قصہ تمیم انصاری

حضرت تمیم انصاری صحابی رسول ﷺ دا اے قصہ سرائیکی زبان وچ مولوی محمد امین تحریر کیتا۔ ایں قصے دا سن تصنیف کتھاہیں درج کینی۔اینکوں مولوی خدا یار ہوریں تاجران کتب ملتان ماہ ستمبر1910ء وچ مطبع ‘ اسلامیہ سٹیم پریس لاہور توں چھپوایا۔ ایں قصہ وچ حضرت تمیم انصاری کوں ہک دیو پکڑ تے اپݨے ملک گھن ویندے۔ اتھاں حضرت تمیم انصاری حضرت الیاس نال ملدن۔ دجال کوں ڈہدن۔ ہک فرشتہ قیامت دے آثار ݙسیندے ول انھاں دی حضرت خضر ؑ نال ملاقات تھیندی ہے۔ اتھاں پیر ذال دنیا کوں ݙہدن۔ یا جوج ماجوج دی ہولناک آواز سݨ تے ݙردن تے چھیکڑ وچ حضرت خضر ؑ دی مدد نال اپݨے وطن واپس پُڄدن۔ حضرت تمیم انصاری دی عدم موجودگی وچ انھاں دی زوجہ حضرت عمر فاروق دے فیصلے مطابق ݙوجھا نکاح کر گھندن۔ انھاں دی واپسی تے شریعت موجب عقد ثانی کیتا ویندے۔ اے سارے واقعات انتہائی دلچسپ انداز اِچ بیان کیتے ڳن۔ قصے دا آغاز حمد تے نعتِ رسولؐ نال تھیندے۔

کہاں الحمد خاصا میں خدا کوں

صلوٰتاں لکھ محمد مصطفیٰ کوں

محمدؐ دوست رب العالمین ہے

محمدؐ شاہ ختم المرسلین ہے

محمدؐ نور اکھیاں میریاں دا

جوہے سردار کلی مُرسلاں دا

پُچھے اس توں صفت یاراں کہاں میں

انھاں کولوں ٻہوں لہاں لیناں میں

جو چارے یار ہن برحق نبی دے

محمدؐ مصطفیٰ دے برگزیدے

پچھے اس توں کریندا ڳال اصحاب

کہیں ݙٹھی نہ سُݨی مول وچ خواب

تمیم انصاری دا قصہ کرینداں

توں سُݨ ٻولی ہندی سوکھی بݨیندا

جو میں لکھی ݙٹھی اینویں حکایت

جو کیتی ہے خبر صادق روایت

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان