قابل خانی گبول

گبول قبیلے نال تعلق رکھݨ آلا ایہ خاندان ضلع ڈیرہ غازی خان دے موضع ٹھٹہ گبولیں (چوٹی زیریں) توں کہیں جنگ دی صورت وچ نکلیا۔ کجھ افراد راجن پور چلے ڳئے تے کجھ دریائے سندھ کوں پار کر کے سیت پور دے علاقے وچ آ ڳئے۔

مختصر خاندانی پس منظر

اک روایت ہے کہ اوہ ٹھٹہ گبولاں توں کوچ دے بعد موجودہ ضلع راجن پور وچ بمقام ہڑند وی مقیم رہے تے 1950ء تک فاضل پور دی حدود وچ (غالباً ریلوے ٹیشݨ دے نواح وچ آباد، سادات دے قبضے وچ) اُنہاں دی ملکیتی زمیناں دا ریکارڈ وی موجود ہئی۔ اتھوں توں دریائے سندھ دے مشرقی کنارے ’’بیٹ بوسن‘‘ توں ملحق ’’موضع گبول‘‘ آباد کیتا۔ جو ہݨ تک ریکارڈ وچ موجود ہے مگر دریا برد تھی چکیا ہے۔ جݙݨ ناہڑ خاندان سیت پور تے حکمران ہئی تاں موضع گبول توں کجھ خاندان سیت پور منتقل تھی گئے۔ اتھاں قلعہ گبولاں دی بنیاد رکھی تے اندازاً 200 سال تک اتھائیں آباد رہے، اتھوں توں چار بھرا ’’جان محمد خان گبول، خان محمد خان گبول، فتح خان گبول تے گانمن خان گبول‘‘ نے موجودہ تحصیل علی پور ہجرت کیتی تے موضع بیٹ نبی شاہ وچ ’’چوکی گبول‘‘ دے ناں نال اپݨا علاقہ آباد کیتا۔