فیشن

ڈاکٹر محمد سلیم ملک

جیݙے دید بھنوائو اُݙاہیں بھڄ دُھرک لڳی پی اے ۔ کتھائیں کُتّیں دی دوڑ اے تے کتھائیں ݙاندیں تے بحث اے ۔ کتھائیں اُٹھیں دا میلہ اے تے کتھائیں گھوڑے دُھرکدے پن۔ بِن ملکیں اِچ وَت موٹریں دی دوڑ اے یا وت موٹرسائیکل دھرکئی ودِّن۔ کتھائیں تاں چھڑے سائیکل بھڄئی ودن پر اساں جیں بھڄ دُھرک توں سہکدے ودوں او فیشن دی دُھرک اے ۔ باقی دوڑاں تاں کتھائیں پُڄ ویندین تے اُتھائیں مُک پئین ۔ پر اے کلھی دوڑ اے جہڑی کتھائیں پُڄدی اے نہ کتھائیں مُکدی اے ۔ اے پاݨی دی او اَݙ اے جہڑی ہر ہمیش وہندی پی اے پر ایندا پیچ کوئنی۔ نہ اݙ سُکدی اے نہ بارہ پیچدے تے فیشنی لوک او ݙاند اِن جیرھے اَکھیں تے کھوپے چاڑھی فیشن دی چکّل دے چودھار ݙینہہ رات وہندے پِن۔

جے فیشن دے رنگ ڈھنگ ݙیکھݨے ہووِن تاں لوکیں دے کپڑے ݙیکھو۔اُنہاں دے ونکو ونک دے رنگ ہوندن ۔ کہیں دی چھپائی نویکلی ہوندی اے ۔ کہیں دی رنگائی ٻئی طرح دی ہوندی اے ۔ کہیں دے لباس دی ترپائی او ہوندی اے جو دید دے تروپے اُدھڑدن تے کہیں دی پوشاک دا ڈیزائن ایجھا وکھرا ہوندے جو اُوں کوں ݙیکھ تے سامݨے آندے دید رَلا تے کھڑ ویندن ۔ کولہوں ترپدے اِرکاں مریندے تے اَڳیتے ویندے وَل وَل تے ݙیہدن جو اے مخلوق کِتھوں لہہ آئی ہے؟ کیرھی دھرتی تے رہندی اے؟ کیرھے جند راہ دا اَٹا کھاندی اے؟ ایں مخلوق دے پتلونیں دے پانچے اتنے کُھلے ہوندن جو پجاما کیا غرارا نظردن تے امتحان ویلے ٹیسٹ پیپر جنگھ نال ٻدھی رہندن ۔ وَل ݙو چئوں سالھیں بعد ایہے پانچے ایجھے سوڑے تھی ویندن جو اُنہاں توں ڄنگھ ترپاوݨ اَوکھا تھی ویندے ۔ اینویں لڳدے ݙونالی بندوق تے کپڑا چاڑھیا ڳئے ۔ قمیضاں اتنیاں نِکیاں ہوندین جو کھڑیں نیفا نظردے تے کݙاہوں اتنیاں درگھیاں تھی ویندین جو ٹُردیں ٻوہاری ݙیندین ۔ کݙاہوں اتنیاں پوہلیاں ہوندین جو سڄل ٻال لُکئی رہݨ تے کݙاہوں ایجھیاں سوڑیاں تھی ویندن جو سارنگی تے غلاف چڑھائی ودن ۔ شلواراں اَحٖ ڈھائی گزر دیاں کفنیاں اِن تاں فزریں ݙاہ ݙاہ گز دے گگھرے۔ بوچھݨ اِن جو کݙاہوں چادر آنگوں ٻکل مریندن تے پُھٹیاں چُݨݨ کیتے کانبے بݨ ویندن تے کݙاہوں وَٹ کھا تے مفرل تھی ویندن تے کھٻڑی آنگے ڳل اِچ گوگھا ݙیندن ۔ فیشن دے کُھلے جُتیں کوں وی لڳدن جو انہاں دے دون کݙاہوں ایجھے کُھلے تے پوہلے ہوندن جو او کُمیاں نظردن تے کݙاہوں اتنے سوڑے تے تکھے ہوندن جو مَس اِچ ٻوڑ تے اَکھر مار گھنو۔

جے فیشن دے بَنود لباس پوشاک تائیں رہݨ ہا تاں اسیکوں عُذر اعتراض نہ ہئی پر ہُݨ تاں ہر شے دے سونے اِچ فیشن دا کھوٹ رَل ڳے ۔ اَڳے جو کوئی مِلدا ہا تاں دڳ تے چنگا لحظہ کھڑ ویندا ہا تے اُتھائیں ݙکھ سُکھ ونڈیندا ہا ۔ پر ہُݨ تاں ہر کوئی اُٻہلا تھیا ودے ۔ بھاکل تاں ٻی گاٖلھ اے ہتھ اِی نی ݙیندا۔پرے توں مُرچا متّھے تے چا رکھیندے یا وَت ہتھ اُتے چا تے سلام کوں اُلار چھوڑیندے ۔ جینویں آہدا پیا ہووے ’’ہا سائیں ہا ۔ میں تہاکوں وی ݙیکھ گھن ساں‘‘تے کجھ مارکا ، وَت گاٖٹا لوݙݨ کوں وی ڳیڑ سمجھدن ۔ او چپیں کوں پچھیتے کنیں تائیں چا چھکیندن تے  ݙندیں کوں اَڳیتے قطیر اِچ کڈھ گھندن ، اڳلا سمجھدے میکوں ݙیکھ تے کِھلدے پِن ۔ ایں اُنھاں کوں ڈھیر چُل پُل نی کرنی پوندی تے سلام دا کنڈا وی نکل ویندے۔

