فیسبک دی پوسٹ دا مقصد

واہ واہ خوب ہے سئیں، کیا ایہو مقصد ہوندے ہر پوسٹ دا میڈے خوبصورت شعراء کرام ادیب تجزیہ نگار تے ادب نواز قاری ایں بارے ضرور صلاح ڈیسن کجھ ڈینہہ پہلے میں منصور شانی صاحب دے ڈوہڑے تے برملا لکھ گیاں جو یار اصلوں چس کینی ڈوہڑے وچ. ایں جوان کوں سلام ھے جو ایں فراغ دلی دا مظاہرہ کیتے کوئی غصہ بغض کینی کیتا نہ ہی فضول دی بحث یا بے ادبی. بلکہ خوش تھی تے آہدے چلو کوئی تاں ھے جیڑھا صرف منہ موکھنڑ کیتے کمنٹ کینی کریندا. جڈاں کوئی شے پبلش تھی ویندی ھے یا فیس بُک تے اپ لوڈ کر ڈتی ویندی ھے تاں قارئین کوں کھلی اجازت ہوندی ہے اپنڑی رائے دی اساں بس تعریف تاں سنڑ سگدے ھوں اگر کوئی بئی گال کر گے تاں ول اساڈا او دشمن تھی ویندے.

لیکن اے وی ضروی ھے کہ اگر کوئی شے ٹھیک نی لگدی یا کوئی کمی بیشی ھے تاں او دلائل نال ڈسی ونجے جو ایں ٹھیک تھیسے بس صرف خامخواہ دی تنقید نہ ھووے دلائل نال اصلاح ھووے نقص بیان کیتا ونجے ایکوں آہدن تنقید برائے اصلاح ہر دور وچ ادب کوں معیاری کرنڑ کیتے اے شے لازمی سمجھی گئی ہے. بس کوڑی واہ واہ سرائیکی ادب کوں برباد کیتی ویندی ھے. اساں ایں شے دے قائل ہوں کہ اساڈی تعریف پوسٹ تے کیتی ونجے اگر کوئی بئی گال ھے تاں ول انبکس وچ کیتی ونجے. کمال ہے بھئی یاں تاں اساں کلام وی انبکس وچ بیجھی بیٹھے ھوں تاں ول تاں ٹھیک ہے جڈاں پوسٹ تھیا کھڑے تاں ول تعریف تاں سنڑ سگدوں تنقید کیوں کینا.

اگر ادب کوں معیاری چاہندے ھو تاں ول فراغ دلی دا مظاہرہ کرو اتنی محنت کرو کہ کوئی گنجائش نہ ھووے تعریف دے نال نال اپنی کمی کوتاہی وی قبول کیتی ونجے تاکہ اساڈے نال نال کجھ بے لوگ وی سمجھ سگن.. کلام الہی تے احادیث توں علاوہ کوئی شے حرف آخر نی سمجھی ویندی ہر لکھاری کنوں غلطی تھیندی ھے. غلطی تھیونڑ حیران کن گال کینی حیران کن گال اے ھے جو غلطی تسلیم نہ کیتی ونجے کوڑی انا کیتے. بیشک کوئی مضبوط دلائل نال گال کیوں نہ کرے. میکوں پتہ ہے کہ اے پوسٹ کافی لوگیں تے سینے تے نشتر وانگ لگدی پئی ہوسے بہرحال کم از کم میں تاں غیر معیاری پوسٹاں توں اکتا گیاں روزانہ اینجھے اینجھے کلام مسلسل پڑھ تے سرائیکی ادب کوں پست تھیندا ڈہیداں پیاں. روزانہ دی پوسٹ کنوں اگر ہفتے ڈو دے بعد ہک معیاری شئے ھووے تاں میڈے خیال وچ بہتر ہے باقی تساڈا کیا خیال ہے منتظر ھاں.

رفیق تائب احمد