قلعہ کہنہ ملتان
ملتان دی قدامت دی ہک اہم نشانی قلعہ کُہنہ ہے۔ جیکوں ہُݨ قاسم باغ آکھیا ویندے۔ اے قلعہ تاریخی، مذہبی، روحانی تے ثقافتی حوالیاں نال اپݨے اندر او خزینے گھٖدی پے جنہاںدا احاطہ کرݨ اوکھا ہے۔تاریخ اے ݙساوݨ توں قاصر ہے جو اے قلعہ کݙاں تے کئیں تعمیر کرایا۔ البتہ ایں دا ݙھڈ پھاڑ تے ایندے اندر جھاتی پاوݨ آلے سرالیگزینڈر کنگھم ایندی تہہ اچوں 800سال قبل مسیح تک دے آثار حاصل کیتن۔انہاں 40فٹ تک کھدائی کیتی ہئی جݙاں جو ملتان دے ابن حنیف نے 20فٹ گہرائی توں ایجھیاں بے شمار چیزاںدریافت کیتیاں جنہاں کوں ݙیکھݨ نال وثوق تھیندا ہا جو ملتان دا قلعہ ہڑپہ دا ہم عصر بلکہ ایں توں وی قدیم ہے۔ شروع اچ قلعہ ݙڈھ میل دے گھیرے اچ ہشت پہلو بݨیا ہویا ہا۔ جیندی باقاعدہ فصیل ہئی جیڑھی ہُݨ منہدم تھی چکی اے 1974ء تک ایندے آثار باقی ہن ۔ فصیل اتنی چوڑی ہئی جیندے تے کئی گھڑ سوار برابر بھڄدے ہن تے ایندے تے 26برج ہن۔
حوالہ
[لکھو | ماخذ وچ تبدیلی کرو]کتاب: میݙی دھرتی، میݙے لوک ، مصنف: ظہور احمد دھریجہ ، ناشر: جھوک پبلشرز ، ملتان 2018ء