لانگ مارچ دی کامیابی

مبارخاں عظیم لوگو تہاکوں 9 لکھ مبارخاں ھوون

سبزل دے کوٹ توں ٹردی 15 اکتوبر 2017 دی مارچ کمال تھی گئی۔ اے ڈینہہ تاریخ دے وچ لا زوال تھی گئے کوٹ سبزل وی امر تھی گئے۔ اتھاں ہک ڈینہہ یادگار بنڑسی جڈاں سونے دا سجھ ابھرسی جڈاں صوبہ بنڑسی تے سرائیکیں کوں صوبھ ملسی۔مارچ ٹریے پیر فرید دی کافی وانگوں دھیمے دھیمے۔جمل جہان دا کٹھ ہا سارا سارے لیڈر ہک مٹھ ہن تے آپت وچ شیر شکر ہن سوجھل سانجھ سمولی ہئی۔ سارے ورکر پڑ دے وچ موجود کھڑے ہن ۔ 15 دا درشن سب توں اچا درشن تاریخ دے وچ جیہڑا کہیں نہ ڈٹھا کہیں نہ سنڑیا تاج لنگاہ دی روح شامل ہئی۔ شاہ زمان رب سوہنڑے دی امان دے وچ شامل ہا۔ قافلے اندر رضو شاہ جھمراں پیندا خوش پیا تھیندا ہا۔ ظفرو لنڈ ہا مونجھا مونجھا اسد لنگاہ ظفرو کوں دلاسہ پیا ڈیندا ہا کاررواں ٹردا ٹردا پندھ کریندا آخر آ ملتان پناں۔ ملتان دے وچ استقبال تھیا میں وی شامل ہم ہوں آخری درشن وچ میں ہسپتال کوں چھوڑ تے آیا ہم۔میڈا دل آہدا ہا پیر چماں ہر ورکر دے جیہڑا شامل ہا ہیں مارچ دے وچ اے جلسہ ڈو ڈینہہ دا ہکو جلسہ ہا جیہڑا گھر گھر دے وچ وستی وستی وچ شہر شہر دے وچ۔ چار سو میل دی منزل ہئی۔ اے جلسہ ہر کہیں ڈٹھا ہر کہیں سنڑیا ہک نئیں سنڑیا ساڈے حاکم نئیں سنڑیا جیہڑے ہاسے کار ساڈے کیتے گونگے بنڑ ویندن ڈورے تھی باہندن اکھیں نوٹ تے ہر شے ڈہدیں ہوئیں وی اندھے تھی باہندن ۔ اساں صوفی ہاوں اساں جوگی ہاوں اساں پڑ وچ رہسوں بجھسوں ناں اساں نواں روپ وٹا آوسوں۔ اساں ول آوسوں ساکوں کاوڑ نئیں لگدی ساکوں غصہ مول نہ آوے۔ کاوڑ ہے اعلان تھکیڑے دا اساں تھکسوں نہ اساں ہتھیار نئیں چیندے ساکوں اللہ سئیں خاص ہتھیار ڈتے جیہڑا روز ازل توں ہے نال اساڈے جیندا ناں سرائیکی بجا اے ۔ ہے خاص کلاشی وسبے دی۔ شام سویرے گھروڑ تے ڈیندوں جیہڑا ساڈی دھاں نہ سنڑے گال نہ منے جیہڑا پنج صوبیں دا منکر تھیوے۔ صوفی تاج گوپانگ