فوجی ٹرک نال ٹکر

1970ء ء ِ چ جنگ دی حالت ہئی ،سڑک تے فوجی ٹرکیں  دے قافلے گذردے ہن ،ہُنائیں  ݙینھیں  ہٹی دے سودے میں  آپ سائیکل تے گھنݨ ویندا ہم ،اساݙا ہک سکّا پیر بخش دھریجہ ریلوے ملازم ہا ،اُو خان پور ونڄݨ واسطے سواری دی انتظار ٻیٹھا ہا ،آکھیوس میکوں  چئی ڄل ،اُو سائیکل تے ٻہہ ڳیا ،میتلیں  آلی گُلائی ء ِچ سامھے فوجی ٹرک اَمدے پے ہن ، پیر بخش ترپا مار ݙتا ہینڈل سڑک آلے پاسے مُڑ ڳیا ، فوجی ٹرک سائیکل وچ دُھو تھیا ،میں  چَو تے پرے ونڄ پیُم ، سائیکل جوکڑ بݨ ڳیا ،ٹرک توں  لہہ تے فوجی بھڄدے آئے ،میکوں  چاتونے ،کپڑے شپڑے چھنڈکیونے تے پچُھیونے ’’چوٹ تو نہیں  لگی‘‘ میں  آکھیا ! کائناں  ، پیر بخش کوں  سݙ تے برا بھلا آکھیونے جو تیݙی غلطی توں  حادثہ تھئے پر اللہ سئیں ٻال کوں  معجزانہ طور تے بچا گھٖدے۔اونکوں  10روپے ݙتونے جو سائیکل بݨوائو ، اساں  سائیکل ٹانگے تے چا ڳے بݨائی آلے پنج روپے گھٖدے، ہک اللہ دی رحمت اے تھی جو حیاتی بچ ڳی ٻیا کرم اے تھیا جو مار توں  بچ ڳیوسے،نتاں  فوجی کُٹیندے ہن ،حادثے توں  ݙو ݙینھ پہلے گاہݨاں  کانجوں  ٹریکٹر ٹرالی گھٖدی ویندا ہا پچھوں  فوجی ٹرک پُوآنپ ،پُوآنپ لئی اَمدا ہا ،ڳاہݨے ہارن نہ سُݨیا ،ساݙی وستی کنیں  فوجی ٹرک تلے لہا تے اڳوں  وَل آیا تے ٹریکٹر روک تے سارے فوجیں  اتنا ماریا گہݨا کانجو لہو لہان تھی ڳیا ۔

حوالہ

کتاب: مُہاڳ، مصنف: ظہور احمد دھریجہ ، ناشر: جھوک پبلشرز ، ملتان