فیاض احمد زاہد

اصل ناں       فیاض حسین

تخلص         زاہدؔ

ڄمݨ           1971ء

تعلیم          مڈل

فون نمبر        0333 6445698

جاہ پتہ       جاگیر گبول تحصیل و ضلع راجن پور

زاہد گبول دا تعلق راجن پور دی دھرتی نال ہے ، جتھاں عاشق خان بزدار تقریبََا 40سالیں کنوں ہر سال مہرے والا دے مقام تے سرائیکی میلہ کرواوݨ دا اہر کریندے۔ایں میلے دا بنیادی مقصد سرائیکی لوکاں کوں اپݨے حق حقوق بارے شعور ݙیواوݨ ہے۔ایہ میلہ ہک تحریک ہے ظالم جابر لوکاں دے خلاف۔جݙاں جو زاہد گبول ایں تحریک دا حصہ ہے۔اگر آپ دا شعری مجموعہ ’’آلھڑاں‘‘ پڑھ کے ݙیکھو تاں زاہد دے کلام اچ علمِ بغاوت ٻہوں بلند نظر آندے۔مثلََا ۔

؎بغاوت عام تھی ویسی تیݙے دربان تئیں پُڄسے

تے کُئی مظلوم ہتھ آخر تیݙے گروان تئیں پُڄسے

غزل

روز وعدہ ہک وفا تھیندا ریہا

پر کوئی ہک نہ وفا تھیندا ریہا

وقت تاں چڑھدی کنی دا یار ہے

ظالمیں دا ہمنوا تھیند ریہا

ہسدا وسدا چوک ساݙے شہر دا

ݙیہدیں ݙیہدیں کربلا تھیندا ریہا

موت رُٹھے یار وانگوں بھڄ ڳئی

ساݙا جیوݨ ہک سزا تھیندا ریہا

ہر قدم تے مہݨاں ہک اوقات دا

ساݙے منہ تے نت ٹھکا تھیندا ریہا

اتناں زاہدؔ یاد ئِ ݙیوے ٻجھ ڳئے

بعد ایندے سدھ نی کیا تھیندا ریہا