للیانی

ضلع سرگودھا دی تحصیل کوٹ مومن دا قصبہ۔ کوٹ مومن توں بھلوال ونجݨ آلی سڑک توں 9کلو میٹر دے فاصلے تے واقع ہے۔ جݙاں جو بھلوال توں ایندا فاصلہ 10کلو میٹر ہے۔ اے ہک قدیم تے رقبے دے اعتبار نال وݙا قصبہ ہے جیڑھا 547مربع زمین تے مشتمل ہے۔ ایندی آبادی کھنڈی ہوئی ہے۔ ایندی وجہ تسمیہ دے متعلق قیاس کیتا ویندے جو اے کہیں زمانے اِچ لِلّہ قوم وسایا ہا۔ ہیں نسبت نال ایندا ناں للیانی پیا۔اِتھاں زیادہ تر ملک (ہوشیار پوری) ، شیخ، اعوان، بکھر، راں، لِک، وغیرہ قوماں دے بندے آباد ہن۔ اتھاں دی رہائشی وستیاں وی زیادہ تر اتھاں وسݨ آلیاں قوماں دے ناں نال منسوب ہن جیویں جو محلہ بکھراں، محلہ شیخاں آلا تے محلہ لِک وغیرہ ۔اتھاں طلباء دا ہائی، طالبات دا ہائیر سیکنڈری سکول، ہسپتال، ڈاکخانہ دفتر یونین کونسل، دفتر زراعت، مسلم کمرشل بینک دی شاخ تے ویہہ دے نیڑے کِنوواں دے پراسیسنگ یونٹ موجود ہن۔ اتھاں طلباء دا ہائی سکول پرائمری سطح تے 1901 ء اچ قائم تھیا۔اتھاں دا کِنوں ٻہوں مشہور ہے۔ اِتھاں بابا فتح الدین چشتی تے بابا نظام الدین نامی بزرگاں دے مزارات وی ہن۔ اتھاں دے رہائشی کرنل غلام حسین نے 1971ء دی جنگ اچ جام شہادت نوش فرمایا۔ آپ اتھاں عبد العزیز دے گھر پیدا تھئے۔ بطور کمیشنڈ آفیسر فوج اچ بھرتی تھئے، 1971ء اچ پاک بھارت جنگ حسینی آلے دے محاذ تے لڑی تے قلعہ قیصر ہند تے قبضہ کر یندے ویلھے شہید تھی ڳے، پر شہادت توں پہلے قلعے تے قابض تھی تے ریہے۔ حکومت پاکستان نے بے مثال بہادری دے اعتراف اِچ انہاں کوں بعد از شہادت تمغہ ہلال جرأت عطاء کیتا۔ سرگودھا دے کمپنی باغ دے نزدیکی چوک کوں ا نہاں دے ناں نال منسوب کیتا ڳیا۔ تاں جو آنوݨ آلیاں نسلاں انہاں تے فخر کر سڳن۔ للیانی دی آبادی 1998ء دی مردم شماری دے مطابق 10334نفوس تے مشتمل ہئی ، ایندی موجودہ آبادی تیرھاں ہزار دے نیڑے ہے۔