فیض محمد دلچسپ

سئیں فیض محمد دلچسپ وستی جندو پیر کمال تحصیل لیاقت پور ضلع رحیم یار خان دے رہݨ والے ہن۔ آپ تجارت کریندے ہن ۔ کم پڑھے لکھیے ہووݨ دے باوجود سرائیکی شاعری وچ انُھاں ٻہوں ناں کمائے۔ بے شمار آپ دے شاگرد موجود ہن۔ 1982ء وچ ہک حادثے وچ وفات پاڳئے۔ آپ دا مجموعہ کلام ’’ٹھڈڑے ساہ‘‘ بزم فیض لیاقت پور دی طرفوں شائع تھی چکے۔ فیض محمد دلچسپ رعایت لفظی دا ٻہوں استعمال کریندن۔ کلام وچ ٻہوں زورِ بیان، دیہی وسیب دے مسائل ‘ مناظر ‘ حوالے ‘ انھاں دے کلام دی سُنڄاݨ اِن۔ معاشرتی تے سماجی برائیاں تے انھاں جی بھر بھر تے شاعری کیتی اے۔ انھاں دی شاعری اساݙی تل وسیبی رہتل دی نمائندگی کریندی اے۔

نمونہ کلام:

جندڑی تیکوں کتھ دا ݙر ہے

ضامن تیݙا لڄ پرور ہے

توں ہیں جندڑی رب کوں پیاری

تیں کارݨ ہے دنیا ساری

تھیویں جے نہ محض اواری

بخت اقبال دا تیݙا در ہے

توں نہ ہوندی کجھ نہ ہوندا

نہ کئی کھلدا نہ کوئی روندا

نہ ڳل ڳیڑ ولاکا پوندا

ݙکھ سُکھ اپݨاں ڄاݨیں ور ہے

کُن توں پہلے وی توں ہانویں

کُن دے کیوں نہ راز ݙسانویں

من وچ جے کر جھات چا پانویں

پاک تیݙی لاریب نظر ہے

لوگ ݙریندن توں مرویسیں

سخت حساب عذاب بھوڳیسیں

خاک فنا دی جھوک سہسیں

او تاں تیݙا اصلی گھر ہے

میں دلچسپ دی تھی ونڄ سیاݨی

نہ تاں اُݙسیں وانگ کھمباݨی

کہیں دی اصلوں تھی نہ کاݨی

نت تیں کُسݨاں نال صبر ہے

جندڑی تیکوں کتھ دا ݙر ہے

حوالہ

کتاب: سرائیکی شاعری دا اِرتقاء، مصنف: ڈاکٹر نصراللہ خان ناصر، چھاپہ خانہ : جھوک پبلشرز ملتان