قندیل لغاری
قبائلی جنگ وفساد دا شکار ہک بیاء نوجوان قتل ۔
تحریر: اورنگزیب اورنگ بغلانی
اج پورے وسیب دے دل وچ ہک نویں درد دا جنم تھئے۔ پنج بھیݨیں دا کلھا بھرا، ہک نوجوان قندیل لغاری، قبائلی جنگ وفساد دے وچ قتل تھی گئے۔ ایں المیے صرف ہک گھر کوں یتیم نئیں کیتا بلکہ پورے معاشرے دے سینے تے ہک نواں زخم وی لا ݙتے۔
قندیل لغاری ہک نوجوان ہا، پنج بھیݨیں دا کلھا بھرا ہووݨ دے ناطے اوں تے گھر دی ذمہ داری وی ہئی۔ اوں اپݨییں بھیݨیں دے خواب پورے کرݨ دا عزم کیتا ہا۔ پر قبائلی جنگ وفساد دے ایں بے رحم دور وچ، جتھاں انسانی جان دی کوئی قدر نئیں، قندیل دے خواباں دا چراغ گُل تھی گئے۔
ایں واقعے نے پورے وسیب دے اندر قبائلی جنگ وفساد دے خلاف ہک نویں بحث چھیڑ ڈتی اے۔ ایہو جہیے واقعات نہ صرف نوجوان نسل کو ختم کریندن بلکہ معاشرے دے مستقبل کوں وی تاریک بݨیندن۔ قبائلی جنگ وفساد دی ایہو جہیی ریت پورے وسیب دے اندر نفرت، دشمنی تے عدم برداشت کو فروغ ݙیندی پئی اے۔
قندیل لغاری دے قتل دے بعد ایہو سوال اٹھدے جو آخر ایں سلسلے دا اختتام کݙاں تھیسے؟ کݙاں تک پورے وسیب دے نوجوان ایں بے رحم جنگ وفساد دا شکار تھیندے رہسن؟ کݙاں تک ماءُ پیو اپݨی اولاد دے جنازے ڈیکھݨ تے مجبور تھیسن؟
ایں المیے دے بعد ضرورت ایں ڳالھ دی اے جو پورے وسیب دے اندر امن تے آشتی دے فروغ کیتے ٹھوس اقدامات کیتے ونڄن۔ قبائلی جنگ وفساد دے خلاف قانونی کارروائی کو مضبوط بݨاوݨ دے نال نال معاشرتی سطح تے وی شعور پیدا کرݨ دی ضرورت اے۔ نوجوان نسل کوں تعلیم تے روزگار دے مواقع فراہم کرݨ نال ایں قسم دے واقعات کوں گھٹ کیتا ونڄ سڳدے۔
قندیل لغاری دے قتل نے پورے وسیب کوں ہک وار ول سوچݨ تے مجبور کیتے۔ ایں واقعے دے بعد ضرورت ایں ڳالھ دی اے کہ اساں سبھ رل تے آپݨے معاشرے کوں نفرت تے دشمنی دے اندھارے توں نکھیڑ کے امن تے آشتی دے روشن راہ تے چلݨ چاہندوں ۔ قندیل لغاری دے خواباں کو پورا کرݨ دا ایہو واحد رستہ اے۔
قندیل لغاری دے خاندان دے غم وچ اساں سبھ شریک ہیں۔ اللہ تعالیٰ اوندی مغفرت فرماوے تے اوندے خاندان کوں صبر جمیل عطا فرماوے۔ آمین۔