اے فیشن اِی بس چالو چیز اے ۔ درزی کوئی کپڑا ݙنگا کٹ ٻہے ، پُٹھا سی چھوڑے ، کتھائیں چیتا لہہ ونڄس ، کتھوںاُجلا کر ٻہے ۔ تُساں عُذر اعتراض چا کرو ۔ کجھ یاد چا ݙیوائو ۔ بُھلی گاٖلھ چا منوائو ۔ حرام جو منّے دی سہی ۔ ہتھوں بلوچ آلی ڄنگھ اُتے رکھیسے ۔ آکھسے:’’تہاکوں کیا پتا؟ اَحٖ کل فیشن ایہو پیا چلدے‘‘ رنگ برنگیں تھڳڑیں کوں ڳنڈھوں چار ݙیندے تے نکی کیتے فراک سی گِھندے۔ وَل آہدے ’’اے فیشن اے‘‘ شادی آلے اسیکوں مٹھا پہلوں کھوا ٻلھیندن تے سلوݨاں بعد اِچ آنیندن۔ اساں اعتراض چا کروں تاں اے نی منیندے جو بُھل ڳیوں ۔ ایہا تکّڑ رکھیندن ۔ ’’اَحٖ کل رواج اینویں پیاچلدے جو چَہرا بعد اِچ کھائو‘‘ تے ولا گھر تائیں شوکدے ونڄو اینویں چانہہ دا کوپ پلا تے اُتوں پاݨی دا گلاس پلیندن تے وَل آہدن : ’’ایہہ تاں اَڄوکا فیشن اے‘‘۔

فیشن دے نویں نوکر نمونے ٻول چال اِچ وی نظر آندن کوئی انگریزی اِچ گاٖلھ کریندن تاں اپݨا منہ وِگاٖڑ ݙیندن ۔ کوئی منہ سِدھا رکھیندن تاں فارسی دا لہجہ وِڳاڑ ݙیندن تے جیڑھے منہ تے لہجے ݙونہاں کوں سدھا رکھیندن او آپݨی ماء ٻولی کوں وِگاٖڑ ݙیندن۔ کئی وَت رُعب پاوݨ کیتے سرائیکی دے پاند اِچ اُردو دیاں ڳنڈھوں ݙیندن تے آپݨی پڑھائی دے تروپے اُدڑیندن ۔ ہک سنگتی آکھݨا اے ہا ’’میݙا اوں نال کئی سالھیں تائیں سانگا ریہے۔پر آکھیُس اے جو ’’میݙا اُوں نال کئی سالھیں تئیں تعارف تھیندا ریہے‘‘۔

اینویں ہک ݙینہہ میرݨ آپݨے سنگتی کوں پیا آکھے ’’بشکݨ! ٻی گاٖلھ سُݨی؟ جندوݙہ مر ڳے!‘‘ بشکݨ ولدی ݙتی ۔ ’’ہا! میکوں پتا اے۔ تیݙی بھڄئی ݙسیے۔ پر یار او تاں پا پیسے آلا ہا ۔ او مریا کینویں ہے؟‘‘ میرݨ آکھیا:چریا! پا پیسے آلے کوئے نی مردے؟ شُدّ ا فوت تھی تے مرے ۔ بشکن ٹھڈا ساہ بھر تے آکھیا: ’’بس یار اَحٖ کل بیماریاں وی ودھ ڳن‘‘ اینویں ہک بھرا انگریزی کوں پیا وٹّا مارے۔‘‘ خیر شاہ !گاٖلھ سُݨی‘‘ ملک آلا پُتر اٹھاراں جماعتاں پڑھ ڳے ۔ سُݨیئے اَمدے سال لیڈی ڈاکٹر بݨ ویسے‘‘۔

اَحٖ سینے تے ، آپݨے سینے تے ، ہتھ رکھ تے کون آکھ سڳدے جو ہر کوئی آپݨے کیتے کرائے کون فیشن دی اوڈھ اِچ نئیں لُکئی ودا۔ جے فیشن ، فنون لطیفہ دی اڳوائی اے تاں ایندے آپݨے سکے ایں تے اَکھ رکھی ودن ۔ لکھاری جیڑھا گِیڑبگیڑوں لکھدن اونکوں نواں تجربہ آہدن ۔ کاتب توں مس وٹیج پووے تاں اونکوں پُھل ٻوٹیں دی اوڈھ اِچ لُکیندن ۔ نَٹ بھولوں آنگے نچدن تے اونکوں کتھک ناچ آہدن ۔ گاٖنوݨ آلے ݙوہڑے کیا گاٖندن سُریں دا منہ کوٹیندن۔ مصور ، گنگ دام بݨیندن تے اونکوں بندے بشر ݙسیندن ۔ مستری گھر بݨیندن تاں اوں اِچ جالے مئی مسیت آلے پا چھوڑیندن ۔ وَل ݙسو ٻیلی فیشن شودا بے چّسا تھیوے کہ نہ تھیوے۔

حوالہ

کتاب: سرائیکی انتخابی (بی اے) ، مدیر: انوار احمد، مرتبین: ڈاکٹر اسلم انصاری، ڈاکٹرسجاد حیدر پرویز، شوکت مغل ، پبلشرز: ملتان کتاب  گھر