قمرالاسلام قمر

اصل ناں       قمرالاسلام

تخلص          قمرؔ

ڄمݨ           1941ء

پیشہ            ملازمت

جاہ پتہ         پیدائش اِلٰہ آباد، موجودہ رہائش کراچی

بحوالہ ’’وہندے نیر‘‘

غزل

اَے یار انہاں ویرانیاں کوں گلزار وی آکھݨاں پوندا ہے

کئی اُچیاں جھِکیاں راہواں کوں ہموار وی آکھݨاں پوندا ہے

ایں عشق دے اُڄڑے رستے وچ کئی راہی ٹُر تے مر بھُر گٖئے

ایں راہ دے چھوٹے پتھراں کوں دیوار وی آکھݨاں پوندا ہے

کجھ حسن دے الھڑے نخرے ہن، کجھ عشق دی اُلٹی ریت وی ہے

ہر تیر چلاوݨ والے کوں دلدار وی آکھݨاں پوندا ہے

اڄ ظالم غربت دے ہتھّوں انسان دا ہُݨ اے عالم ہے

ہر خون دے پیوݨ والے کوں غمخوار وی آکھݨاں پوندا ہے

ایں درد دی حالت ݙیکھ قمرؔ دل رت دے ہنجوں روندا ہے

اڄ چور اُچکے ݙاکو کوں سردار وی آکھݨاں پوندا ہے

٭٭٭