لانواں دا ہک گیت

تیکوں پہلی ہے لانواں

  ترڑ ترڑ باغ پھلاں دا تھیوے

لکھی تیݙے ونڄݨ والا جیوے

سانگ لٻوڑے ‘ بابل دی ہے کنوار

لمبڑے جوڑے

آلݙ ڄلوں ملتان ۔ زیارت پیر دی

وݙی ایس عمردراز بھݨیں دے ویر دی     

تیکوں ݙوجھی ہے لانواں………

اینویں ست لانواں لدھیا ویندن تے گھوٹ کنوار دی شادی تھی ویندی ہے ۔ ایندے بعد رخصتی دا موقعہ آندے ۔ کنوار دے گھر والے ݙولی کوں ہنجوں نال رخصت کریندن۔ ݙولی دے گیتاں وچ کنوار دے وِچھڑن ویلے دے جذبات دا اظہار ملدے:

میݙی ݙولی دے وچ گھیو ڑی اماں

میکوں ملݨ نی ݙیندے سکا پیو ڑی اماں

ذرا ݙولی کوں ہُݨ رکھ ڑی اماں

میں تاں ویندی پیاں بناں دے وس ڑی اماں

میݙی  ݙولی دے وچ  گھیو  ڑی اماں

سرائیکی وسیب دیاں اے رسماں ریتاں اپݨی ہک نویکلی بہار رکھدن۔ جھمراں پیندی‘ سہرے ڳاندی ‘ پھل کِیریندی ایں ثقافت دے سُوہݨپ کھٹن وچ نیں آندے ۔ پرنے دیاں اَڄاں کئی رسماں تے انھاں دے گیت چُک ڳن ۔ جیڑھے اتھاں سارے نیں لکھیے ونڄ سڳدے۔ انھاں سہریاں وچ انسانی رشتیاں دے سارے روپ ‘ گھوٹ کنوار دی تعریف ۔ انھاں کیتے دعائیں ‘ بھݨیں دے ارمان ‘ وری ݙاج دی تفصیل تے سہاگ دے شڳناں دی شان بیان کیتی ویندی ہے۔

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان