قاضی امام بخش شیروی
طبعزاد شاعری دے نال نال ایں دور وچ ہک منظوم ترجمہ اساݙے سامݨے آندے۔ اے ہے میرا من دے قصے چہار درویش دا منظوم سرائیکی ترجمہ ۔ اے ترجمہ قاضی امام بخش شیروی کیتے۔ قاضی امام بخش قصبہ شیرو ڈویژن ڈیرہ غازی خان دے ہک طالب علم شخص ہن۔ آپ دے بزرگ فرغانہ توں ہجرت کر تے اتھاں آباد آن تھے۔ قاضی امام بخش سلسلہ قادریہ دے بزرگ شیخ خدا بخش مانک پوری دے مرید ہن۔ آپ درویش منش انسان ہن۔ قاضی امام بخش دی وفات 8رمضان المبارک 1325ھ مطابق 13مارچ 1927ء بندی اے۔ قاضی صاحب ٻہوں صاحب علم ہن۔ آپ کئی کتاباں تصنیف کیتیاں جنھاں وچوں کجھ اے ہن ۔ صدیقۃ الاسرار فی ‘ اخبار الاسرار ‘ اے کتاب فارسی زبان وچ ہے۔
شاہنامہ ‘ ایں کتاب وچ محمد بن قاسم توں بادشاہ دی تاریخ ۔ امام اللغات ‘ قصہ صاحباں مرزا ‘ قصہ سوہݨی مہنیوال قصہ باغ و بہار ‘ قاضی امام بخش اے قصہ 2ماہ صفر المظفر 1300ھ وچ مکمل کیتا۔ اے مولوی لطف علی دے سیفل نامے دی طرز وچ ہے۔ایں قصے دے سوا ݙو ہزار دے قریب شعر ہن۔ سارا قصہ 350بنداں دی شکل وچ نظم کیتا ڳے۔ عربی ‘ فارسی دے الفاظ دا زیادہ استعمال ہے۔ قصہ فنی محاسن نال بھر پور ہے تے قاضی امام بخش دی شاعرانہ عظمت دی دلیل اے۔
حاتم طائی تے نوفل بادشاہ دی کہاݨی (اقتباس)
[لکھو | ماخذ وچ تبدیلی کرو]دانا مرد دیانا ہا فرخندہ تے فرزانہ
چاتا میں مسکین اڳے ہک قصہ بادشاہانہ
ملک عرب وچ رہندا نوفل نامی شاہ زمانہ
طرح طریق تراوت بہتی دولت دا مستانہ
کر فر زور زمانے دا سر شور مغز سلطانہ
حاتم ہا وچ وقت اُہیندے سخی اتے مردانہ
سن کر نام سخی دا نوفل سخت تھیا حیرانہ
دل وچ حیرت غیرت شاہ کوں رہندی روز شبانہ
آخر کار تیار تھیا سبھ لشکر نال روانہ
سر وچ شور اندر وچ غیرت شہر کرے ویرانہ
انعام اکرام دے کیتے نوفل عہد لکھیا پیمانہ
جو کوئی پکڑ گھن اوسی حاتم دعوے دار پرانہ
گھن دولت دنیا بہتی ویسی کر تکرانہ
امام ڳئے جاسوس جہاں وچ کر کر فکر بہانہ
سرائیکی شاعری دا اے دور شعر و ادب دے انتہائی عروج دا دور اے۔ ایں دور وچ بے شمار شعراء ہک ٻئے توں ودھ تے فن دے ہوکے سکے ڄمیندے ݙسدن۔ اساں مہاندرے شاعراں دا تذکرہ کر چھوڑئیے۔ کجھ ٻئے شعراء جنھاں ایں دور وچ چنگا ناں کمایا۔ انھاں دے ناں اے ہن:
(1) میاں محمودݨ بہاول پور
(2) صوفی نبی بخش تلنبہ
(3) مستن ملتانی ملتان
(4) سید نباہو شاہ افگار
(5) ݙتݨ ملتانی ملتان
حوالہ
[لکھو | ماخذ وچ تبدیلی کرو]کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان