قیس فریدی۔ کتاب چھپواوݨ دا مقصد

لکھت: مہر حامد علی شاکر سیال

جیویں پہلے آکھ آیاں جو اے کتاب چھپواوݨ دا مقصدا اے ہے جو ٻہوں وݙے لکھاری سئیں قیس فریدی بارے تحریراں کٹھیاں تھیون تے وسیب کوں فائدہ تھیوے تے میݙے استاد دا ناں وی زندہ رہے ۔ میں اپݨی اولاد کوں دعا ݙینداں جو علمی تے ادبی کم واسطے انہاندا دل وݙا ہے تے او کتابیں دی اشاعت دل تھولا نی کریندے ، دل دریا ان مہر شکیل احمد شاکر سئیں کتاباں دی گھنڈ کھلائی دا ارادہ رکھدن ، انشاء اللہ وݙی تقریب تھیسے، زندگی باقی تاں کٹھے ہوسوں ۔ اپݨی اولاد دے نال نال ادارہ جھوک دے مالک تے قوم دے محسن ظہور دھریجہ سئیں دا وی شکریہ ادا کرینداں جو انہاں کتابیں دی اشاعت واسطے ٻہوں تعاون کیتے ۔

اپݨی کتاب دی خوبی بیان کرݨ نی چہندا جو خوشبو آپ دا آپ تعارف ہوندی اے ۔ البتہ میں اے ݙسݨ چہنداں جو کتاب دے غلطیاں ، خامیاں تے کتابت دی غلطیاں بارے آگاہ کریسو تاں جو آوݨ آلے ایڈیشن سوہݨے تھیون ، اے کم انشاء اللہ جاری راہسے ۔ کوٹلہ دیوان علمی مرکز بݨسے تے میݙی اولاد کوں وصیت اے جو وݙی لائبریری بݨاون تے سرائیکی دی خدمت کوں جاری رکھن۔ کینیڈا آلے سکھ اپݨی زبان واسطے کم کر سڳدن ، اساں کیوں نی کر سڳدے ؟

میں انہاں تمام لوکیں دا شکر گزار آں جنہاں دے مضمون ایں کتاب اچ شامل اِن ۔ ڈھیر سارے مضمون ڈاکٹر خورشید محمد ملک صاحب کوٹ مٹھن آلے دے رسالے عصائے کلیم توں گھدے ڳن ۔ مضمون کجھ اردو اِن کجھ سرائیکی اِن ۔ اساݙی کوشش ہے جو زیادہ توں زیادہ چیزاں کٹھیاں تھی ونجن ، ایندے نال نال اے وی ݙسی ونڄاں جو کجھ مضمون سرائیکی اخبار جھوک اچوں گھدے ڳن ۔ اے وی غنیمت ہے جو اساݙی وسیب اچ کجھ ادارے بݨ ڳن تے چیزاں چھپدیاں رہ ڳن ۔ نہ تاں ہر شئے رُل ونڄے ہا، جیویں جو صدیں دا سرائیکی ادبی ترکہ پہلے وی ضائع تھی ڳے، احٖ جو کجھ وی ہے اے وی نہ ہووے ہا ، جیکر ادارے نہ ہوون ہا ۔ اے کتاب وی چیزیں کوں ہتھیکا کرݨ دا ترلا ہے ۔ کتاب دے مضمون کیویں ہِن تے کیہو جہے ہِن ، ایندا فیصلہ پڑھݨ آلے آپ کریسن ۔ البتہ میں کجھ یاداں دہراوݨ چہنداں کیونجو میکوں ٻہوں بیتابی تے بیقراری اے جو جیرھیاں یاداں میݙے سینے وچ محفوظ ہِن او کتاب اچ آ ونڄن تے تریخ دا حصہ بݨ ونڄن ۔

حوالہ

کتاب "قیس فریدی ۔ فن شخصیت اَتے شاعری "  پیشکش  : مہر حامد علی شاکر سیال ، ناشر جھوک پبلشرز ، ملتان