قاسم عمر

قاسم علی عمر، جیڑھے 9 فروری 1957ء کوں نیروبی، کینیا وچ پیدا تھئے، ہِک پاکستانی سابق کرکٹ کھلاڑی ہَن۔ اُوں نے 1983ء توں 1987ء تئیں 26 ٹیسٹ تے 31 ہِک روزہ بین الاقوامی میچ کھیݙیے۔ اُوہ اُنہیں پاکستانی کرکٹ کھلاڑیاں وِچوں ہَن جئیں نے سپاٹ فکسنگ وِچ ملوث ہوݨ دا اعتراف کیتا تے اِیں سلسلے وِچ اُنہیں تے پابندی لا ݙتی ڳئی۔ قاسم عمر اوپننگ بلے باز ہوݨ دے نال نال مڈل آرڈر وِچ کݙہیں وی بیٹنگ کرݨ دی صلاحیت رکھدے ہَن۔ قاسم عمر نے پاکستان دے علاوہ کمبرلینڈ، کراچی، مسلم کمرشل بینک تے سندھ دی طرفوں کرکٹ مقابلیاں وِچ حصہ گِھدا۔

ابتدائی زمانہ:

قاسم عمر نے 1974ء وِچ کرکٹ اسکالرشپ تے ممتاز پرائیویٹ بوائز اسکول سینٹ پال انگلش ہائی اسکول توں میٹرک کیتا۔ اُوہ کینیا وِچ پیدا تھئے ہَن تاہم 1957ء وِچ اپݨے ٹَٻر دے نال پاکستان ہجرت کر کے آ ڳئے ہَن۔ اُنہیں دی والدہ کینیا دی ہئی تے اُنہیں دے کالے ہوݨ دی وجہ توں اکثر لوک اُنہیں کوں سندھ وِچ آباد شیدی برادری دا رکن سمجھ گِھندے ہَن۔ قاسم عمر ہِک شاندار اوپننگ بلے باز ہَن جیڑھے مڈل آرڈر وِچ کݙہیں وی چنگی کارکردگی ݙکھاوݨ دی صلاحیت رکھدے ہَن۔

پابندی دے بعد:

کرکٹ تے پابندی لڳݨ دے بعد اُوہ پاکستان چھوڑ تے برطانیہ دے شہر مانچسٹر وِچ آباد تھی ڳئے۔

ٹیسٹ کرکٹ وِچ آمد:

اُوں نے اپݨا ٹیسٹ ڈیبیو 1983-84ء وِچ ہندوستان دے خلاف جالندھر وِچ کیتا۔ صرف چار سال دے کیریئر وِچ اُوں نے 26 ٹیسٹ کھیݙے، ݙو ڈبل سنچریاں، ہِک سنچری تے 5 نصف سنچریاں دی مدد نال 1502 رنز بݨائے، جِیندا اختتام 36.63 دی شاندار اوسط نال تھیا۔ اپݨے کریڈٹ تے 15 کیچز دے نال اُوہ ہِک چنگے فیلڈر وی ہَن۔ قاسم عمر دا بہترین اسکور 1984-85ء وِچ بھارت دے خلاف فیصل آباد وِچ 210 رنز ہئی، اِیں دوران اُوں نے مدثر نذر دے نال ݙوجھی وکٹ دی 250 رنز دی ریکارڈ شراکت وی قائم کیتی۔ اے فیصل آباد وِچ وی ریکارڈ انفرادی ٹیسٹ سکور ہئی، جِینکوں بعد ازاں تسلیم عارف نے شیئر کیتا۔ اِیندے بعد اُوں نے 1985-86ء وِچ سری لنکا دے خلاف فیصل آباد وِچ وی 206 رنز بݨائے۔ 1984-85ء وِچ ڈیونیڈن وِچ نیوزی لینڈ دے خلاف تریجھے ٹیسٹ وِچ اُوہ سنچری بݨاوݨ توں محروم رَہے جِتھاں اُوہ 96 تے 89 رنز بݨا تے آؤٹ تھئے۔ اُوں نے 31 ہِک روزہ بین الاقوامی میچاں وِچ چار نصف سنچریاں دی مدد نال 642 رنز بݨائے۔ اُنہیں دا بہترین ون ڈے سکور 69 ہئی۔

کراچی وِچ فلائی اوور دا ناں:

2018ء وِچ، کراچی میونسپل کارپوریشن نے نیشنل اسٹیڈیم، کراچی دے نیڑے ہِک فلائی اوور دا ناں قاسم عمر دے ناں تے رکھیا۔