݙے اظہر ݙیوݨے ہِن؟ شیخ امجدحیرانی نال پُچھیا:
جیا سئیں!
اچھا آ ٻہہ میݙے رَلے کار اِچ!
سئیں میݙا مال مسالا بݨیا لاتھے ایہ خراب تھی ویسی۔
میں تیکوں ہُݨے 10منٹ اِچ اِتھائیں واپس پُچیساں ‘ جے اوہ تسلیم کریندے تاں تیݙے پیسے وی تیکوں میں ݙے ݙیساں ۔ شیخ امجد کار دا گیٹ کھولیندیں ہوئیں آکھیا:
اُستاد نذر کار اِچ ٻیٹھا تاں شیخ صاحب کار پچھاں موڑ کے اپݨی کوٹھی تے آ ڳیا ۔ اُستادنذر کوں ݙیکھ کے ٹھیکیدار اظہر دے منہ تے کویلیاں ٹُرݨ لڳ پیاں۔ اوئے سئیں اُستاد نذر کوں اَڄ ڳول کے کتھوں گھن آئے وے؟ ٹھیکیدار اظہر پھکی کھل کھلدیں ہوئیں پُچھیا:
اُستاد نذر دے بقول تہاݙے کول ایندے 1500روپے بقایا ہن‘ جݙاں جو تیں اَڄ سویرے آکھئے جو اُستاد نذردے کول میݙے1000روپے ایڈوانس ڳئے ہوئے ہن ‘ میں ایہ سچ تے کوڑ نتارݨ کیتے ایکوں اِتھاں تیݙے کول گھن آیا ہاں۔ شیخ امجد آکھیا:
کیوں بھائی میں تیݙے کیڑھے 15سو روپے ݙیوݨے ہِن؟اظہر ٹھیکیدار اُستاد نذر کوں مخاطب کرکے پُچھیا:
ایہ ݙیکھو سئیں ایہ 17مارچ دا تہاݙا لکھیا ہویا 1500بقایا ہے؟ اُستاد نذر کھیسے اِچوں کاپی کڈھ کے ٹھیکیدار دے اڳوں رکھ ݙتی۔
تے جیڑھے 1000روپے میں تیکوں ایڈوانس ݙتے ہن؟ اظہر ٹھیکیدار سوالیہ انداز اِچ پُچھیا:
ایہ ݙیکھو 13جنوری کوں تُساں اپݨے ہزار روپے کٹ کے میکوں 500روپے بقایاݙتے ہن‘ ایہ تہاݙے ہتھ دا لکھیا ہویا ہے؟ اُستاد نذر کاپی دے ورقے پرت کے حساب کتاب صاف ݙکھا ݙتا۔
چلو میں وی اپݨی ڈائری تے ݙیکھساں جے تیݙا کوئی حساب باقی ہے تاں حاضر! ٹھیکیدار اظہر ذرا نظراں نیویاں کرکے آکھیا:
اظہر صاحب ! کم بند کر ݙیؤ ‘ تھئے کم دا میݙے نال حساب کرو‘ باقی کم میں تیݙے کولوں نہیں کرویندا ۔ شیخ امجد ذرا جذبات نال آکھیا:
اوئے سئیں ۔ ش … ش … شیخ صاحب ناراض نہ تھیوو ہُݨ تہاکوں کم دی کوئی شکایت نہ ہوسی۔ ٹھیکیدار اظہر پھکی کِھل کھلدیں ہوئیں خوشامدی لہجے نال آکھیا۔
میں تیݙی ٻئی کوئی ڳالھ نہیں سُݨݨ چاہندا‘ میں اُستاد نذر کوں ایندے کم تے چھوڑ کے واپس آندا پیا توں اپݨا سامان کوچ کرݨ دی تیاری کر! شیخ امجد کار اسٹارٹ کریندیں ہوئیں آکھیا تے چلا ڳیا ۔ اِنوں اظہر ٹھیکیدار شیخ دی شوخی ݙیکھ کے جلدی نال اوندے ہک یار سیٹھ سلیم کوں موٹر سائیکل تے چا گھن آیا ۔ شیخ امجد واپس آیا تاں اڳوں اوندا یار سیٹھ سلیم آیا ٻیٹھا ہا ۔ سیٹھ صاحب اَڄ کیویں بُھل کے قدم رنجے فرمائے وے ۔؟ شیخ امجد کار اِچوں نکلدیں ہوئیں آکھیا:
اوئے سئیں اظہر تہاݙا وی یار جُٹ ہے تے ساݙا وی یار ٻیلی پر میں سُݨیے جو اَڄ تُساں ایندے نال ناراض تھئے کھڑے وے ۔ سیٹھ سلیم شیخ امجد کوں ڳلکڑی پیندیں ہوئیں آکھیا:
آئو ذرااظہر صاحب دا تھیا کم وی ݙیکھو ‘ شیخ امجد سیٹھ سلیم دا چنبا نپ کے ذرا مکان ݙکھاوݨ لڳا‘ پوڑیاں چڑھݨ لڳے تاں سیٹھ سلیم ذرا پوڑیاں کوں غور نال ݙٹھا تے آکھݨ لڳا ایہ کیا؟ اظہر صاحب پوڑی تاں کھڑاویں چڑھی کھڑی ہے ‘ ایندی ناپ پوری نہ گھدی ہاوی کیا؟ سیٹھ سلیم آکھیا
ایہا ڳالھ تاں میں ایکوں آکھی ہے پر ایہ منیندا اِی نہیں ۔ شیخ امجد آکھیا
جے توڑیں ݙوجھی منزل تے پُڄ ڳئے ۔ سیٹھ صاحب پہلے ایں شڈ دی دھار نانگ دی کار وَل کھاندی ݙیکھو۔ شیخ امجد آکھیا
سیٹھ صاحب ہک پاسوں کھڑ کے شڈ دی دھار کوں غور نال ݙٹھا تے وَل جے توڑیں شیخ صاحب اوکوں ہک ٻئے کمرے وچ گھن ڳیاتے آکھݨ لڳا ایہ الماریاں وی ݙیکھو تے خاص طور تے انہاندیاں شیلفاں دی موٹائی ݙیکھو ! کوئی ہک انچ موٹی ہے تے کُئی 2انچ ۔ وایہ ناپو تاں کہیں دا وایہ فٹ ہے تے کہیں دا وایہ سوا فٹ ۔ دیواریں دا پلستر ݙیکھو تاں اڄاں چونا نہیںتھیا پہلے بھردا کھڑے‘ اَناڑی مستریاں کنوں کم کرا کے میݙی کوٹھی دا تاں ایں کٻاڑہ کر چھوڑئیے ۔ تُساں کیا چاہندے وے جو اڄاں ٻئی بربادی وی میں ایندے کولوں کراواں؟شیخ امجد کاوڑ بھرئیے لہجے نال آکھیا
کیوں جو سیٹھ سلیم تعمیراتی کم دی بریک بینی نال پرکھ رکھدا تے سمجھدا ہا ‘ اُوں ساری کوٹھی اِچ پھرٹُر کے کم دا جائزہ گھدا تے وَل آکھݨ لڳا ۔ اظہر صاحب ! کم تیݙا واقعی ناقص ہے ‘ افسوس جو میں تیݙی کوئی سفارش نہیں کر سڳدا ‘ تیݙا کم معیاری کائنی ‘ کیوں جو توں پیسے کماوݨ دے چکر تے حرص و ہوس وچ لڳا ہوئیں ‘تیکوں اپݨیاں ذمہ داریاں وی نہیں پیاں سجھدیاں بھلا میں شیخ صاحب کوں کیڑھی ڳال تے مجبور کراں جو اوہ باقی کم وی تیݙے کولوں کراوے ۔ پردہ دیوار دی ہک پردی دا پلستر اَنڳل نال کھتور کے آکھݨ لڳا ایہ ݙیکھو اپݨے کم دا معیار ‘ کیا معیاری کم ایویں ہوندے؟
اَڄ مہینہ کھن تھی ڳئے ‘ شیخ امجد دی کوٹھی دا کم اُستاد نذر سنبھالی پئے کیوں جو ٹھیکیداراظہر نال حساب کتاب کرکے شیخ امجد اوکوں چھٹی ݙے چھوڑی ہے پر مستری اکبر تے مستری قاسم کوں انہاندی رضا مندی نال کم تے بحال رکھیا ۔ کجھ ݙینہہ بعد اُنوں اُستاد اسلم تے اُستاد سعید وی کم تے آ ڳئے تے ہُݨ مستریاں سمیت نویں تے پراݨی لیبر اُستاد نذر دے ماتحت شیخ امجد دی کوٹھی تے کم کریندی پئی ہے تے ہُݨ ساری لیبر خوش ہے کیوں جو ہر ہفتے اُنہاں کوں باقاعدگی نال پیمنٹ مل ویندی ہے تے شیخ امجد دی کوٹھی دا کم وی صاف ستھرا تھیندا پئے۔
……
حوالہ
[لکھو | ماخذ وچ تبدیلی کرو]کتاب: پکھی واس (سرائیکی افسانے) فیض بلوچ ، چھاپہ خانہ ، جھوک پبلشرز، ملتان