قیس فریدی ۔ فن شخصیت اَتے شاعری

انتساب

کوٹلہ دیوان دی عظیم دھرتی دے ناں

جیرھی میݙی تے میݙی آل اولاد دی جٖمݨ جاہ ہے

کھائی خیر شاہ دے ناں

جیڑھی استاد محترم سئیں قیس فریدی دی جنم بھومی ہے

مئو مبارک دے ناں

جیڑھی قیس صاحب دی آخری آرام گاہ ہے

مہر حامد علی شاکر سیال                      

موہری اَکھریں توں پہلے خاص خاص ڳالھیں

اے کتاب ہک یادگار کتاب بݨ ویسے کیوں جو ایندے وچ ڈھیر ساریاں یاداں کٹھیاں تھی ڳن ، میں شکر گزار آں جو یادیں کوں محفوظ کرݨ سانگے دھریجہ صاحب قدم چاتے ، میݙے کول کوٹلہ دیوان تشریف گھن آئے ، اللہ پاک اُنھاں کوں خوش رکھے۔ آمین

فرض اے:

میں اے کتاب چھاپ تے کہیں تے احسان نی پیا کریندا ۔ میںاپݨا فرض پوراکریندا پیاں کیوں جو اُستاد قیس فریدی دے سرائیکی قوم تے وݙے احسان ہِن اساں حق ادا نی کر سڳدے پر کوشش ہے جو حق ادا تھیوے۔ اے چیزاں محفوظ تھیوݨ ایں سانگے ضروری ہِن جو قیس صیب دا ناں زندہ رہے ، سرائیکی ماء ٻولی دی خدم تھیوے تے آوݨ آلے طالبعلمیں تے ریسرچ سکالریں کوں سوکھ تھیوے ۔ میں او کم کریندا پیاں جو کوئی طالبعلم بھاویں او پاکستان دی کہیں یونیورسٹی توںآوے یا غیر ملکی یونیورسٹی توں آوے اونکوں قیس صاحب بارے معلوماتی مواد مل ونجٖے ۔ اینکوں میں اپݨا فرض سمجھے۔

ہک صلاء:

جیویں میݙے ٻال شالا جیون ہووِن ، مہر جمیل احمد شاکر سیال ، مہر شکیل احمد شاکر سیال ، مہر وکیل احمد شاکر سیال تے مہر سجاد احمد شاکر سیال میݙا آکھیا مَن تے کتاباں چھپوائی اَمدن ، ایویں جئیں کوں وی اللہ سئیں سوکھ ݙتی اے او وی کتاباں چھپواون، وسیب دے امیر کبیر تے دھن دولت آلے جاگیردار ، سردار ،تمندار ڈھیر سارے ہِن ، کتاباں چھپواون ، غریب لکھاریاں دی مدد کرن تے لائبریریاں بݨواوِن ۔ ݙوہاں جہانیں ءِچ اَجر ملسے اساں کوں اُنہاندی نیکی دا تے میکوں چنگی صلا ݙیوݨ دا، ثواب ݙیسے ۔ انشاء اللہ

روحانی سکون:

ہر سال وانگوں ایں واری وی اساں اپݨے شہر کوٹلہ دیوان کوں میلاد شریف دے موقعے تے سوہݨا بݨائے ، جھنڈیاں لاتن ، دیواراں لکھوائن تے بجلی دے قمقمے لائن ، شہر داراں کوں خوشی تے روحانی سکون ملیئے ۔اساں نعتیں دیاں کتاباں وی چھپوائن۔ اساں سوہݨے ؐدا میلاد منیندے رہسوں تے روحانی سکون حاصل کریندے رہسوں ۔ کیوں جو اللہ سئیں آپ میلاد منائے ۔ اساں انشاء اللہ پہلے وی اساں مختلف شعراء دا نعتیہ کلام چھپوائے آئندہ وی چھپویندے رہسوں۔عاشقان رسولؐ کوں دعوت ہے جو کتاباں میں توں منگواون تے پڑھݨ ، ہدیہ کجھ کینھی صرف دعا دی التجا ہے۔

تعاون کرو:

اُستاد قیس فریدی صاحب بارے جئیں صاحب کول یاداں ہووِن ، مضمون ہووِن ، اُنہاں دا کلام ہووے یا جو صاحبان قیس فریدی صاحب بارے اپݨے مضمون لکھن، او اساکوں بھیجٖن ، تاں جو اے سب کجھ جامع کتاب دا حصہ بݨ سڳے۔ میں اُمید کرینداں جو وسیب دے لوک ایں کم وچ میݙا ساتھ ݙیسن تے تعاون فرمیسن۔

اُروار پار تیݙا ہے:

میݙے اُستاد قیس فریدی سئیں کوں جیویں رحیم یارخان آلے چہندن ایں توں ودھ راجن پور آلے چہندن ، راجن پور ءِچ آپ دے چہݨ آلئیں دی تعداد گھٹ کینھی ۔ آپ دا ضلع راجن پور آ ونجٖ رہ ویندا ہا ، توݨیں جو نشتر آلا پُل نہ بݨیا ہا وَل ٻیڑی تے یا وَل دریا داپاݨی سُکے ہا تاںبحری جہاز تے کشتیں آلے پُل تے اَمدے ویندے ہاسے ۔ میں آکھداں جو سئیں اُروار پار تے سارا وسیب تیݙا ہے۔

کتاب وچ موہری اَکھر:

کتاب وچ موہری اَکھر جینکوں اُردو آلے مارکہ پیش لفظ آکھدن ، دراصل میݙیاں یاداں ہِن ، میں ہُݨ عمر دے ایں حصے ءِچ ہاں جو اپݨے ہتھ نال کجھ نی لکھ سڳدا ۔ اے تاں میݙے عزیز نوجواناں دی مہربانی ہے جو میں اَلینداں تے او لکھدن ، کجھ ڳالھیں چیتے وچوں لہہ وی ویندن ، کجھ یاد اَمدن ۔ اللہ سئیں ’’جھوک‘‘ کوں آباد تے شاد رکھے جو ٻہوں کجھ چھاپ ݙدینے جو کہ تاریخ دا حصہ ہے۔

ہک ارداس:

کتاباں دی اشاعت دا سلسلہ جاری رہسے، میݙی اپݨی جامع کتاب وی امدی پی اے ، اساں اپݨے علاقے اچ کتابیں دی گھنڈ کھلائی دا کٹھ رکھیسوں ، سارے ادیبیں ، شاعریں کوں ارداس اے جو او ضرور آون ۔

شکرگزار آں:

میݙیاں شائع تھیوݨ آلیاں کتاباں بارے جیرھے دوستاں میکوں مبارکباد آکھی اے ، میں اُنہاندا شکر گزار آں تے اُنہاندا وی شکر گزار آں جنہاں تاثرات ، تبصرے لکھن، اخباراں تے کتاباں وچ شائع کرائن۔

حوالہ

کتاب "قیس فریدی ۔ فن شخصیت اَتے شاعری "  پیشکش  : مہر حامد علی شاکر سیال ، ناشر جھوک پبلشرز ، ملتان