قلعہ پنڈی ابن شاہ
ایں قلعے دے آثار شور کوٹ دے شمال وچ شاہی محل دے ہک فرلانگ پَرے موجود ہن ۔ ایں جاہ کوں پنڈی ابن شاہ دے ناں توں موسوم کیتا ویندے ۔ ہک اُچے ٹیلے تے مختصر جہا قبرستان وی ہے اَتے ابن شاہ نامی بزرگ دا مزار وی ۔ ایں قلعے تے یونانی عہد دیاں مہراں اَتے سکے مسلسل ملدے رہییے۔ اتھاں وی ہک مندر دے نشان ملدے ہن جتھاں گھیو دے چراغ ٻلدے ہن کیونجو ہک خاص جاہ ہݨ تئیں روغن آلود نظر اَمدی ہے ۔ جاہ جاہ بھاہ لڳݨ دے نشان موجود ہن ۔ کجھ عمارتاں دے آثار وی پاتے ویندن پر انہاں وچ کچیاں سِلھیں استعمال تھیاں ہوئیاں ہن ، اتھاں ہک سخت گول پر لمبوترا پتھر پیا ہے جئیں دا وزن ویھ مݨ توں زیادہ ہے اَتے اوں تے سِجھ دی تصویر ہے۔ معلوم تھیندے جو اتھاں ایں قوم دا غلبہ رہیا ہے جیرھی سورج دی پرستش کریندی ہئی اَتے اے پتھر انہاں دے معبد وچ رکھیا ہویا ہا۔
حوالہ
[لکھو | ماخذ وچ تبدیلی کرو]کتاب: میݙی دھرتی، میݙے لوک ، مصنف: ظہور احمد دھریجہ ، ناشر: جھوک پبلشرز ، ملتان 2018ء